Nwoyo Cik 21

Kace pe kingeyo lanek

1“Kace kinongo dano mo kineko i lobo ma Rwot Lubangawu bimiyowu me bedo mewu, kun kome obutu i tim ata, ci pe kingeyo ngat ma oneke, 2ci ludongowu ki lungolkopwu gibibino kunu, gibiporo bor piny nio wa i taun ma orumu kom dano ma kinekoni. 3Ludongo ma i taun macok ki kom dano ma kinekoni gibikelo roya1 ma peya otiyo tic mo, ma peya oywayo kweri dyang. 4Kibitero royani wa i nota kulu mo ma piine mol kare ducu, i kabedo mo kama yam peya kipuru, ma pe kicoyo iye kodi, kibituru ngut roya woko ki i nota kunu; 5ci ajwaki ma gin likwayo pa Levi gibinyiko cok, pien yam Rwot Lubangawu oyerogi pi tic bote ki me lamo gum i nying Rwot, gin bene myero gutyek lok ducu me pido ki me bwami. 6Ludongo me taun meno macok adada ki kama kinongo iye kom dano ma kinekoni gibilwoko cinggi malo iwi kom roya ma kituru ngute i notani, 7ci gilamo doggi kun giwaco ni, ‘Cingwa pe ooyo remo pa dano man, wangwa bene pe oneno ka kineke. 8Ai Rwot, tim kica ki jo Icrael ma gin aye joni mayam ikokogini, pe iket alii me remo pa dano man ma pe ki bali i dye lwaki Icrael, ento itimgi kica pi bal me to man.’ 9Kace wutiyo meno, ci nongo wutiyo gin ma Rwot mito, ci nongo wulwoko alii me remo woko ki ikinwu kitmeno.”

Mon ma kimakogi ilweny

10Moses owaco bot jo Icrael ni, “Ka wucito kalweny ikom lumerokwu, ce Rwot Lubangawu omiyogi i cingwu ci wuyakogi wuterogi me bedo jo alimawu, 11gwok nyo ngat acel ki ikinwu bineno dako mo mamwonya ikin jo ma wuyakoni ci cwinye mare matek kun mitoni ekwanye wek odok dakone. 12Ka tye kumeno ci en bitere paco wa i ode. Ka dong bilyelo yer wi dako meno, ngolo lwete, 13ci bilunyu bongone woko ma omake kwede me bedo opiini, ci biruke mukene; ci dakonu bibedo i ode kun koko wone ki mine dwe acel kulu, ka lacen twero bedo kwede macalo cware, ci en dong bibedo dakone. 14Ka inen cwinye oari woko ki ikome, ci biweko dakonu cito gire mot kama en bimito; ento pe bicate pi lim macalo angeca, pien nongo dong otyeko lanye woko.”

Lim aleya pa latin kayo

15“Kace laco mo tye ki mon aryo, kun nongo cwinye maro dako acel makato mukene ca, ce mon aryoni ducu gunywalo lutino co, ka latin kayo obedo wod pa dako ma pe cwinye maro tutwali, 16ci ikare ma laconi poko lim me aleya ki awobene, en pe omii bot latin kayo pa dako ma cwinye maroni dul lim ma oporo dit pa latin kayo ma ka miyo bot latin kayone kikome ma wod pa dako ma pe cwinye maro tutwali. 17Ento en bitucu ni latin kayo en aye pa dako ma pe cwinye maro tutwali, ci bimiye lim ma dodo dul aryo ma ikom jamine ducu ma en tye kwede. Pien en aye acaki kero kome, dit me bedo latin kayo aye mere gire.”

Awobi ma lajemo

18“Ka dano mo tye ki wode ma ngute nwang dok lajemo, ma pe winyo dog wone ki mine, kadi bed kijuye matek ento pe winyogi, 19ci wone ki mine gibimake gitere wa i dog gang bot ludongo me taun meno ma en bedo iyeni. 20Ci gibiwaco bot ludongo ma i ganggi ni, ‘Latin awobiwa man ngute nwang dok lajemo, pe winyo dogwa, en lacarcar dok lamero kongo matek.’ 21Ci dano ducu me taun meno gibicele woko ki got nio ka oto. Kitmeno miyo wubijwero gin marac woko ki ikinwu. Jo Icrael ducu gibiwinyo ci miyo gilworo.”

Cik mogo mapatpat

22“Ka dano mo otimo bal marome nongo can me to ci kineke woko, ma kingabe malo iwi yat, 23ci pe kibiweko kome bedo iwi yat dyewor. Wubiyiko kome inino meno kikome, pien dano ma kingabo iwi yat bedo dano ma Lubanga oceno; pe wubinyobo lobo ma Rwot Lubangawu bimiyowu me aleyawu.”