Nwoyo Cik 15

Cik me weko banya matwal

(Lev 25:1-7)

1“I agiki mwaka abiroabiro wubiweko banya bot dano matwal. 2Man aye kit me weko banya: lami banya biweko banya me lim matwal ki bot dano mayam omako banyaneni; pe bipido banya ma omiyo bot lawote matwal, pien dong kityeko tito ki dano pi weko banya matwal kit ma Rwot ocikoni. 3Itwero pido larok ocul banyani; ento kwany cwinyi woko ikom banya ma Laicrael lawoti omako boti. 4Ento lacan mo pe dong bibedo ikinwu, pien Rwot bimiyowu gum i lobo ma Rwot Lubangawu bimiyowu ni wucam me aleyawu matwal, 5kace wubiworo dog Rwot Lubangawu kun wugwoke wek wulub cike ducu ma acikowu kwede tin. 6Rwot Lubangawu bimiyowu gum kit mayam ocike kwede botwuni. Wubimiyo rok mapol mako banya botwu, ento wun pe wubimako banya mo; dok wubiloyo rok mapol, ento gin pe gibiloyowu 71

Ka tye dano mo ma lacan ikinwu, ikin omegiwu ma gitye i taun mo ma Rwot Lubangawu bimiyowu, pe cwinywu obed tek, pe ikwer miye kony ikom ominwu meno ma lacani. 8Ento ikonye, imiye omak banya maromo cobo gin ma en mito ducu, kadi bed gin ango.

9Ber igwoke wek tam marac mo pe obed i cwinyi mamiyo iwaco ni, ‘Mwaka me abiro, ma en aye mwaka me weko banya matwal, dong cok,’ ci wangi cido woko ikom omeru ma lacani miyo pe dong imiye gin mo. Meno miyo en cako kok ikomi inyim Rwot, ci doko bal ikomi. 10Ka imiye gin mo, ber imiye ma cwinyi leng matwal, cwinyi pe owang pi gin ma imiyeni, pien Rwot Lubangani bimiyowu gum ikom tic ducu ma itiyo, ki ikom tic cingi ducu. 112Lucan pe gibitum woko i lobowu, ma omiyo acikowu ni, wubiyabo cingwu malac bot omegiwu ki jo ma piny oloyogi, ki bot lucan ma i lobowu.”

Kit me tic ki opii

(Nia 21:1-11)

123

“Kace kicato omeru mo boti, laco ma Laibru nyo dako ma Laibru, ci i wilo obed opiini nyo angecani, en bitiyo tic boti pi mwaka abicel. I mwaka me abirone ibiweko en a woko ki boti cito gire ki kuc. 13Ka igonye wek ociti, pe ibiweko en cito ki cinge nono. 14Ibimiyo en cito ki jami mapolpol, romi ki dyegi, bel ki kongo bwino, malubu kit ma Rwot Lubangani omiyi kwede gum. 15Po ni yam ibedo opii i lobo Ejipt, kama Rwot Lubangani okoki ki iye; en gin ma omiyo tin aciki kumeno. 16Ento ka en owaco ni, ‘An pe abia woko ki boti,’ pien en mari ki jo ma i odi ducu, pien obedo kwedwu maber, 17ci ibikwanyo atero, ibitucu ki ite i dogola, ci dong bibedo opiini matwal. Ki angecani bene ibitimo kitmeno. 18Pe ibitamo ni tek tutwal me weke a woko ki boti, pien obedo katic boti pi mwaka abicel kulu kun tice dodo tic pa lapakaca kiryo pi wel manok mo. Ka itimo kitmeno, Rwot Lubangani bimiyi gum i tic ducu ma itiyo.”

Kwero lutino kayo me lim makwo

194

“Lutino kayo ducu ma kinywalogi ikin dyangini nyo romi ki dyegini ibikwero komgi inyim Rwot Lubangani. Pe ibitiyo tic mo ki lutino kayo pa dyangini, pe ibingolo yer kom lutino, kayo pa romini. 20Ibicamo ringone kacel ki jo ma i odi, inyim Rwot Lubangani mwaka ki mwaka ki ikabedo ma Rwot biyero. 21Ento ka kome kimwonyo, katyene ongol, nyo wange oto, nyo tye ki kit mwonyo mo marac ikome, pe ibitumu bot Rwot Lubangani. 22Wubicamo ki igangwu ki kunu; dano ma kome ki keni twero camo kacel ki dano ma olony, macalo ringo abur ki til. 235Remone keken aye pe wubicamo; wubionyo woko piny i ngom macalo pii.”