Nwoyo Cik 11

Dit pa Lubanga

1“Mar Rwot Lubangani, lub cike ikare ducu, cik mapatpat ma oketo ki ongon me cike ki lok ma en ongolo ducu. 2Tin dong wutam, (pien pe atye kalok ki lutinowu mayam pe gingeyo dok ma pe guneno), wutam kit ma Rwot Lubangawu opwonyowu kwede pi tiro kitwu, wutam pi dite ki bade matek ki cinge ma oryeyoni, 31ki lwak lanyut ki tice ma otiyo i Ejipt ikom Parao rwot me Ejipt ki ikom lobone ducu. 4Wun wuneno2kit gin ma en otimo ikom mony pa jo Ejipt ki ikom aguraguragi ducu ki gadigadigi, ki kit mayam omiyo pii me Nam Makwar omwonyogi woko ikare ma giryemo korwuni, ki kit ma Rwot otyekogi woko kwede nio wa ikare man. 5Dok wutam gin mayam otimo ikomwu i tim nio ka wubino wuo i kabedo man. 63Wupo bene gin ma en otiyo ikom Datan ki Abiram ma awobe pa Eliab wod pa Reuben; ki kit mayam lobo ongamo kwede doge ci omwonyogi woko ki jo ma i odigi ducu ki kemagi ducu. 7Pien wutyeko neno ki wangwu tic madito ma Rwot yam otiyo ducu.”

Gum ma binen i lobo ma Rwot ocike pire

8“Wumak cika ducu ma acikowu kwede tini, wek wubed ki tek me cito i lobo ma wubicito loka ca kacamone obed mewu wek wucam. 9Ci wubirii pi kare malac i lobo mayam Rwot okwongo pire bot kwariwu, ni ebimiyogi wa ki likwayogi bene, en lobo ma miu ma ceko cam mabup. 10Pien lobo ma wubidonyo iye kacamoneni pe rom ki lobo Ejipt kama yam wua iyeni, kama yam wucoyo iye kodiwu ka dok wubaro wang piine kikomwu, macalo poto dek ma gicamo poteni. 11Ento lobo ma wucito loka ca kacamone me bedo mewu obedo lobo godi ki notagu, ma mato pii kot ma cwer a ki ipolo. 12Man aye lobo ma Rwot Lubangawu gwoko; wang Rwot Lubangawu bedo ikome nino ducu, nia i acaki mwaka nio wa i agiki mwaka ducu. 134

Ka wubilubu cika ducu ma acikowu kwede tin, ni wumar Rwot Lubangawu, wutii bote ki cwinywu ducu ki tipuwu ducu, 14ci en bimiyo kot cwer i lobowu i karene, i poto kot ki kot orogu, wek wubed ki nganowu ki kongo bwinowu ki moowu. 15Dok en bimiyowu lum i oletwu me cam pa lim makwo, miyo wubinongo, cam ma yengowu. 16Wugwoke wek pe kibwolwu, miyo wuloke: wubare woko, wutiyo bot lwak lubanga mukene, wuworogi bene, 17miyo kiniga mako Rwot ikomwu, ci gengo polo juku miyo kot pe cwer, miyo lobo pe ceko cam, ci wuto wutum woko oyotoyot ki i lobo maber ma Rwot bimiyowuni.

18Wubiketo lok magi ducu i cwinywu ki i tamwu; wubitweyogi i ngut cingwu obed me lanyut, dok gubed me atweya i dye tur nyimwu me poyo wiwu. 19Wupwony lutinowu ki lok magi, wubed kalok komgi ka wubedo i odiwu, ka wutye kawot i yoo, ka wubutu piny ki ka wua malo. 205Dok wuco lok magi i yat dogola odiwu, ki i dog gangwu, 21wek wun ki likwayowu wurii pi mwaka mapol i lobo mayam Rwot okwongo pire bot kwariwu ni ebimiyogi pi kare ducu ma polo pud bibedo malo ka wi lobo. 22Kace wubigwoke wek wulub cik man ducu ma atye ka cikowu kwedeni, kun wumaro Rwot Lubangawu, ma wulubu yone ducu, ma wucung ikome matek. 23Ci Rwot biryemo rok mukene woko ducu ki inyimwu, miyo wucamo lobo pa rok madito ki matego makatowu. 246Kabedo ducu ma tyenwu binyono bibedo mewu; ci lobo ma wubiloyo bibedo nia wa i tim nio wa i Lebanon, ki nia wa i kulu Euprate, nio wa i Nam Mediterranean ma tung kupotoceng. 25Pe tye dano mo ma bicung inyimwu; Rwot Lubangawu biketo lworo ki atiba pirwu ikom lobo ducu ma tyenwu binyonone, kit mayam ocikowu kwedeni.

26Nen, tin aketo inyimwu gum ki ceno dano: 27gum bibino kace wubilubu cik pa Rwot Lubangawu ma atye ka cikowu kwede tini. 28Ento ceno dano bibino kace pe wubilubu cik pa Rwot Lubangawu, ka wuloke kun wubare woko nia ki i yo ma acikowu kwede tini ci dok wulubu kor lubanga mukene mayam pe wungeyo. 297Ka Rwot Lubangawu dong okelowu i lobo ma wubicito iye kacamoneni, ci wubitucu gum ki ikom got Gerijim, ki acena ki ikom got Ebal. 30Godi man gitye loka Jordan, ma but piny tung kupotoceng, i lobo pa jo Kanaan ma gibedo i Araba, ma okemo Gilgal, ma kanget yadi kworo me More. 31Wubingolo Jordan, wukato loka ca kacamo lobo ma Rwot Lubangawu bimiyowu. Ka dong wucamo, ma wubedo iye, 32ci wugwoke wek wulub cik ki ongon me cike ducu ma dong aketo inyimwu tin.”