اِستثنا 16

فسح دی عید

1[اے بنی اِسرائیل] ابیب دے مہینے1 ءچ رب العالمین آپنڑے خُدا دے ناں تے فسح دی عید منانویں، کیوں جو اِیں مہینے ءچ او تیکُوں رات دے ویلے مِصر ءچوں کڈھ آیا ہا۔ 2تُوں رب العالمین آپنڑے خُدا کیتے آپنڑے بھیڈ، بکریاں، گائیں یا ڈاند ءچوں فسح دی قُربانی اُوں جاہ تے پیش کریں جیہڑی رب العالمین آپنڑے ناں دے جلال کیتے چُنڑسی۔ 3گوشت نال خمیری روٹی نہ کھانویں۔ سَت ڈینہہ تئیں بے خمیری روٹی کھاویں، بالکل اُونویں ای جِینویں تُوں جلدی جلدی مِصر ءچوں نِکلدے ویلے کیتا ہا۔ ایہ روٹی جیہڑی تیڈی اُوں مُصیبت دو اِشارہ کریندی ہے جڈاں تُوں مصر تُوں روانہ تھیّا ہَویں، اِیں کیتے کھا جو تیکُوں ساری حیاتی او ڈینہہ یاد راہوے۔ 4عید دے سَت ڈینہاں تئیں تیڈے پُورے مُلک ءچ خمیر نظر نہ آوے۔

جیہڑی قُربانی تُوں عید دی پہلی ڈینہوار دی شام کُوں پیش کریں، اُوں گوشت ءچوں کُجھ وی اگلی سویل تئیں باقی نہ راہوے۔ 5فسح دی قُربانی آپنڑے کہیں وی شہر ءچ جیہڑا رب العالمین تیڈا خُدا تیکُوں ڈیوے، نہ پیش کریں، 6بلکہ صرف اُوں جاہ تے پیش کریں جیہڑی رب العالمین آپنڑے ناں دے جلال کیتے چُنڑسی۔ قُربانی دے جانور کُوں شام کُوں سِجھ لہندے ویلے ذبح کریں یعنی اُوں ویلے جڈاں تُوں مِصر تُوں نِکلیا ہَویں۔ 7وَل اُونکُوں بُھن تے اُوں جاہ تے کھانویں جیہڑی رب العالمین تیڈا خُدا چُنڑسی۔ اگلی سویل آپنڑے ڈیرے دو وَل ونجیں۔ 8عید دے پہلے چِھی ڈینہہ بے خمیری روٹی کھانویں۔ ستویں ڈینہہ رب العالمین آپنڑے خُدا دی عبادت کیتے مُقدّس اِجتماع ہووے۔ اِیں ڈینہوار کوئی کم نہ کیتا ونجے۔

فصل کپنڑ دی عید

9جیہڑی ڈینہوار تُوں ڈاتری گِھن تے اناج دی فصل دی کٹائی شروع کریں تاں اُوں ڈینہہ کنُوں سَت ہفتے گِنڑیں۔ 10وَل رب العالمین آپنڑے خُدا کیتے فصل کپنڑ آلی عید مناویں تے اُوندی ڈِتی ہوئی برکت دے مطابق خوشی نال نذرانہ پیش کریں۔ 11تے اُوں جاہ تے جیہڑی رب العالمین آپنڑے ناں دے جلال کیتے چُنڑسی، اُوندے حضُور خوشی مناویں۔ تیڈے بال بچّے، تیڈے غُلام تے لونڈیاں، تے تیڈے شہر ءچ راہوݨ آلے لاوی، پردیسی، یتیم تے بیوہ عورتاں سارے رب دے حضُور خوشی مناوݨ۔ 12اُنہاں حُکماں اُتے ضرور عمل کریں تے ایہ نہ بُھلیں جو تُوں مِصر ءچ غُلام ہَویں۔

چھپراں آلی عید

13فصل گہاوݨ تے انگُور دا رَس کڈھنڑ دے بعد تُوں سَت ڈینہاں تئیں چھپراں آلی عید منانویں۔ 14عید دے موقع تے تُوں، تیڈے بال بچّے، تیڈے غُلام تے لونڈیاں، تیڈے شہر ءچ راہوݨ آلے لاوی، پردیسی، یتیم تے بیوہ عورتاں سارے خوشی مناوݨ۔ 15جیہڑی جاہ رب العالمین تیڈا خُدا مُقدّس تمبُو کیتے چُنڑسی اُتھاں اُوندے ناں تے سَت ڈینہہ تئیں ایہ عید منانویں، کیوں جو رب العالمین تیڈا خُدا تیڈی ساری پیداوار تے سارے کم ءچ برکت پیسی۔ اِیں کیتے بہُوں خوشی مناویں۔

16بنی اِسرائیل دے سارے مرد سال ءچ ترے پھیری یعنی بے خمیری روٹی آلی عید، فصل کپنڑ آلی عید تے چھپراں آلی عید تے اُوں جاہ تے حاضر تھیوݨ جیہڑی رب العالمین تیڈا خُدا مُقدّس تمبُو کیتے چُنڑسی۔ کوئی وی رب العالمین دے حضُور خالی ہتھ نہ آوے۔ 17ہر کوئی آپنڑی اُوں برکت دے مطابق ڈیوے جیہڑی رب العالمین اُوندے خُدا اُونکُوں ڈِتی ہے۔

قاضی مقرر کرنڑا

18آپنڑے آپنڑے قبیلے دے ہر اُوں شہر ءچ جیہڑا رب العالمین تیڈا خُدا تیکُوں ڈیسی، قاضی تے ناظم مقرر کر جیہڑے اِنصاف نال لوکاں دے فیصلے کرݨ۔ 19نہ کہیں دا حق ماریں تے نہ کہیں دی طرفداری کریں۔ رشوت نہ گِھنیں کیوں جو رشوت عقلمنداں کُوں اندھا تے صادقاں دے گالھیں کُوں پُٹھا کر ڈیندی ہے۔ 20جیہڑا کُجھ اِنصاف ہے صرف اُوندی پیروی کریں تاں جو تُوں زندہ راہویں تے اُوں مُلک دا وارث بنڑ ونجیں جیہڑا رب العالمین تیڈا خُدا تیکُوں ڈیسی۔

بُت پرستی دی سزا

21جِتھاں تُوں رب العالمین آپنڑے خُدا کیتے قُربان گاہ بنڑانویں اُتھاں نہ یسِیرت دیوی دا لکڑ آلا تھمبا کھڑا کریں، 22تے نہ بُت دا پتھر آلا تھمبا کھڑا کریں۔ رب العالمین تیڈا خُدا اُنہاں چیزاں تُوں نفرت کریندے۔