Modern Central Saraiki Bible
اِستثنا 12
عبادت کیتے مقررہ جاہ
ایہ او حُکم تے قانُون ہِن جِنہاں اُتے تُہاکُوں احتیاط نال عمل کرنڑا ہوسی جِیں ویلے تُساں اُوں مُلک ءچ آباد تھی ویسو جیہڑا رب العالمین تُہاڈے پِیُو ڈاڈے دا خُدا تُہاکُوں ڈیندا پئے تاں جو تُساں اُوندے اُتے قبضہ کرو۔ ساری عُمر اُنہاں دے تابع رہوائے۔
اُنہاں یکے جاہیں کُوں برباد کر ڈیوائے جِتھاں او قوماں جِنہاں کُوں کڈھنڑا ہے آپنڑے دیوتیاں دی پُوجا کریندیاں ہِن، بھانویں او اُچے پہاڑاں، پہاڑیاں یا گھاٹے درختاں دی چھاں ءچ ای کیوں نہ ہووݨ۔ اُنہاں دیاں قُربان گاہاں کُوں ڈھا ڈیوائے۔ اُنہاں دے بُتاں دے پتھر آلے تھمبیاں کُوں بَھن ڈیوائے، اُنہاں دے یسِیرت دیوی دے لکڑ آلے تھمبے کٹ ڈیوائے تے اُنہاں دے دیوتیاں دے مجسمے ساڑ ڈیوائے۔ اِنہاں جاہیں تُوں اُنہاں دا ناں نشان مِٹا ڈیوائے۔
رب العالمین آپنڑے خُدا دی پرستش اُنہاں دے طریقے نال نہ کرائے۔ بلکہ جیہڑی جاہ کُوں رب العالمین تُہاڈا خُدا قبیلیاں ءچوں آپنڑے ناں دے جلال کیتے چُنڑسی، تُساں عبادت کیتے اُتھائیں وَنجائے۔ تے اُتھائیں آپنڑیاں ساریاں قُربانیاں گِھن تے پیش کرائے۔ بھانویں او ساڑے ونجنڑ آلیاں قُربانیاں، ذبیحے، پیداوار دا ڈاہواں حصہ، ہدیے، مَنت تے خوشی نال پیش کیتے ونجنڑ آلیاں قُربانیاں، تے گائیں، ڈاند تے بھیڈ بکریاں دے پلوٹھے ای کیوں نہ ہووݨ۔ اُتھاں رب العالمین آپنڑے خُدا دے حضُور آپنڑے خانداناں سمیت کھانڑا کھا تے آپنڑے ہتھ دی کمائی دی خوشی منائے جیندے ءچ رب العالمین تُہاڈے خُدا تُہاکُوں برکت ڈِتی ہووے۔
اُوں ویلے تُساں اُونویں نئیں کرنڑا جِینویں اساں اَج تئیں کریندے آئے ہیں۔ ہر کوئی اُوہو کریندے جیہڑا اُونکُوں ٹھیک لگدے، کیوں جو ہُنڑ تئیں تُساں ارام دی اُوں جاہ تے نئیں پُجے جیہڑی رب العالمین تُہاڈا خُدا تُہاکُوں میراث دے طور تے ڈیندا پئے۔ پر جڈاں تُساں یردن دریا کُوں پار کر تے اُوں مُلک ءچ آباد تھی ویسو جیہڑا رب العالمین تُہاڈا خُدا تُہاکُوں میراث ءچ ڈیندا پئے، تے جڈاں رب العالمین تُہاکُوں تُہاڈے آسُوں پاسُوں دے دُشمنڑاں تُوں بچائی رکھیسی تے تُساں ارام تے سکون نال زندگی گُزریسو، تاں تُہاکُوں سارا کُجھ جیہڑا مَیں ڈسیساں اُتھاں گِھن تے پیش کرنڑا ہے جِتھاں رب العالمین تُہاڈا خُدا آپنڑے ناں دے جلال کیتے ہِک جاہ چُنڑسی، یعنی ساڑے ونجنڑ آلیاں قُربانیاں، ذبیحے، پیداوار دا ڈاہواں حصہ، ہدیے تے مَنت دے طور تے پیش کیتے ونجنڑ آلیاں نذراں۔ اُتھاں رب العالمین آپنڑے خُدا دے سامنڑے تُساں، تُہاڈے پوتر، دِھیاں، تُہاڈے غُلام تے لونڈیاں خوشی مناوݨ۔ لاویاں کُوں وی جیہڑے تُہاڈے شہراں ءچ آباد ہِن آپنڑی خوشی ءچ شامل کرائے، کیوں جو اُنہاں دے کولھ وراثتی زمین نہ ہوسی۔
خبردار! آپنڑیاں ساڑے ونجنڑ آلیاں قُربانیاں ہر جاہ تے پیش نہ کرائے، بلکہ صرف اُوں جاہ تے جیہڑی رب العالمین تُہاڈے قبیلیاں ءچوں چُنڑسی۔ تے اُتھاں او سبھ کُجھ کرائے جِیندا مَیں تُہاکُوں حُکم ڈیندا پِیا ہاں۔
پر تُساں آپنڑے سارے شہراں ءچ آپنڑی مرضی تے اُوں برکت دے مطابق جیہڑی رب العالمین تُہاڈے خُدا تُہاکُوں ڈِتی ہے، اُنہاں ڈنگراں دا گوشت کھا سگدے ہیوے جیہڑے تُساں قُربانی کیتے نئیں بلکہ صرف کھاوݨ کیتے ذبح کریندے ہیوے۔ ایجھے گوشت کُوں پاک صاف تے ناپاک لوک کھا سگدے ہِن جِینویں پہاڑی تے میدانی ہرن دے گوشت کُوں۔ پر خون نہ کھوائے بلکہ اُونکُوں پانڑی وانگُوں زمین اُتے وِیٹ ڈیوائے۔
