Nwoyo Cik 18

Wang wat pa ajwaki

1“Ajwaki ma Lulevi, wa kaka pa jo Levi ducu, pe gibilimo dul lobo mo nyo ginaleya mo ikin jo Icrael. Gin bicamo gityer ma kiwango ki mac bot Rwot ki gin ducu ma myero dano gumii bot Rwot. 21Gin pe bileyo dul lobo mo ikin utmegigi, pien Rwot aye ginaleyagi kit mayam ocikogi kwede. 3Man aye bibedo wang wat pa ajwaki ma lwak bimiyo botgi: jo ma gityero gitum, kadi bibedo twon nyo romo, gibimiyo ringo bat bot ajwaka, ki cwake aryo ki apika. 4Ngano ki kongo bwino ki moo mewu me wi mwaka, ki yer romo ma kikwongo nyarone, wubimiyo bot ajwaka. 5Pien Rwot Lubangawu yam oyero jo Levi ki ikin kakawu ducu wek gucung katic inyim Rwot, gin ki likwayogi matwal.

6Kace Lalevi mo oa ki i taunwu mo ma i lobo Icrael ducu, kama yam en bedo iye, ci bino i kabedo ma Rwot biyero, en twero bino kit ma cwinye mito, 7ci bitic i nying Rwot Lubangane macalo Lulevi luwote ducu ma gicung katic kunu inyim Rwot. 8En binongo wang wat me acamane ducu marom ki luwote, medo ki lim ma en nongo ki i jami pa kwarone ma kicato.”

Cik ma juku lubu kit tim pa lurok

9“Ka dong wuo i lobo ma Rwot Lubangawu bimiyowu, pe wubipwonyo lubu kit tim me kwer pa lurok ma kunu. 102Pe kinong ngat mo ikinwu ma owango wode nyo nyare me gityer, nyo dano mo ma odoko latyet, nyo latyet ki ajaa, langii i dyel, latal, 113lakot piny, lakor tipu, min jok nyo lapeny dog tipu pa lato. 12Ka dano mo timo gin ma kitmeno ci en bedo me kwer bot Rwot; pien pi timo gin me kwer ma kitmeno aye omiyo Rwot Lubangawu tye karyemo rok magi ducu woko ki inyimwu. 134Wun omyero wulub lok pa Rwot Lubangawu. 14Rok magi ducu ma wubicamo lobogini giwinyo dog lutyet ki ajaa ki lutyet mukene ducu, ento wun aye Rwot Lubangawu pe ye ni wutim kitmeno.”

Lubanga ociko pi cwalo lanebi macalo Moses

155

“Rwot Lubangawu bicwalo lanebi mo macalo an, ma a ki ikin utmegiwu; wubiwinyo en. 16Inino mayam wucoke iye i Koreb wubako dogwu bot Rwot Lubangawu kun wuwaco ni, ‘Pe omyero wawinyo dwon Rwot Lubangawa, nyo neno kom mac maditi, wek pe wato.’ 17Ci Rwot owaco bota ni, ‘Gin ma gulokoni ducu guloko maber. 18Abicwalo botgi lanebi mo macalo in ma oa ki ikin utmegigi. Abiketo lok ma mera idoge, ci en biwaco bot lwak lok ducu ma abicike kwede. 196Kace dano mo okwero winyo loka ma en biwacone i nyinga, ci an aye abipenyo dog danoni wek aket can ikome. 20Ento ka lanebi mo ocore ki wiye kawaco lok mo i nyinga ma onongo pe an aye acike ni oloki, nyo maloko i nying lubanga mukene, ci omyero wunek lanebi meno woko.’ 21Kace i loko ki i cwinyi ni, ‘Wabingeyo lok ma Rwot pe owaco ningning mono?’ 22Ci agamo kit man ni, ‘Kace lanebi mo oloko i nying Rwot ce lokenu pe otime nyo pe obedo me ada, meno nyutu ni loke pe Rwot aye owaco.’ Lanebi meno ocore ki wiye kene ki loke gire, pieno pe myero wubed kalwore.”