اِستثنا 11

خُدا دی فرمانبرداری کرو

1رب العالمین آپنڑے خُدا نال محبت کرو تے ہمیشاں اُوندی شرع، قانُوناں، حُکماں تے فرماناں اُتے عمل کرو۔ 2اَج جاݨ گِھنو جو تُہاڈے بالاں نئیں بلکہ تُساں ای رب العالمین آپنڑے خُدا تُوں تربیت گِھدی تے اُوندی عظمت، وڈے زور تے طاقت کُوں ڈِٹھا، 3تے تُساں اُوندے معجزیاں تے وڈے کماں دے گواہ ہیوے جیہڑے اُوں مِصر ءچ فرعون تے اُوندے لوکاں دے خلاف کیتے۔ 4تُساں ڈِٹھا جو رب العالمین کِینویں مِصری فوج کُوں اُوندے گھوڑیاں تے رتھاں سمیت جِیں ویلے او تُہاڈا پِچھا کریندے پئے ہَن، بحر ِ قُلزم ءچ غرق کر ڈِتا۔ اُوں اُنہاں کُوں اِینویں تباہ کیتا جو او اَج تئیں بحال نئیں تھی سگے۔

5تُہاڈے بال نئیں بلکہ تُساں آپ ای گواہ ہیوے جو اِتھاں پُجنڑ تُوں پہلے رب العالمین بیابان ءچ تُہاڈے واسطے کیا کیا کیتا۔ 6تُساں او کُجھ ڈِٹھا جیہڑا اُوں الِیاب دے پوتراں داتن تے اَبِیرام نال کیتا جیہڑے رُوبِن دے قبیلے دے ہَن۔ اُوں ڈینہہ زمین مُنہ کھول تے بنی اِسرائیل دے سامنڑے اُنہاں دے خانداناں تے تمبُواں کُوں اُنہاں دے سامان سمیت کھا گئی۔ 7رب العالمین دے ایہ عظیم کم تُساں آپنڑے اکھیں نال ڈِٹھے ہِن۔

8اِیں کیتے اُنہاں سارے حُکماں اُتے عمل کریندے راہو جیہڑے مَیں اَج ڈیندا پِیا ہاں تاں جو یردن دریا کُوں پار کر تے تُہاکُوں اُوں مُلک اُتے قبضہ کرݨ دی طاقت مِلے۔ 9جیکر تُساں فرماں بردار راہو تاں دیر تئیں اُوں مُلک ءچ زندہ راہسو جیندے ڈیوݨ دا وعدہ رب العالمین قَسم کھا تے تُہاڈے پِیُو ڈاڈے نال کیتا ہا تے جیندے ءچ کھیر تے ماکھی وافر ہے۔

10کیوں جو ایہ مُلک جِیندے اُتے تُساں قبضہ کرݨ کیتے ویندے پئے ہیوے، مِصر وانگُوں نئیں جِتُھوں تُساں نِکل آئے ہیوے۔ اُتھاں تُہاکُوں بیج رَہا تے وڈی محنت نال سبزی دے کھیت آلی کار اُونکُوں پانڑی ڈیونڑا پوندا ہا۔ 11جڈاں جو یردن دریا کُوں پار کر تے جیہڑے مُلک اُتے تُساں قبضہ کریسو اُوندے ءچ پہاڑ تے وادیاں ہِن جیہڑیاں مینہ دا پانڑی پِیندیاں ہِن۔ 12رب العالمین تُہاڈا خُدا خود اُوں مُلک دا خیال رکھیندے۔ اُوندے اکھیں سال دے پہلے ڈینہہ تُوں گِھن تے اخیر تئیں لگاتار اُوندے اُتے لگیاں راہندیاں ہِن۔

13اِیں کیتے احتیاط نال اُنہاں حُکماں دے تابع راہو جیہڑے مَیں اَج تُہاکُوں ڈیندا پِیا ہاں تے رب العالمین آپنڑے خُدا نال محبت کرو تے آپنڑے پُورے دل و جان نال اُوندی خدمت کرو۔ 14وَل رب العالمین زمین اُتے پت جَھڑ تے بہار دی بارش ویلے سر وسیسی۔ اناج، انگُور تے زیتون دیاں فصلاں پکسن تے تُساں اُنہاں کُوں جمع کر گِھنسو۔ 15تے تُساں کھا تے رَج ویسو تے اِینویں ای او تُہاڈے چراوݨ آلے جاہیں ءچ تُہاڈے ڈھورڈنگراں کیتے گھاہ پیدا کریسی۔

