Nwoyo Cik 20

Cik ma mako mony

1“Ikare ma wubicito ka monyo lumerokwu, kace wuneno gin tye ki lwak aguragura ki gadigadi lweny, dok monygi bene dit makato mewu, pe wubed ki lworo ikomgi, pien Rwot Lubangawu bibedo kwedwu, en mayam okwanyowu woko ki i lobo Ejipt. 2Ka dong wurwayo cok kalweny, ci ajwaka pa Lubanga bikato anyim kalok ki buca monywu. 3En biwaco botgi ni, ‘Wun jo Icrael wuwiny, tin dong wurwayo cok kalweny ikom lumerokwu. Cwinywu pe oryange, pe wulwor, komwu pe omyel, atiba pe omakwu ikomgi; 4pien Rwot Lubangawu aye bicito kwedwu kalweny pirwu ikom lumerokwu ci bimiyo wuloyogi.’

5Lacen ludito mony gibilok ki dano kun giwaco ni, ‘Tye laco mo kany ma ogero ode ci peya okwero me donyo iye? Wek en odok cen paco, wek pe oto i lweny ci miyo dano mukene aye dok bikwero ode. 6Tye laco mo kany ma opito poto oloke ci peya ocamo nyige? Wek en odok paco, wek pe oto i lweny ci miyo ngat mukene aye camo nyig oloke. 7Tye laco mo kany ma otongo keny ikom dako ci peya obedo kwede? Wek en odok paco, wek pe oto i lweny ci miyo laco mukene aye bedo ki dakone.’ 8Ludito mony dok gibimede ki lokgi bot lwak kun giwaco ni, ‘Tye laco mo kany ma lalworo ma kome oryange woko? Wek en odok woko paco, pien bimiyo jo mukene cwinygi ryange woko macalo en.’ 9Ka dong ludito gutyeko lokgi bot lwak, ci dong gibiyero lutel wi mony.

10Ikare ma wurwayo cok kalweny ikom taun madit mo, kong wumii ki jo ma iye kare me mine ken gi botwu ka gimito kuc wek pe wulweny ikomgi. 11Ka jo me taun madit meno guyabo dog celgi botwu, ce gumine botwu ken gi ki kuc, ci jo ducu ma binonge iye wubidiyogi ki tic wek gubed macalo opiiwu. 12Ento ka gukwero jolo lokwu me kuc, ce gucako lweny ikomwu, ci monywu birumu taun meno ci wubituru celgi woko. 13Ka Rwot Lubangawu omiyogi i cingwu, ci wubineko co ducu ki pala lucwan, 14ento mon ki lutino matino ducu ki limgi makwo, ki jami ma i taungu ducu bibedo me ayakawu, wubiyako wuterogi bedo mewu, ci wutwero tic ki jami ma wuyako ki bot lumerokwu, ma Rwot Lubangawu omiyo botwu. 15Wubitimo taun madito ducu matye kamabor kwedwu kitmeno, ento pe wubitimo man ikom taun madito pa lurok ma gibedo cok kwedwu.

16Ento taun madito pa rok magi ma Rwot Lubangawu bimiyo lobogi botwu me bedo mewuni, pe wubiweko gin mo dong iye makwo. 17Wubijwerogi woko ducu liweng, gin aye jo Kit, jo Amor, jo Kanaan, jo Periji, jo Kiv ki jo Jebuc, macalo Rwot Lubangawu yam ocikowu kwede. 18Wek gin pe gubed ka pwonyowu ki timo gin me kwer ma gitimo me woro lwak lubangagi, ma bimiyo wupoto i bal inyim Rwot Lubangawu.

19Kace wurumu taun madit mo pi kare malac, kun wulwenyo ikome me makone, pe wubitongo yadi ma ingete woko ducu ki latongwu. Wutwero camo nyiggi ento pe wutong yadi wuret woko piny. Yadi bene ma gitye i lum gudoko dano bo wek monywu orumgi olweny ikomgi? 20Ento yadi ma wungeyoni pe kicamo nyiggi aye wubityekogi woko kun wutongogi wuretogi woko piny wek wuger ki cel matek me lweny ikom gang matye kalweny i komwuni, nio ka opoto i cingwu.”