اِستثنا 15

قرض داراں دی بحالی دا سال

1ہر سَت سال بعد ہِک ڈُوجھے دے قرض معاف کر ڈیوائے۔ 2معاف کرݨ دا طریقہ ایہ ہوسی: جئیں وی آپنڑے کہیں اِسرائیلی بِھرا کُوں قرض ڈِتا ہووے، او اُونکُوں منسوخ کر ڈیوے۔ او آپنڑے ہمسائے یا بِھرا کُوں قرض واپس کرݨ تے مجبور نہ کرے کیوں جو رب العالمین دے ناں ءچ اِینکُوں معاف کرݨ دا اعلان کر ڈِتا گئے۔ 3تُوں غیر مُلکی قرض داراں کُوں پیسے ڈیوݨ تے مجبور کر سگدیں پر آپنڑے اِسرائیلی بِھرا دے سارے قرض معاف کر ڈیویں۔

4تُہاڈے وچال کوئی وی غریب نئیں ہوونڑا چاہیدا، کیوں جو رب العالمین تُہاڈا خُدا تُہاکُوں اُوں مُلک ءچ جیہڑا او تُہاکُوں میراث دے طور تے ڈیوݨ آلا ہے، ضرور برکت ڈیسی۔ 5پر شرط ایہ ہے جو تُساں پُوری توجہ نال اُوندی سُنڑو تے احتیاط نال اُنہاں سارے حُکماں اُتے عمل کرو جیہڑے مَیں اَج تُہاکُوں ڈیندا پِیا ہاں۔ 6وَل رب العالمین تُہاڈا خُدا تُہاکُوں آپنڑے وعدے دے مطابق برکت ڈیسی۔ تُساں بہُوں ساریاں قوماں کُوں قرض ڈیسو پر تُہاکُوں کہیں تُوں قرض نہ گِھننڑا پوسی۔ تُساں بہُوں ساریاں قوماں اُتے حکُومت کریسو پر کوئی تُہاڈے اُتے حکُومت نہ کریسی۔

7جِیں ویلے تُوں اُوں مُلک ءچ آباد تھیسیں جیہڑا رب العالمین تیڈا خُدا تیکُوں ڈیوݨ آلا ہے، تے جیکر تیڈے شہراں ءچ تیڈا کوئی بِھرا غریب ہووے تاں تُوں اُوندے نال سخت دِلی تے کنجُوسی نہ کریں، 8بلکہ کُھلے دل نال اُوندی مدد کر، تے جِتنا اُونکُوں ضرورت ہے اُونکُوں قرض ڈے۔ 9خبردار! ایہ نہ سوچیں جو قرض معاف کرݨ دا سال نیڑے ہے، اِیں واسطے مَیں اُونکُوں کُجھ نہ ڈیساں۔ جیکر تُوں ایجھی بُری گالھ آپنڑے دل ءچ سوچ تے ضرورت مند بِھرا کُوں سخت دِلی نال کُجھ نہ ڈِتا تے اُوں رب العالمین دے حضُور تیڈی شکایت کر ڈِتی تاں وَل تُوں قصُوروار ہوسیں۔ 10اُونکُوں ضرور کُجھ ڈے بلکہ خوشی نال ڈے، وَل رب العالمین تیڈا خُدا تیڈے ہر کم ءچ جِینکُوں تُوں ہتھ لیسیں، برکت پیسی۔ 11مُلک ءچ غریب لوک ہمیشاں راہسن، اِیں واسطے مَیں تیکُوں حُکم ڈیندا ہاں جو کُھلے دل نال آپنڑے غریب تے ضرورت مند بِھرانواں دی مدد کر۔

ستویں سال ءچ غُلاماں دی ازادی

12جیکر کوئی عبرانی بِھرا یا بھینڑ آپنڑے آپ کُوں ویچ تے تیڈا غُلام بنڑ ونجے تے چِھی سال تیڈی خدمت کرے تاں لازم ہے جو تُوں ستویں سال اُونکُوں ازاد کر ڈیویں۔ 13ازاد کرݨ ویلے اُونکُوں خالی ہتھ نہ ونجنڑ ڈیویں۔ 14بلکہ آپنڑے بھیڈ بکریاں، اناج تے انگُور دے رَس ءچوں اُونکُوں کُھلے دل نال ڈیویں۔ جِینویں رب العالمین تیڈے خُدا تیکُوں برکت ڈِتی ہے، اُوندے مطابق اُونکُوں ڈیویں۔ 15یاد رکھیں جو تُوں وی مِصر ءچ غُلام ہانویں، تے رب العالمین تیڈے خُدا تیکُوں چُھڑایا ہا۔ اِیں واسطے اَج مَیں تیکُوں ایہ حُکم ڈیندا ہاں۔

16پر جیکر تیڈا غُلام تیکُوں نہ چھوڑن چاہوے، کیوں جو او تیڈے تے تیڈے خاندان نال محبت کریندے تے تیڈے کولھ رہ تے خوش حال ہے، 17تاں اُوندے کَن دی لو کُوں دروازے دے نال لا تے سُووے نال سوراخ کر ڈے۔ وَل او ساری حیاتی تیڈا غُلام بنڑیا راہسی۔ آپنڑی لونڈی نال وی اِینویں ای کریں۔

18جیکر غُلام تیکُوں چِھی سال بعد چھوڑن چاہوے تاں اِینکُوں بُرا نہ مناویں کیوں جو اُوں ڈُو مزدُوراں دے برابر چِھی سال تئیں تیڈی خدمت کیتی ہے۔ وَل رب العالمین تیڈا خُدا تیڈے سارے کاروبار ءچ تیکُوں برکت ڈیسی۔

جانوراں دے پلوٹھے

19آپنڑے گائیں ڈاند تے بھیڈ بکریاں دے نَر پلوٹھیاں کُوں رب العالمین آپنڑے خُدا کیتے وقف کریں۔ ڈاند دے پلوٹھے کُوں کہیں کم اُتے نہ لاویں تے نہ ای بھیڈے لیلے دے وال مُنواویں۔ 20ہر سال تُوں تے تیڈا خاندان ایجھے پلوٹھے کُوں رب العالمین آپنڑے خُدا دے حضُور اُوں جاہ تے کھاوے جیہڑی رب العالمین آپنڑے مُقدّس تمبُو کیتے چُنڑسی۔

21جیکر پلوٹھے ءچ کوئی نُقص ہووے، مثلاً او اندھا یا لنگڑا ہووے یا اُوندے ءچ کوئی بِیا نُقص ہووے تاں اُونکُوں رب العالمین آپنڑے خُدا کیتے قُربان نہ کریں۔ 22ایجھے جانور کُوں تُوں آپنڑے شہر ءچ کھا سگدیں۔ پاک صاف تے ناپاک ڈوہائیں بندے اُونکُوں کھا سگدے ہِن جِینویں پہاڑی تے میدانی ہرن کُوں کھاندے ہِن۔ 23پر اُوندی رَت ہرگز نہ کھانویں بلکہ اُونکُوں پانڑی آلی کار زمین اُتے وِیٹ ڈیویں۔