اِستثنا

اِستثنا

پیش لفظ

اِستِثنا دی کتاب موسیٰ دے اُنہاں خطاباں دا سلسلہ ہے جیہڑے اُوں بنی اِسرائیل نال موآب ءچ کیتے، جِتھاں او بیابان دے لمبے سفر دے ختم تھیوݨ تے رُکے ہَن تے کنعان مُلک اُتے قبضہ کرݨ آلے ہَن۔

کیوں جو موسیٰ خُدا دے سبھ حُکم بنی اِسرائیل کُوں ڈُوجھی پھیری ڈسیندے، اِیں واسطے یُونانی ءچ اِیں کتاب دا ناں ”ڈیؤٹرونمی یعنی شریعت دی دُہرائی“ ہے۔

کتاب دے کُجھ خاص واقعات ایہ ہِن:

(1) موسیٰ پِچھلے چالیہہ سالاں دے عظیم کماں کُوں یاد کریندے۔ او لوکاں کُوں ایہ گالھ یاد رکھنڑ اُتے زور ڈیندے جو خُدا اُنہاں کُوں مِصر ءچوں کِینویں چُھڑایا تے بیابان ءچ اُنہاں دی راہنمائی کیتی تے ایہ حُکم ڈیندے جو او خُدا دے فرمانبردار تے وفادار بنڑن۔

(2) او ڈاہ حُکماں دا جائزہ گِھندے تے پہلے حُکم دے مطلب اُتے زور ڈیندے جو لوکاں کُوں صرف رب دی عبادت کرنڑی چاہیدی ہے۔ وَل او اُنہاں کُوں مختلف قانوناں دے بارے ءچ سمجھیندے جِنہاں اُتے بنی اِسرائیل کُوں وعدہ کیتے ہوئے مُلک ءچ عمل کرنڑا ہا۔

(3) موسیٰ لوکاں کُوں ڈسیندے جو جے او خُدا نال کیتے ہوئے عہد اُتے عمل کریسن تاں او کامیاب تھیسن پر جے او اُونکُوں تروڑ تے بُت پرستی کریسن تاں لعنتی کھڑسن تے ڈُشمنڑ تُوں شکست کھا تے آپنڑی زمین بلکہ آپنڑیاں جاناں تئیں ونجا بَہسن۔

(4) یشُوع خُدا دے لوکاں دا اگلا راہنما بنڑایا ویندے۔ خُدا دی وفاداری دا گیت گاوݨ تے اِسرائیل دے قبیلیاں اُتے برکت دا اعلان کرݨ تُوں بعد موسیٰ یردن دریا دے مشرق ءچ موآب ءچ مر ویندے۔

بہُوں عرصے بعد جِیں ویلے یسُوع تُوں پُچھیا گِیا جو خُدا دے حُکماں ءچوں سبھ تُوں وڈا حُکم کیہڑا ہے تاں اُوں جواب ءچ شریعت دے صحیفیاں ءچوں ایہ گالھ سُنڑائی: ”رب العالمین آپنڑے خُدا نال آپنڑے سارے دل، آپنڑی ساری جان تے آپنڑی ساری طاقت نال محبت رکھو