Nwoyo Cik 22

11

“Ka ineno dyang nyo romo pa Laicrael lawoti ma orwenyo woko ata, ci pe ikwer miyo kony; dwok cen bote. 2Kace en pe bedo cok kwedi, nyo ka pe ingeye, ibitero leenu paco ci bibedo boti nio ka wone oyenyo, ka dong ibidwokone bote. 3Kanane bene ibitimo kitmeno, ki bongone nyo kit jami mo keken pa Laicrael lawoti ma orwenyo ki bote ma in inongo; pe ikwer miyo kony.

4Ka inongo kana pa Laicrael lawoti nyo dyange ma opoto piny inget yoo, pe inen anena; konye ki ilone malo.

5Dako pe oruk ginaruka pa co, dok laco bene pe oruk ruk pa mon, pien dano ma otimo kumeno bedo me kwer bot Rwot Lubangawu.

6Kace icob ikom ot winyo mo matye iwi yat nyo piny i ngom, ma lutino tye iye, nyo tonge, ki mine bene oumu wi lutinone nyo obutu iwi tonge, pe ibimako mine kacel ki lutinone. 7Ibiweko mine tuk cito, ento ibicoko lutino icito kwede, wek ariya mo pe onen inyimi ento ibed kwo pi kare malac.

8Kace igero ot manyen, ibigoyo wi ot meri irumu woko ki lageng, wek pe ikel bal me oyo remo i odi, ma nongo ngat mo obut opoto piny ki iwiye. 92

Pe ibicoyo kit kodi mo mapat i poto ma ipito iye oloki, miyo pe ibikayo gin ducu ma cek iye dok pe ibibiyo nyig olok bene. 10Pe ibitweyo dyang ki kana kacel me puru potoni. 11Pe ibiruku bongo ma kicweyo ki uci yer romo kacel ki ma kicweyo ki uci camanini. 123

Ibikwoyo jira angwen itwok bongo ma iume kwedeni.”

Cik ma mako cot

13“Ka laco mo onyomo nyako ce obedo kwede, ka iye okwere woko, 14ci otongo doge ki lok me lewic ma obalo nying nyako woko marac kun waco ni, ‘Anyomo nyako man ci ka abutu kwede, ci pe anongo gin ma nyutu atir ni peya ocodo co.’ 15Won latin dakonu ki mine gibikelo bongo ma nyutu atir ni latin dakonu peya ocodo co bot ludongo ma i gang meno kama gicoke iye i dog gang. 16Ci won latin dakonu biwaco bot ludongo ni, ‘Amiyo nyara bot laco man ci onyomo ka dok okwero en woko. 17Ci nen, okelo lok me lewic ikome kun waco ni pe enongo gin ma nyutu atir ni nyara peya ocodo co. Kong wunen, man en aye gin ma nyutu atir ni nyara onongo peya ocodo co.’ Ci biyaro bongonu inyim ludongo ma i gang meno. 18Ludongo gibitero laconu gigoyo, 19gingole cul me cekel me ryal miya acel. Kibimiyo lime bot won nyako, pien laconu obalo nying nya jo Icrael ma peya ocodo co. Ci bibedo dakone, pe biryeme woko matwal pi kare me kwone ducu. 20Ento ka loke ada ni, gin mo pe kinongo ma nyutu atir ni latin dakonu onongo peya ocodo co, 21ci jo ma i taun meno bicele ki got gineke woko, pien otimo gin ma pe myero i Icrael pi codo co ki i ot pa wone. Wubijwero tim marac woko ki ikinwu kitmeno.

22Ka kinongo laco mo ka butu ki dako pa laco mukene, gin aryo ducu kibinekogi woko, laco ma obutu ki dako, ki dako bene. Kitmeno miyo wubijwero gin marac woko ki ikinwu.

23Ka tye nyako mo ma peya ongeyo laco, ma kitongo keny ikome ce laco mo oromo kwede i dye taun ka obutu kwede, 24ci wubitero gin aryo ducu woko i dog cel me taun meno, wucelogi ki got wunekogi woko, latin nyakonu bito pien pe ogoyo oduru kadi onongo tye i dye taun, dok laco bene bito pi mako dako pa lawote ki tek. Kitmeno miyo wubijwero tim marac woko ki ikinwu.

25Ento ka laco mo orwate ki nyako mo ma kitongo keny ikome i dye tim ce omake tektek obutu kwede, ci laco ma obutu kwedeni aye kibineko. 26Pe wubitimo gin mo ikom nyako, pien en pe ki bal mo maromo keto can me to ikome. Lok man rom ki pa laco mo ma olwenyo ikom lawote ci oneke woko. 27Pien laconu obino ikom nyakonu i dye tim ci kadi bed en ogoyo oduru onongo ngat mo peke kunu ma lare. 284

Ka laco mo orwate ki nyako mo ma peya kitongo keny ikome ce omake tektek obutu kwede, ka kimakogi, 29ci laco ma obutu kwedeni bimiyo lim me luk bot won nyako maromo cekel pyere abic, ci nyakonu bidoko dakone, pien omake ki tek; pe biryeme woko matwal pi kare me kwone ducu. 305

Laco mo pe obed ki ciwone, pe oket lewic ikom wone kitmeno.”