اِستثنا 14

ماتم دے بارے ءچ حُکم

1تُساں رب العالمین آپنڑے خُدا دے فرزند ہیوے۔ مُردیاں دے ڈُکھ ءچ آپنڑے آپ کُو زخمی نہ کرو، تے نہ آپنڑے سر دے سامنڑے آلے وال مُنواؤ۔ 2کیوں جو تُساں رب العالمین آپنڑے خُدا دی مخصوص تے مُقدّس قوم ہیوے۔ دُنیا دیاں سبھ قوماں ءچوں رب العالمین تُہاکُوں ای چُنڑ تے آپنڑی خاص ملکیت بنڑایا ہے۔

کھاوݨ کیتے پاک تے ناپاک جانور

3کوئی وی مکرُوہ شے نہ کھاؤ۔

4جِنہاں جانوراں کُوں تُساں کھا سگدے ہیوے او ایہ ہِن: ڈاند، بھیڈ، بکری، 5پہاڑی ہرن، میدانی ہرن تے چھوٹی ہرن، جنگلی تے پہاڑی بکری، نیل گاں، تے پہاڑی بھیڈ۔ 6ہر جانور جیندے پیر چریجے ہوئے ہووݨ تے او جُگالی وی کریندا ہووے، اُونکُوں کھاوݨ دی اِجازت ہے۔ 7پر اُنہاں ءچوں جیہڑے جگالی کریندے ہِن یا جِنہاں دے پیر چریجے ہوئے ہِن اُوٹھ، خرگوش تے بِجُو کھاوݨ منع ہِن کیوں جو او جُگالی تاں کریندے ہِن پر اُنہاں دے پیر چریجے ہوئے نئیں۔ او تُہاڈے کیتے حرام ہِن۔ 8سُؤر وی تُہاڈے کیتے حرام ہے، کیوں جو اُوندے پیر تاں چریجے ہوئے ہوندے ہِن پر او جُگالی نئیں کریندا۔ نہ تاں اُوندا گوشت کھاونڑیں تے نہ ای اُوندی لاش کُوں ہتھ لاونڑیں۔

9پانڑی ءچ راہنڑ آلے جانوراں ءچوں تُساں اُنہاں کُوں کھا سگدے ہیوے جِنہاں دے کھمب تے چانے ہووݨ۔ 10جیکر اُنہاں دے کھمب یا چانے نئیں تاں وَل او تُہاڈے کیتے حرام ہِن۔

11تُساں ہر حلال پکھی کھا سگدے ہیوے۔ 12پر اِنہاں پکھیاں کُوں کھاوݨ منع ہے: عقاب، دھاری آلا گِدھ، کالا گِدھ، 13رتّی ہِل، کالی ہِل، ہر قِسم دا گِدھ، 14ہر قِسم دا کاں، 15عقابی اُلُّو، نِکے کَن آلا اُلُّو، وڈے کَن آلا اُلُّو، ہر قِسم دا باز، 16نِکا اُلُّو، وڈا اُلُّو، چِٹا اُلُّو، 17صحرائی اُلُّو، مِصری گِدھ، ہڑگیلا، 18لق لق، ہر قِسم دا بگلا، ہُد ہُد تے چام چِٹھ۔

19کھمباں آلے تے ٹُرݨ آلے یکے کیڑے تُہاڈے کیتے حرام ہِن۔ اُنہاں کُوں کھاوݨ منع ہے۔ 20پر تُساں ہر حلال پکھی کھا سگدے ہیوے۔

21جیہڑا جانور آپنڑے آپ مر ونجے اُونکُوں نہ کھاؤ۔ تُساں اُونکُوں آپنڑی آبادی ءچ راہوݨ آلے پردیسی کُوں ڈے سگدے ہیوے یا وَل کہیں اجنبی کُوں ویچ سگدے ہیوے تے او اُونکُوں کھا سگدے، پر تُساں نئیں کھاونڑاں کیوں جو تُساں رب العالمین آپنڑے خُدا کیتے مخصوص تے مُقدّس قوم ہیوے۔

بکری دے لیلے کُوں اُوندی ماء دے کھیر ءچ نہ پکائے۔

پیداوار دا ڈاہواں حصہ رب کیتے مخصوص کرو

22[اے بنی اِسرائیل] تُوں آپنڑے کھیتاں دی پیداوار دا ڈاہواں حصہ الگ کر۔ 23آپنڑاں اناج، انگُوراں دا رَس، زیتون دا تیل تے گائیں، ڈاند تے بھیڈ بکریاں دے پلوٹھے اُوں جاہ تے گِھن آ جیہڑی رب آپنڑے ناں دے جلال کیتے چُنڑسی۔ اُتھاں ایہ چیزاں رب العالمین آپنڑے خُدا دے حضور کھاویں تاں جو تُوں ساری حیاتی آپنڑے خُدا دا خوف مننڑ سکھیں۔

24جیکر او جاہ جیہڑی رب العالمین تیڈا خُدا آپنڑے ناں دے جلال کیتے چُنڑسی تیڈے گھر تُوں حد کنُوں دور ہووے تے رب العالمین آپنڑے خُدا دی برکت دی کثرت پارُوں تُوں آپنڑے ڈاہویں حصے کُوں اُتھاں تئیں نہ پُچا سگیں، 25تاں اُونکُوں ویچ تے اُوندے پیسے اُوں جاہ تے چا وَنج جیہڑی رب العالمین تیڈا خُدا آپنڑے ناں دے جلال کیتے چُنڑسی۔ 26اُتھاں پُج تے اُنہاں پیسیاں نال جیہڑی شے چاہویں مُل گِھن گِھنیں، بھانویں گاں، ڈاند، بھیڈ بکری، انگُور دا رَس یا کوئی بئی شراب۔ وَل آپنڑے گھر آلیاں نال رَل تے رب العالمین آپنڑے خُدا دے حضُور ایہ چیزاں کھانویں تے خوشی منانویں۔ 27لاویاں دا خیال وی رکھیں جیہڑے تیڈے شہراں ءچ راہندے ہِن، کیوں جو اُنہاں کُوں وراثت ءچ زمین نہ مِلسی۔

28ہر تریجھے سال بعد اُوں سال دی پیداوار دا ڈاہواں حصہ آپنڑے شہراں ءچ جمع کریں۔ 29اُونکُوں لاویاں کُوں ڈیویں جِنہاں دے کولھ وراثتی زمین نئیں، تے آپنڑے شہراں ءچ آباد پردیسیاں، یتیماں تے بیوہ عورتاں کُوں وی ڈیویں۔ او آوݨ تے کھانڑا کھا تے رَج ونجنڑ، وَل رب العالمین تیڈا خُدا تیڈے ہر کم ءچ برکت ڈیسی۔