اِستثنا 13

بُت پرستاں کیتے سزائے موت

1جیکر کوئی نبی یا اِلہام ڈیکھنڑ آلا تُہاڈے وچال اُٹھ کھڑا تھیوے تے کہیں اِلٰہی نشان یا معجزے دا اعلان کرے، 2تے او نشان یا معجزہ واقعی تھی ونجے تے تُہاکُوں آکھے، ”آؤ، اساں بئے معبُوداں دی جِنہاں کُوں تُساں نئیں جانڑدے، پیروی کر تے اُنہاں دی خدمت کرُوں۔“ 3تاں ایجھے لوکاں دی نہ سُنڑائے کیوں جو اِیندے نال رب العالمین تُہاڈا خُدا تُہاکُوں ازما تے معلوم کریندا پئے جو کیا تُساں واقعی آپنڑے پُورے دل و جان نال اُوندے نال محبت کریندے ہیوے یا نئیں۔ 4تُہاکُوں رب العالمین آپنڑے خُدا دی پیروی کرنڑی تے اُوندا خوف مننڑا ہے۔ اُوندے حُکماں اُتے عمل کرو، اُوندی سُنڑو، اُوندی خدمت کرو تے اُوندے نال چِمبڑے راہو۔ 5پر ایجھے نبی یا اِلہام ڈیکھنڑ آلے کُوں سزائے موت ڈِتی ونجے، کیوں جو اُوں تُہاکُوں رب العالمین تُہاڈے خُدا نال جئیں تُہاکُوں مِصر دی غُلامی تُوں بچایا تے اُتھوں کڈھیا، بغاوت کرݨ کیتے اُبھاریا ہا۔ تے او تُہاکُوں اُوں رستے تُوں ہٹاونڑا چاہندے جیندے اُتے رب العالمین تُہاڈے خُدا تُہاکُوں ٹُرݨ دا حُکم ڈِتے۔ لازم ہے جو تُساں ایجھی بدی کُوں آپنڑے وچال تُوں مِٹا ڈیوائے۔

6جیکر تیڈا سکا بِھرا، پوتر، دِھی، تیڈی ذال یا تیڈا قریبی دوست تیکُوں چُپ چپیتے ایہ آکھ تے ورغلاوݨ دی کوشش کرے جو، ”آ، اساں وَنج تے بئے معبُوداں دی عبادت کرُوں۔“ یعنی ایجھے معبُوداں دی جِنہاں نال نہ تُوں نہ تیڈے پِیُو ڈاڈا واقف ہَن، 7بےشک او آسُوں پاسُوں دیاں یا دور دیاں قوماں دے دیوتا ہووݨ، یا دُنیا دے ہِک سرے یا ڈُوجھے سرے دے معبُود ہووݨ، 8پر تُوں اُوندے گالھیں ءچ نہ آویں تے نہ اُوندی سُنڑیں۔ اُوندے اُتے رحم نہ کریں، نہ اُونکُوں بچاویں تے نہ اُونکُوں پناہ ڈیویں۔ 9بلکہ اُونکُوں سزائے موت ڈیویں۔ اُوں ویلے سبھ تُوں پہلے تیڈا ہتھ اُونکُوں پتھر مارے، وَل ای باقی سارے لوک۔ 10اُونکُوں سنگسار کر تے ضرور مار ڈِتا ونجے، کیوں جو اُوں تیکُوں رب العالمین تیڈے خُدا تُوں دُور کرݨ دی کوشش کیتی ہئی، جئیں تیکُوں مِصر دی غُلامی ءچوں کڈھیا ہا۔ 11وَل سارا اِسرائیل ایہ سُنڑ تے ڈر ویسی تے اگُوں تے تیڈے وچال ایجھی شریر حرکت کرݨ دی جُرأت نہ کریسی۔

12جِیں ویلے تُساں اُنہاں شہراں ءچ راہوݨ لگسو جیہڑے رب العالمین تُہاڈا خُدا تُہاکُوں ڈیندا پِیا ہے تاں شاید تُہاکُوں پتا لگے 13جو شریر لوک تُہاڈے وچالُوں نِکل آئے ہِن، جِنہاں آپنڑے شہر دے لوکاں کُوں ایہ آکھ تے گُمراہ کر ڈِتے جو، ”آؤ، اساں بئے معبُوداں دی عبادت کرُوں۔“ یعنی ایجھے معبُوداں دی جِنہاں نال تُساں واقف نئیں۔ 14لازم ہے جو تُساں خُوب پُچھ گچھ کر تے صحیح پتہ کرو جو کیا تھئے۔ جیکر ایہ سچ ہووے تے ثابت تھی ونجے جو ایہ مکرُوہ کم واقعی تھیّا ہے، 15تاں وَل تُساں شہر دے سارے لوکاں کُوں ضرور ہلاک کر ڈیوائے۔ شہر کُوں بالکل تباہ کر ڈیوائے، نہ صرف اُوندے لوکاں کُوں بلکہ اُوندے ڈھورڈنگراں کُوں وی۔ 16شہر دا سارا مال غنیمت چوک دے وچال کٹھا کر تے سارے شہر کُوں اُوندے مال سمیت رب العالمین آپنڑے خُدا دے ناں تے مکمل طور تے ساڑ ڈیوائے۔ اُوندے کھنڈر ہمیشاں کیتے باقی راہوݨ پر اُونکُوں وَلا کڈھائیں نہ بنڑایا ونجے۔

17اُنہاں شیواں ءچوں جیہڑیاں برباد تھیوݨ کیتے مخصوص ہِن، کوئی وی تُہاڈے کولھ نئیں ہوونڑیں چاہیدی۔ صرف اِیں صورت ءچ ای رب العالمین دا غضب ٹھڈا تھیسی تے او تُہاڈے اُتے رحم کر تے مہربانی کریسی تے جِینویں اُوں تُہاڈے پِیُو ڈاڈے نال قَسم کھا تے وعدہ کیتا ہا، تُہاڈی تعداد ودھیسی۔ 18پر شرط ایہ ہے جو تُساں رب العالمین آپنڑے خُدا دی سُنڑو تے اُوندے سارے حُکماں اُتے عمل کرو جیہڑے مَیں اَج تُہاکُوں ڈیندا پِیا ہاں تے اُوہو کُجھ کرو جیہڑا اُوندی نظر ءچ ٹھیک ہے۔