پر جیہڑیاں شیواں رب العالمین کیتے مخصوص کیتیاں گئیاں ہِن اُنہاں کُوں آپنڑے شہراں ءچ نہ کھوائے مثلاً اناج، انگُور دا رَس تے زیتون دے تیل دا ڈاہواں حصہ، گائیں ڈاند تے بھیڈ بکریاں دے پلوٹھے، مَنت تے خوشی نال پیش کیتے ونجنڑ آلیاں قُربانیاں تے ہدیے۔ ایہ شیواں صرف رب العالمین آپنڑے خُدا دے حضُور اُوں جاہ تے کھوائے جِینکُوں او چُنڑسی۔ اُتھائیں تُساں آپنڑے پوتراں، دِھیاں، نوکراں، لونڈیاں تے آپنڑے شہراں دے لاویاں نال کٹھے تھی تے کھوائے تے خوشی منائے جو رب العالمین ساڈی محنت کُوں برکت ڈِتی ہے۔ آپنڑے مُلک ءچ جئیں تئیں تُساں زندہ ہیوے، لاویاں دیاں ضرورتاں پُوریاں کرݨ نہ چُھڑائے۔
جِیں ویلے رب العالمین تُہاڈا خُدا آپنڑے وعدے دے مطابق تُہاڈیاں سرحداں ودھیسی تے تُساں گوشت کھاوݨ دی خواہش رکھیسو تاں جِینویں دل آکھے گوشت کھا سگدے ہیوے۔ جیکر او جاہ جِینکُوں رب العالمین تُہاڈا خُدا آپنڑے ناں کیتے چُنڑسی، کہیں دے گھر تُوں دُور ہووے تاں او آپنڑے شہر ءچ جِینویں دل آکھے رب العالمین تُوں مِلے ہوئے گائیں، ڈاند تے بھیڈ بکریاں کُوں ذبح کر تے کھا سگدے، پر اِینویں ای کرے جِینویں مَیں حُکم ڈِتے۔ جِینویں پہاڑی تے میدانی ہرن دا گوشت کھادا ویندے، اُونویں ای ایہ گوشت کھادا ونجے۔ پاک صاف تے ناپاک لوک ڈوہائیں اُونکُوں کھا سگدے ہِن۔ پر گوشت دے نال رَت نہ کھوائے، کیوں جو رَت جاندار دی جان ہے۔ اُوندی جان گوشت دے نال نہ کھوائے۔ رَت نہ کھوائے بلکہ اُونکُوں زمین اُتے وِیٹ تے ضائع کر ڈیوائے۔ اُونکُوں نہ کھوائے تاں جو تُہاڈا تے تُہاڈی اولاد دا بھلا تھیوے، کیوں جو اِینویں کرݨ نال تُساں رب العالمین دی نِگاہ ءچ چنگا کم کریسو۔
پر جیہڑیاں شیواں رب العالمین کیتے مخصوص تے مُقدّس ہِن یا جیہڑا کُجھ تُساں مَنت مَن تے اُوندے کیتے نذر کریندے ہیوے، لازم ہے جو تُساں اُنہاں کُوں اُوں جاہ تے گِھن ونجو جِینکُوں رب العالمین چُنڑسی۔ اُتھائیں رب العالمین آپنڑے خُدا دی قُربان گاہ اُتے آپنڑیاں ساڑے ونجنڑ آلیاں قُربانیاں گوشت تے رَت سمیت پیش کرائے۔ بئے ذبیحاں دی رَت قُربان گاہ اُتے وِیٹ ڈیوائے، پر اُنہاں دا گوشت تُساں کھا سگدے ہیوے۔
جیہڑے گالھیں دا مَیں تُہاکُوں حُکم ڈیندا پِیا ہاں اُنہاں اُتے احتیاط نال عمل کرائے۔ وَل تُہاڈا تے تُہاڈی اولاد دا ہمیشاں بھلا تھیسی، کیوں جو تُساں او کُجھ کریسو جیہڑا رب العالمین تُہاڈے خُدا دی نِگاہ ءچ چنگا تے ٹھیک ہے۔
رب العالمین تُہاڈا خُدا اُنہاں قوماں کُوں مِٹا ڈیسی، جِنہاں دو تُساں ویندے پئے ہیوے۔ تُساں اُنہاں کُوں اُنہاں دے مُلک تُوں کڈھیندے ویسو تے خود اُوندے ءچ آباد تھیندے ویسو۔ پر خبردار! اُنہاں دے برباد تھیوݨ تُوں بعد اُنہاں دے دیوتیاں دے بارے ءچ پُچھ گچھ نہ کرائے، نہ تاں تُساں پَھس ویسو۔ ایہ نہ اکھائے جو ایہ قوماں کِینویں آپنڑے دیوتیاں دی پُوجا کریندیاں ہَن؟ اساں وی اِینویں ای کریسوں۔ تُساں رب العالمین آپنڑے خُدا دی عبادت اِینویں نہ کرائے۔ ایہ قوماں ایجھے گندے طریقے نال پُوجا کریندیاں ہِن جِنہاں تُوں رب العالمین کُوں نفرت ہے۔ او آپنڑے دِھیاں پوتراں کُوں وی آپنڑے دیوتیاں دے ناں تے ساڑ ڈیندے ہِن۔
جیہڑی وی گالھ دا مَیں تُہاکُوں حُکم ڈیندا ہاں، اُوندے اُتے احتیاط نال عمل کرائے۔ نہ کوئی گالھ ودھائے تے نہ کوئی گالھ گھٹائے۔
Modern Central Saraiki Bible. Copyright © Strategic Resource Group. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.