Nwoyo Cik 17

1“Pe wubitumu bot Rwot Lubangawu twon nyo romo nyo dyel mo ma kome kimwonyo, nyo matye ki kit ngolo mo, pien meno aye bedo me kwer bot Rwot Lubangawu.

2Gwok nyo kibinongo dano mo i taunwu mo i lobo ma Rwot Lubangawu bimiyowu, laco nyo dako, ma otimo gin manen marac iwang Rwot Lubangawu pi turu gicikene, 31ce ocito ka woro lwak lubanga mukene, nyo ceng nyo dwe nyo gin mo ma ikin mony me polo ce oryebe piny inyimgi, ma en aye gin maturu gicike matye i Cik apar ma Rwot ociko ni pe omyero kitim. 4Ka dong kitito loke botwu ci wubikwedo loke maber. Kace loke tye ada ma ngene atir ni gin me kwer macalo meno otime i Icrael, 5ci wubikelo laco meno nyo dako meno ma otimo bal maraci i dog gang, ci wubicelo ki got wuneko woko. 62Dano meno kibineko pi lok pa lucaden aryo nyo adek; dano mo pe kibineko pi lok pa lacaden acel keken. 73Dok cing lucaden aye bikwongo poto ikom dano meno me neke, ka lacen cing lwak bipoto ikome. Kitmeno miyo wubijwero gin marac woko ki ikinwu.”

Pido inyim ajwaki ki lungolkop

8“Kace pido mo onen ikinwu ma ngolone oloyowu, macalo poko kin kit nek mapatpat, nyo lok kom twer ma dano moni tye kwede inyim cik, nyo lok kom ret ma dano mo oketo ikom lawote, kit pido mo matwero nen i taunwu ma ngolone tek loyowu, ci wubia wucito i kabedo ma Rwot Lubangawu oyeroni. 9Wubicito bot ajwaki ma Lulevi, ki bot langolkop matye katic ikare meno, wubipenyogi ci gibititowu kit ngole. 10Wubilubu kit ma kitito botwu i kabedo ma Rwot biyero; wubigwoke wek wutii kit gin ducu ma kicikowu kwede. 11Wubitiyo kun wulubu kit cik ducu ma kipwonyowu kwede, ma oporo kit ngol ma gin gungolo. Pe wubikwero lubu lok ma gin gungolo, ento wubilubu kun pe wungak woko tung acuc nyo tung acam. 12Dano ma lanywar ma okwero woro dog ajwaka ma ocung katic inyim Rwot Lubangawu, nyo dog langolkop kibineke woko; kitmeno miyo wubijwero gin marac woko ki ikinwu. 13Lwak ducu gibiwinyo pire, ci miyogi lworo, miyo ngat mo pe dok bitimo tim anywar macalo meno.”

Cik ma mako kom rwot

144

“Ka dong wuo i lobo ma Rwot Lubangawu bimiyowu, ma dong wucamo wubedo iye, gwok nyo wubiwaco ni, ‘Waket rwot me loyowa, kit ma rok ducu ma gurumuwa tye kwedeni.’ 15Dong ka wuketo rwot ma loyowu myero wunen ni obedo dano ma Rwot Lubangawu oyero. Myero obed ngat mo ikin utmegiwu; pe wuket larok olowu ma pe rokwu kikome. 165En pe obed kacoko lwak aguragura pire kene, pe omii lwak odok cen i Ejipt pi wilo aguragura, pien Rwot yam owaco botwu ni, ‘Pe wubidok cen kunu matwal.’ 176Pe onyom mon mapol, miyo ngako cwinye woko; pe bene ocok lonyo madwong pire kene.

18Ka dong obedo iwi komkere, ci bicoyo lok me cik man ducu i buk kun kwanyo loke ki i buk ma ajwaki ma Lulevi gwokoni. 19En bibedo kwede ci bedo kakwanone pi kare me kwone ducu, wek opwony lworo Rwot Lubangane pi gwoko lok ducu matye i cik man ki lubu gin ducu ma Rwot ociko, 20wek pe obed kawake i cwinye ni edit ekato omegine, dok pe ongak owek cik woko, pe omyero otur cik pa Lubanga i yo mo keken, wek omede kibedo i kere nakanaka, en kacel ki likwaye i Icrael.”