16پر خبردار، کِتھائیں تُہاکُوں ورغلایا نہ ونجے۔ اِینویں نہ تھیوے جو تُساں رب العالمین دے رستے تُوں ہٹ ونجو تے بئے معبُوداں کُوں سجدہ کر تے اُنہاں دی خدمت کرو۔ 17نہ تاں رب العالمین دا عذاب تُہاڈے اُتے آ پوسی تے او مُلک ءچ مینہ نہ وسیسی، تُہاڈیاں فصلاں نہ پکسن تے تُہاکُوں جلدی اُوں چنگے مُلک ءچوں مِٹا ڈیسی جیہڑا اُوں تُہاکُوں ڈِتا ہے۔

18اِیں کیتے میڈے ایہ گالھیں آپنڑے دِل تے دماغ اُتے نقش کر گِھنو۔ اُنہاں کُوں یاد دہانی دے نشاناں دے طور تے آپنڑے باہیں تے متھے اُتے لوائے۔ 19اُنہاں کُوں آپنڑے بالاں کُوں سِکھائے تے گھر ءچ بیٹھے ہوئے، رستے ءچ ٹُردے ہوئے، لیٹے ہوئے یا اُٹھدے ویلے اِنہاں دا ذِکر کرائے۔ 20اُنہاں کُوں آپنڑے گھراں دیاں درسالاں اُتے تے آپنڑے شہراں دے پھاٹکاں اُتے لِکھائے 21تاں جو جئیں تئیں زمین اُتے اسمان قائم ہے تُساں تے تُہاڈی اولاد اُوں مُلک ءچ زندہ راہو جیندے ڈیوݨ دا وعدہ رب العالمین قَسم کھا تے تُہاڈے پِیُو ڈاڈے نال کیتا ہا۔

22احتیاط نال اُنہاں حُکماں دے تابع راہو جیہڑے مَیں تُہاکُوں ڈیندا پِیا ہاں۔ رب العالمین آپنڑے خُدا نال محبت کرو، اُوندے سارے رستیاں اُتے ٹُردے راہو تے اُوندے نال چِمبڑے راہو۔ 23وَل او تُہاڈے سامنڑے تُوں اُنہاں ساریاں قوماں کُوں کڈھ ڈیسی تے تُساں اُنہاں قوماں دیاں زمیناں اُتے قبضہ کر گِھنسو جیہڑیاں تُہاڈے تُوں وڈیاں تے طاقتور ہِن۔ 24جنُوبی بیابان تُوں گِھن تے لُبنان تئیں تے فرات دریا تُوں بحیرہ ِ روم تئیں تُساں جِتھاں وی قدم رکھیسو، او جاہ تُہاڈی ای ہوسی۔ 25کوئی وی تُہاڈا سامنڑا نہ کر سگسی۔ تُساں اُوں مُلک ءچ جِتھاں وی ویسو اُتھاں رب العالمین تُہاڈا خُدا آپنڑے وعدے دے مطابق تُہاڈی دہشت تے خوف پیدا کر ڈیسی۔

26اَج مَیں تُہاکُوں رب العالمین دی برکت یا اُوندی لعنت کُوں چُننڑ دا موقع ڈیندا ہاں۔ 27جیکر تُساں رب العالمین آپنڑے خُدا دے اُنہاں حُکماں اُتے عمل کریسو جیہڑے مَیں تُہاکُوں اَج ڈیندا پِیا ہاں تاں او تُہاکُوں برکت ڈیسی۔ 28پر جیکر تُساں اُوندے تابع نہ ریہے تے میڈے ڈسائے ہوئے رستے تُوں ہٹ تے اُنہاں معبُوداں دی پیروی کریسو جِنہاں کُوں تُساں نئیں جانڑدے، تاں او تُہاڈے اُتے لعنت بھجیسی۔

29جِیں ویلے رب العالمین تُہاڈا خُدا تُہاکُوں اُوں مُلک ءچ گِھن ویسی جیندے اُتے تُساں قبضہ کریسو تاں لازم ہے جو گرِزِیم پہاڑ اُتے چڑھ تے برکت دا اعلان کرو تے عیبال پہاڑ اُتے لعنت دا۔ 30ایہ ڈُو پہاڑ یردن دریا دے پار مغرب ءچ اُنہاں کنعانیاں دے علاقے ءچ موجود ہِن جیہڑے یردن دی خشک وادی ءچ جِلجال شہر دے سامنڑے مورہ دے بلُوط دے درختاں دے نیڑے آباد ہِن۔ 31ہُنڑ تُساں یردن دریا کُوں پار کر تے اُوں مُلک اُتے قبضہ کرݨ آلے ہیوے جیہڑا رب العالمین تُہاڈا خُدا تُہاکُوں ڈیندا پئے۔ جِیں ویلے تُساں اُونکُوں آپنڑا بنڑا تے اُوندے ءچ آباد تھی ویسو 32تاں احتیاط نال اُنہاں سارے حُکماں تے قانُوناں اُتے عمل کریندے رہوائے جیہڑے مَیں اَج تُہاکُوں ڈیندا پِیا ہاں۔