Nwoyo Cik 14

Kigengo jo Icrael kalubu kit kwero cola pa lurok

11

“Wun aye lutino pa Rwot Lubangawu. Pe wubingolo komwu kenwu nyo lyelo tur nyimwu pi kwero cola. 22Pien wun aye jo maleng pa Rwot Lubangawu; en Rwot aye yam oyerowu ki ikin rok ducu matye iwi lobo wek wubed jone kikome.”

Lee ma kicamo ki ma kikwero

(Lev 11:1-47)

3“Pe wubicamo gin mo me kwer. 4Magi aye gin lee ma wutwero camogi: dyang, romo, dyel, 5til, abur, ruda, dyel me tim, jubi, pura, ki romo ma i godi. 6Lee ducu ma obong tyen gi akara, ma kin tyen gi opoke aryo, ma nyamo omen ki ikin lee ducu wutwero camogi. 7Ento lee ma nyamo omen nyo ma obong tyen gi akara ma pe wubicamo gin ene; kinaga, apwoyo ki oduka, gin ginyamo omen ento kin tyen gi pe akara; pimeno gibedo keni botwu. 8Ki opego bene, pien kadi obong tyene akara ento pe nyamo omen, en bene bedo keni botwu. Pe wucam ringogi, pe wugud wa komgi ma oto bene.

9Magi aye wutwero camogi ki ikin gin ducu ma bedo i pii: gin ducu matye ki kinga ngegi ki pok komgi wutwero camogi; 10ento gin ma pe ki kinga ngegi ki pok komgi pe wubicamogi, pien gibedo keni botwu.

11Wutwero camo winyo ma pe keni ducu, 12ento magi aye pe wubicamogi: ocur, acut, koga, 13agoga, okwata ki kit kwayigi ducu; 14agak ki kit kwayigi ducu; 15udu, tepe, awewet, olwit ki kit kwayigi ducu; 16tula matino ki tula madongo, lagweno kulu, 17kikung ki ocur madito ki alwinya, 18acebe ki ogoro ki kit kwayigi ducu; ki putput ki olik.

19Kwidi ducu ma bwomgi tye gibedo keni botwu; pe wubicamogi. 20Gin ducu ma bwomgi tye ma pe keni, wutwero camogi. 213

Pe wubicamo geng lee mo ma oto kene; wutwero miyo bot labedo mo ma bedo ikinwu, wek en aye ocam, nyo wutwero cato bot larok mo owil; pien wun aye rok maleng pa Rwot Lubangawu.

Pe wuted ringo latin dyel ki cak pa mine.

Cik ma mako dul acel me apar

224

Wubimiyo dul acel me apar me jami ma wuceko i poto, ma a i poto mwaka ki mwaka. 23Dok wubicamo dul acel me apar me nganowu ki inyim Rwot Lubangawu ikabedo kama en biyero ci keto nyinge bedo iye, ki dul acel me apar me kongo bwinowu ki moowu, ki lutino kayo pa dyangiwu ki pa romi ki dyegiwu; wek wupwony lworo Rwot Lubangawu jwijwi. 24Kace wutye kamabor tutwal mamiyo pe wutwero kelo dul acel me apar ikare ma Rwot omiyowu iye gummi, pien kabedo ma Rwot oyero me keto iye nyinge odoko bor kwedwu, 25ci wubicato woko wek wunong cente, ci wutweyo lim meno wucito kwede ikabedo ma Rwot Lubangawu oyeroni. 26Wubitic ki lim meno pi kit gin ducu ma cwinywu mito, macalo me wilo twoni, nyo romo nyo kongo bwino nyo kongo makec, ki gin ducu ma cwinywu mito, ci wubicamo ki kunu ki yomcwiny inyim Rwot Lubangawu, in ki jo ma i odi ducu. 27Dok pe wubitenyo Lulevi ma gitye i taunwu ata, pien pe kipoko ki gin dul lobo mo nyo gin mo me aleyagi kacel kwedwu.

28I agiki mwaka adekadek wubikelo iye dul acel me apar me gin ducu ma wuceko i mwakanu, ma wukano i taunwu madito. 29Ci Lulevi ma pe ki dul lobo mo ma gileyo ikinwu, lubedo, lutino kic, ki mon to ma i taunwu ducu, gin ducu gibibino kacam kwedwu ci giyeng; wek Rwot Lubangawu omiwu gum ikom gin ducu ma cingwu tiyo.”