Nwoyo Cik 19

Taun madito me laro kwo pa lunek dano

(Wel 35:9-28; Yoc 20:1-9)

1“Ikare ma Rwot Lubangawu dong otyeko lurok woko ma en bimiyo lobogi botwu, ma dong wucamo lobogi ci wubedo i taun gi ki i odigi ducu, 2ci wubipoko taun adek woko pat i lobo ma Rwot Lubanga dong omiyowu me bedo mewu. 3Wubipimo lobo ma Rwot Lubangawu bimiyowu ci wubipoko i dul adek kun dul acel acel bedo ki taune macok kwede wek okony ngat ma oneko dano me ringo iye wek olar iye kome.

4Man aye lok me konyo kom lanek dano. Ka dano mo pe oneko lawote akaka, mayam mone mo onongo peke ikin gi, myero en oring kunu wek olar kome. 5Labolle, ka dano mo ocito i bunga ki lawote mo ka tongo yen, ce otingo latong me tongo yen, ce latong oput woko ki i pure, ci ocelo lawote oneko woko, en omyero oring olar kome i taun mo acel ma ikin taun madito meno. 6Ka pe kumeno, ce kiniga olyeti ikom lacul kwor remo miyo biryemo kor lanek, mako woko i yo, pien nongo piny bor, ci cobo neko woko. Ento dano macalo meno pe romo aneka, pien pe onongo mone mo tye ikin gi ikare macon, 7en gin ma omiyo acikowu pi poko taun madito adek pat. 8Ikare ma Rwot Lubangawu oyabo wang lobowu omedo malac kit mayam okwongo kwede bot kwarowu, ma dong ominiwu lobo ducu mayam ociko ni ebimiyo bot kwariwu, 9dok kace wubigwoko cik man ducu ma acikowu kwede tin, ni wumar Rwot Lubangawu, wulub yone ducu ikare ducu, ci dok wubimedo taun madito mukene adek ikom maca. 10Kitmeno pe kibionyo remo pa dano mo ma pe ki bal i lobo ma Rwot Lubangawu bimiyowu me aleyawu, ci miyo alii me to pe bedo iwiwu.

11Ento ka dano mo iye dag lawote, ce obutu okure i yo, ci olwenyo ikome, ocobo omedo ki neko woko, ka laco meno oringo olaro i taun mo ikin taun madito adeki, 12ci ludongo me tung pa laneki gibicwalo dano giome ki kunu, kimiye i cing lacul kwor remo, wek kineke woko. 13Kica pe bimakowu ikome, ento myero wulwok alii me to pa dano ma pe ki bal woko ki i Icrael kitmeno, wek ariya mo obed pe inyimwu.”

Wang lobo ma ludongo gupoko

141

“Pe ibikobo got ma poko wang lobo pa lawoti mayam ludongo gutyeko pokone ki i lobo ma ibileyo bot kwarowu i lobo ma Rwot Lubangawu bimiyowu me bedo mewu.”

Cik ma mako lucaden

152

“Lacaden acel pe miyo pido loyo dano mo pi kit bal mo nyo kit tim marac mo ma onongo otimo; ento kop biloyo dano pi lok pa lucaden aryo nyo adek. 16Kace lacaden ma lagoba odoto dano moni ma otimo bal, 17ci gin lupido aryo ducu gibicito inyim Rwot, ki inyim ajwaki pa Lubanga ki lungolkop ma gitye i dog tic ikare meno. 18Lungolkop bipenyo loke mot. Kace lacaden ma lagoba otongo adot ikom omine 19ci kibiketo can ikome marom ki can ma nene en mito ni kiket ikom omineni. Kitmeno miyo wubijwero tim marac woko ki ikinwu. 20Miyo jo mukene gibiwinyone ci gibilworo, miyo ngat mo pe dok bitimo tim marac macalo meno. 213Kica pe bimakowu ikome; kwo kibiculu ki kwo, wang ki wang, lak ki lak, bad ki bad, tyen ki tyen.”