Nwoyo Cik 10

Moses ogamo Cik Apar odoco

(Nia 34:1-10)

1Ikare meno Rwot owaco bota ni, “Muk kidi ma apada aryo, ipaagi macalo mukwongo ca; ci ibin bota iwi got malo, dok ipaa canduk me bao. 2Abicoyo ikom kidi ma apadanu lok mayam tye ikom kidi ma apada mukwongo mayam ityero woko ca, ci ibiketogi i canduk. 3Kitmeno apayo canduk ki bao yat okutu lalwii, ci amuku kidi ma apada aryo, apayo marom ki macon ca, ci aito malo iwi got kun amako kidi ma apada aryonu i cinga. 4Rwot ocoyo ikom kidinu macalo yam okwongo coyo, gin cik apar mayam oloko ki wun iwi got ki i dye mac inino mayam wucoke iye ca; ci Rwot omiyogi bota. 5Lacen aloke, alor piny ki iwi got, ci aketo kidi ma apada aryonu i canduk mayam apayoni; gin pud gitye ene, kit mayam Rwot ocika kwede. 61

(Jo Icrael gua ki i Beerot Benejaakan, guo Mocera. Ci Aron oto ki kunu, kiyike bene kunu; ci wode Eleajar oleyo katyene i tic me bedo ajwaka pa Lubanga. 7Gua ki kunu, guwoto guo i Gudgoda, ki nia ki i Gudgoda guo Jotibata, en aye lobo matye iye lwak nota ora ma igi ki pii. 82Ikare meno en aye Rwot ocako poko kaka pa Lulevi pat, wek gubed luting canduk me gicike pa Rwot, ki gucung inyim Rwot kun gitiyo bote, dok gulam gum i nyinge, nio wa inino man. 9En gin ma omiyo jo pa Levi pe gitye ki dul lobo mo nyo ginaleya mo ikin omegigi; Rwot aye ginaleyagi, kit macalo Rwot Lubangawu yam owaco botgi.) 103

Yam abedo iwi got macalo ikare mukwongo ca, abedo nino pyere angwen dyeceng ki dyewor; ci Rwot dok owinya ikare meno bene, omiyo Rwot oye pe me tyekowa woko. 11Lacen Rwot owaca ni, ‘A malo, imede ki wot kun itelo wi lwak, wek gudony, gucam lobo mayam akwongo pire bot kwarigi ni abimiyogi.’”

Gin ma Lubanga mito

12“Dong kombedi, wun jo Icrael, gin ma Rwot Lubangawu mito ki botwu en ene keken ni, wulwor Rwot Lubangawu ki cwinywu ducu ki tipuwu ducu, 13dok wugwok gin ducu ma en ociko ki cik mapatpat ma acikowu kwede tin wek dong wubed maber. 14Nen, Rwot Lubangawu aye rwot me polo, ki polo mamalo makato ducu, ki lobo ki jami matye ducu liweng. 15Ento kadi bed kumeno, Rwot oketo cwinye ikom kwariwu, omarogi, oyero likwayogi ma gulubugi, ma gin aye wun, ki ikin rok ducu macalo wa ikare man. 16Pieno, wubed jo ma gulire wa i cwinygi, pe wubed jo ma ngutgi tek. 174Pien Rwot Lubangawu aye Lubanga pa lubanga ducu ki Rwot pa rwodi. En Lubanga madit, matye ki tek, ma ryango kom dano; pe dworo kor dano mo, pe kiwilo ki lim. 18En ngolo kop pa lutino kic atir, ki pa mon to, dok maro lubedo bene, miyogi cam ki bongi. 19Wun bene myero wumar lubedo, pien yam wubedo lubedo i lobo Ejipt. 20Wulwor Rwot Lubangawu; wutii bote kun wumoko ikome matek, dok wukwong kwongwu ki nyinge keken. 21En aye ma myero wupake; en Lubangawu mayam otimo botwu tim man ducu madito ki ma ryango kom dano, ma wangwu dong onenoni. 225 Kwariwu yam gucito i Ejipt kun gin jo pyere abiro keken; ci tin Rwot Lubangawu dong omiyo wunya mapol macalo lwak lakalatwe me polo.”