Nwoyo Cik 12

Kabedo acel keken me woro Lubanga

1“Magi aye cik ki ongon me cik ma wubimako matek kun wubilubugi i lobo ma Rwot Lubanga pa kwariwu bimiyowu obed mewu, pi kare ducu ma wubibedo iye iwi loboni. 2Wubibalo kabedo ducu liweng kama yam rok ducu ma wubigamo lobogi giworo iye lubangagi, ma gitye malo iwi godi mabocone ducu ki iwi cere ki iwang ayweya ma ite yadi ma potgi oluk. 31Wumuk keno jogigi woko ducu, wungid wir jogi meggi woko matinotino, wuwang yadi ma kicomo i ngom pi woro jok ma dako ma kilwongo Acera, wutong cal lubanga apayagi woko ducu, wunek nyingi woko ki i kabedogi. 4Pe wubiworo Rwot Lubangawu ikit yo ma jo Kanaan woro ki lubangagi. 5Ento wubipenyo Rwot Lubangawu pi kabedo ma en biyero ki ikin kakawu ducu pi keto iye nyinge wek obed kama kiwore iye. 6Kenyo aye wubicito iye, kenyo en aye wubitero iye gitum awanga ki gitum mewu ducu, ki dul acel me apar, ki gityer mapatpat ma wubimiyo, gityer me cobo kwong, ki gityer ma iwu opwoyo, ki lutino kayo pa dyangiwu ki pa romi ki dyegiwu. 7Wubicamone ki kunu inyim Rwot Lubangawu, ci cwinywu bibedo yom, wun ki jo ma i odiwu ducu, ikom gin ducu ma wubiketo iye cingwu, ma onongo Rwot Lubangawu omiyowu iye gum.

8Ka wuo kunu, ci pe wubitimo kit ma watye katimo kany i kareni, ma dano acel acel tye katiyo gin ducu ma en tamo ni tye atir i wange; 9pien peya wuo ikabedo me yweyowu, i lobo ma wubileyo, ma Rwot Lubangawu bimiyowu. 10Ento ka dong wukato loka Jordan, ma wubedo i lobo ma Rwot Lubanga bimiyo me aleyawu, ka dong omiyo wuywe ki i lweny ikom lumerokwu ma gurumuwu dyereni, ci dong wubibedo ma piny okwe mot. 11Rwot Lubangawu biyero kabedo kama en biketo iye nyinge bedo iye; kenyo en aye wubikelo iye gin ducu ma acikowuni: gitum awangawu, gitum mukene ducu, dul acel me apar, gityer mapatpat ma wubimiyo, ki gityer me cobo kwong ducu ma wukwongo me miyogi bot Rwot. 12Ci cwinywu bibedo yom inyim Rwot, wun ki awobewu ki anyirawu, opiiwu ki angecawu ducu, ki Lulevi matye i taunwu, pien gin Lulevi pe kibipoko ki gin dul lobo mo nyo kabedo mo ikinwu me aleyagi. 13Wugwoke wek pe wutyer gitum awangawu i kabedo mo keken ma wubineno. 14Ento wubityerone ki i kabedo ma Rwot biyero ki i kakawu mo acel. Wubityero gitum awangawu ducu kunu, dok wubitiyo gin ducu ma acikowuni ki kunu.

15Ento wutwero neko lee me acamawu ki i taunwu ducu kit ma cwinywu mito, ma oporo gum ma Rwot Lubangawu omiyowu. Dano ma kome ki keni twero camo, ki dano ma olony, macalo kicamo ringo abur nyo til. 162Remone keken aye pe wubicamo; wubionyo woko piny i ngom, macalo pii.

17Pe myero wucam dul acel me apar me nganowu, nyo me kongo bwinowu nyo me moo jeituniwu ki i gangiwu, kadi lutino kayo pa dyangiwu nyo pa romi ki dyegiwu, nyo gityer me cobo kwongwu ma wukwongo, nyo gityer mewu ma cwinywu opwoyo, nyo gityer mo ma wumiyo. 18Ento wubicamo ki inyim Rwot Lubangawu i kabedo ma en biyero, wun ki lutinowu, opiiwu, angecawu, ki Lulevi ma igangwu; dok cwinywu bibedo yom inyim Rwot Lubangawu pi gin ducu ma wubiketo iye cingwu. 19Wugwoke pe wubwot Lulevi ata ikare ducu ma wubedo i lobowuni.

20Ka Rwot Lubangawu dong oyabo wang lobowu obedo malac, kit mayam ocike kwede botwu, ce iwaco ni, ‘Abicamo ringo,’ pien onongo itye ki miti iye, ci itwero camo ringo kit ma cwinyi mito. 21Kace kabedo ma Rwot Lubangawu biyero me keto iye nyinge tye kamabor ki kama ityeni, ci itwero neko dyangi nyo romoni ma Rwot omiyo boti, macalo dong acikowu; itwero camo ki i gangi kit ma cwinyi mito. 22Itwero camone kit ma kicamo ringo abur ki til; kadi wa dano ma kome ki keni twero camone kacel ki dano ma olonye. 233Cung matek ilok man keken ni, pe icam remone, pien remo en aye kwo; pieno pe ibicamo kwo kacel ki ringone. 24Pe ibicamo remo, ento ibionyo woko i ngom macalo pii. 25Kace ibilubu cik man, ci nyimi bibedo leng, in kacel ki lutinoni ma bilubi. 26Ento jamini maleng ducu ma myero imii, ki gityer me cobo kwong, ibikwanyo icito kwede ikabedo ma Rwot biyero. 27Ibityero gitum awangani ducu, ringone ki remone, iwi keno tyer pa Rwot Lubangani; remo me gitumi ducu kibionyo woko ikom keno tyer pa Rwot Lubangani, ento ringone ibicamo. 28Wugwoke wek wulub lok magi ducu ma acikowu kwedeni, wek nyimwu obed leng nakanaka, wun ki likwayowu ma bilubuwu, kace wutiyo gin manen maber ki ma atir iwang Rwot Lubangawu.”

Juk ikom woro jogi

29“Ka Rwot Lubangawu dong otyeko lurok woko ki inyimwu ma wucito kacamo lobogini, ma dong wucamo lobogi, wubedo iye, 30myero wugwoke wek pe wumok i owic pi lubu kitgi, ikare ma dong kityekogi woko ki inyimwu. Dok pe wubed kapenyo lok ikom lubangagi, kun wuwaco ni, ‘Rok man yam giworo lubangagi ningning, wek wan bene waworgi kitmeno?’ 31Pe wubitimo kumeno ikom Rwot Lubangawu, pien gibedo katimo gin me kwer ducu ma Rwot dagi pi woro lwak lubangagi; giwango wa awobegi ki anyiragi ki mac macalo gitum me woro lubangagi. 324

Gin ducu ma acikowu kwede myero wugwoke kalubune; pe wubimedo wiye dok pe wubikwanyo mogo woko.”