Nwoyo Cik 16

Karama me Kato

(Nia 12:1-20)

11

“Wugwok dwe me Abib, wukwer iye nino madit me Karama me Kato pi woro Rwot Lubangawu, pien i dwe me Abib yam Rwot Lubangawu okwanyowu iye woko ki i Ejipt i dyewor. 2Wubikwanyo gitum me Karama me Kato ki ikin romiwu nyo ikin dyangiwu, wutumu bot Rwot ikabedo ma en biyero, kama en biketo nyinge bedo iye. 3Pe wubicamo mugati ma kirubu iye tobi; ento wubicamo Mugati ma Tobi Pe iye pi nino abiro pi po pi atwom mayam wubedo kwede; pien yam wua ki i lobo Ejipt rucurucu; ma omiyo ibipo pi nino mayam wua kwede ki i lobo Ejipt pi kare me kwowu ducu. 4Tobi mo pe myero onen botwu i lobowu ducu pi nino abiro; kadi wa ringo mo ma ityero me gitum wi otyeno inino mukwongone pe bidong nio wa odiko. 5Pe wubityero gitum me Karama me Kato ki i gang mo ma ikin gangiwu ma Rwot Lubangawu bimiyowu; 6ento wubityero ki ikabedo ma Rwot Lubangawu biyero, kama en biketo nyinge bedo iye. Wubityero gitum me Kato kunu wi otyeno ma ceng cito ka potoni, icawa mayam wua kwede ki i Ejipt. 7Wubitedo ci wubicamo i kabedo ma Rwot Lubangawu biyero; ci odiko wubia wudok ikemawu. 8Wubicamo Mugati ma Tobi Pe iye pi nino abicel; ikom nino me abirone wubibedo iye ki coke madit pi woro Rwot Lubangawu; pe wubitiyo iye tic mo.”

Nino madit me kwero kac

(Nia 34:22; Lev 23:15-21)

92

“Wubikwano cabit abiro cake ki ikare ma wukwongo keto iye pala kac i ngut ngano mucung i poto. 10Ka dok wubibedo ki nino madit me kwero Karama me Kac inyim Rwot Lubangawu kun wumiyo gityer ma iwu opwoyo; wubimiyo ma oporo gum ma Rwot Lubangawu omiyowu. 11Ibibedo ki yomcwiny inyim Rwot Lubangawu, in ki lutinoni, opiini, angecani, Lulevi ma gibedo igangwu, ki lubedo, lutino kic ki mon to matye ikinwu, ki ikabedo ma Rwot Lubangawu biyero, kama en biketo iye nyinge bedo iye. 12Wupo ni yam wubedo opii i Ejipt, ci wubigwoko cik magi ducu matek.”

Nino madito me Bolo

(Lev 23:33-43)

133

“Wubikwero nino madito me Bolo pi nino abiro, ikare ma dong wukayo cam ducu wudino woko wutero paco, kacel ki pig olok ma dong wupwono wubiyo woko. 14Wubibedo ki yomcwiny ka wukwero nino maditoni, in ki lutinoni, opiini, angecani, kacel ki Lulevi ki lubedo, lutino kic ki mon to ma gibedo i taunwu. 15Wubikwero kare man pi nino abiro inyim Rwot Lubangawu ki i kabedo ma en biyero; pien Rwot Lubangawu bimiyowu gum i cam ducu ma wuceko ki ikom tic me cingwu ducu, mamiyo wubibedo ki yomcwiny keken.

16Co ducu ma ikinwu myero gubin inyim Rwot Lubangawu tyen adek i mwaka acel acel ki i kabedo ma en biyero: inino madito me Mugati ma Tobi pe iye, inino madit me kwero cabit abiro, ki inino madito me Bolo. Pe gubin inyim Rwot ki cinggi nono; 17dano acel acel bimiyo mot macalo en twero ma oporo kit gum ma Rwot Lubangawu omiye.”

Tic pa lungolkop

18“Wubiketo lungolkop ki ludito i taunwu ducu ma Rwot Lubangawu bimiyowu, ma oporo kakawu; gin omyero gungol kop ma atir ki lwak. 194Pe wubal te pido pa dano ma loke tye atir; pe wuket apokapoka mo ikin dano; pe wuye ki wilwu ki lim mo, pien wilo dano ki lim miyo laryeko doko lawange oto ci balo te pido pa jo ma lokgi tye atir woko. 20Wungol kop atir keken, wek wubed makwo, wek wule lobo ma Rwot Lubangawu bimiyowu.”

Woro lubanga mukene

215

“Ikare ma wubicano keno tyer pi Rwot Lubangawu, pe wubipito yat mo pi woro jok ma dako ma kilwongo Acera. 226Dok pe wubicibo wir got mo cung me awora; meno aye gin ma Rwot Lubangawu okwero matek.”