Nwoyo Cik 13

1“Kace lanebi mo onen ikinwu, nyo lalek lek mo miyowu lanyut nyo tango mo, 2kace lanyut nyo tango ma otito pireni otime kakare, ce en owaco ni, ‘Wek dong walub kor lubanga mukene’ (mayam pe wungeyo) ‘wek wacak worogi,’ 3pe wuwiny dog lanebi nyo lalek meno. Pien nongo Rwot Lubangawu tye katemo cwinywu wek enge ka wumaro en ki cwinywu ducu ki tipuwu ducu. 4Wulub kor Rwot Lubangawu kun wulworo en dok wugwoko cike ducu; wuwor doge, wutii bote kun wucung ikome matek. 5Ento wubineko lanebi nyo lalek meno woko, pien opwonyo dano ki jemo ikom Rwot Lubangawu, mayam okwanyowu dok okokowu woko ki i ot me opii i lobo Ejipt, wek pe omii wuwek yo mayam Rwot Lubangawu ociko ni wulubi. Kitmeno miyo wubijwero gin marac woko ki ikinwu.

6Kace omeru mo ma wod pa meni, nyo wodi, nyo nyari, nyo dakoni kikome, nyo laremi ma imaro ki kwoni ducu, obiti imung kun waco boti ni, ‘Wek wacit ka woro lubanga mogo mukene,’ ma nongo in kikomi nyo kwariwu yam pe gungeyo, 7lubanga pa rok ma gurumuwu dyereni, kadi ma gitye kamacok kwedwu nyo gitye kamabor, nia i agiki lobo tung cel cito kwede i agikine tung cel, 8pe iye doge, pe iwiny loke, pe kica omaki ikome, pe imung loke; 9ento ibineke woko. Cingi aye bikwongo poto ikome me neke, lacen cing lwak ducu bipoto ikome. 10Ibicele ki got ineke woko, pien obedo kayenyo yo me kwanyi woko ki bot Rwot Lubangawu mayam okwanyowu woko ki i lobo Ejipt, ki i ot me opii. 11Ci jo Icrael ducu gibiwinyo pire, ci gibilworo, miyo pe gibinwoyo timo bal marac macalo meno ikinwu.

12Gwok nyo i gang mo ma Rwot Lubangawu bimiyowu me bedo iye wubiwinyo ni 13jo mogo ma kitgi racu, ma gin jowu kikome, guywayo tam pa jo ma bedo i gang meno kun giwaco ni, ‘Wubin wacitu ka woro lubanga mukene,’ mayam pe wungeyo. 14Ci omyero wupeny loke kun wuyenyo tere motmot; kace onen ni loke otime ada, ma kimokoni lok me kwer macalo meno otime ikinwu, 15ci wubineko jo ma gibedo i taun meno woko ki pala lucwan, wubijwerogi woko ducu liweng, jo ducu matye iye, ki lim makwo bene matye iye, myero gutum woko ki pala lucwan. 16Wubicoko jami ma wuyakoni ducu, wugurugi idyekal kamaleng, ci wubiwango taun meno ki jami ducu matye iye woko ki mac, obed gitum ma kiwango ducu ki bere bot Rwot Lubangawu. Taun meno bibedo wi odur matwal; pe dok kibigerone odoco. 17Gin mo ma kidyero bot Rwot pe wubiweko dong i cingwu, wek Rwot okwany kinigane mager tutwali woko. En bitimowu kica kun nyutu cwiny me kica ikomwu, ci miyo wunya mapol kit mayam okwongo kwede bot kwariwuni, 18kace wuworo dog Rwot Lubangawu, wumako cike ducu ma acikowu kwede tini dok wutiyo gin manen atir i wange.”