اِستثنا 17

1تُساں رب العالمین آپنڑے خُدا کُوں کوئی ایجھی گاں، ڈاند یا بھیڈ بکری پیش نہ کرائے جیندے ءچ کوئی نُقص یا عیب ہووے کیوں جو ایجھی قُربانی اُوندے حضُور مکرُوہ ہے۔

2جیہڑے ویلے تُساں اُنہاں شہراں ءچ ونجو جیہڑے رب العالمین تُہاڈا خُدا تُہاکُوں ڈیسی تاں تھی سگدے جو تُہاڈے وچال کوئی مرد یا عورت رب العالمین تُہاڈے خُدا دے عہد کُوں تروڑ تے کوئی ایجھا کم کرے جیہڑا اُوندی نظر ءچ بُرا ہووے۔ 3یعنی او ڈُوجھے معبُوداں کُوں یا سِجھ، چَن یا تاریاں دے پُورے لشکر دی سجدہ کر تے عبادت کرے، جیندے بارے ءچ مَیں رب العالمین منع کیتے۔ 4جِیں ویلے تُہاکُوں ایجھی خبر مِلے تاں اُوندا پُورا پتہ کرائے۔ جیکر گالھ سچ نِکلے تے ایجھی مکرُوہ حرکت واقعی بنی اِسرائیل ءچ کیتی گئی ہووے 5تاں وَل قصُوروار مرد یا عورت کُوں شہر تُوں باہر گِھن وَنجائے تے سنگسار کر ڈیوائے۔ 6پر لازم ہے جو گھٹ تُوں گھٹ ڈُو یا ترے لوک اِیندی گواہی ڈیوݨ جو اُوں اِینویں کیتے۔ اُونکُوں سزائے موت ڈیوݨ کیتے ہِک گواہ کافی نئیں۔ 7اُونکُوں سنگسار کرݨ کیتے سبھ تُوں پہلے گواہ پتھر مارݨ تے اُوندے بعد باقی سارے لوک۔ اِینویں تُساں ایجھی بدی کُوں آپنڑے ءچوں مِٹا ڈیوائے۔

مُقدّس تمبُو دے کولھ عدالت

8جیکر تُہاڈے شہر دی عدالت کیتے کہیں معاملے دا فیصلہ کرݨ مُشکل تھی ونجے، بھانویں کہیں کُوں قتل کیتا گِیا ہووے، کہیں کُوں زخمی کیتا گِیا ہووے یا وَل کوئی بِیا مسئلہ ہووے، تاں اُوں جاہ تے اوائے جیہڑی رب العالمین تُہاڈا خُدا چُنڑسی۔ 9لاوی قبیلے دے کاہِناں کُوں تے اُوں ویلے خدمت کرݨ آلے قاضی کُوں آپنڑاں مقدمہ پیش کرائے تے او فیصلہ کرݨ۔ 10جیہڑا فیصلہ او اُوں جاہ تے کریسن جیہڑی رب العالمین چُنڑسی، اُونکُوں مننڑاں پوسی۔ جیہڑا کُجھ وی او آکھنڑ اُوندے اُتے احتیاط نال عمل کرائے۔ 11شریعت دی جیہڑی وی گالھ او تُہاکُوں سِکھاوݨ تے جیہڑا وی فیصلہ کرݨ اُوندے اُتے عمل کرائے۔ جیہڑا کُجھ او تُہاکُوں ڈساوݨ اُوندے تُوں سجے کھبے نہ تھیوائے۔

12جیہڑا بندہ مُقدّس تمبُو ءچ رب العالمین تُہاڈے خُدا دی خدمت کرݨ آلے قاضی یا کاہِن دی نہ سُنڑے، اُونکُوں سزائے موت ڈِتی ونجے۔ اِینویں تُساں ایجھی بدی کُوں بنی اِسرائیل ءچوں مِٹا ڈیوائے۔ 13وَل سبھ لوک ایہ سُنڑ تے ڈر ویسن تے ولا ایجھی گُستاخی کرݨ دی جُرأت نہ کریسن۔

بادشاہ دے بارے ءچ ہدایتاں

14جِیں ویلے تُساں اُوں مُلک ءچ داخل تھیؤ جیہڑا رب العالمین تُہاڈا خُدا تُہاکُوں ڈیوݨ آلا ہے تے تُساں اُوندے اُتے قبضہ کر تے اُوندے ءچ آباد تھی ونجو تے وَل آکھنڑ لگو جو، ”آؤ اساں وی آسُوں پاسُوں آلیاں قوماں آلی کار آپنڑے کیتے بادشاہ مقرر کرُوں۔“ 15تاں تُساں صرف اُوں بندے کُوں بادشاہ مقرر کرائے جِینکُوں رب العالمین تُہاڈا خُدا چُنڑسی۔ او تُہاڈے آپنڑے اِسرائیلی بِھرانواں ءچوں ہووے، پردیسی نہ ہووے۔ 16بادشاہ آپنڑے کیتے ڈھیر سارے گھوڑے نہ رکھے، نہ اُنہاں کُوں مُل گِھننڑ کیتے آپنڑے لوکاں کُوں مِصر بھیجے کیوں جو رب العالمین تُہاکُوں آکھ ڈِتے جو ”کڈھائیں وی اُڈے وَل نہ وَنجائے۔“ 17تُہاڈا بادشاہ زیادہ ذالاں وی نہ رکھے، نہ تاں اُوندا دل رب العالمین تُوں دُور تھی ویسی۔ تے او بہُوں زیادہ سونا چاندی وی کٹھا نہ کرے۔

18تخت نشینی دے ویلے او لاوی قبیلے دے کاہِناں دے سامنڑے اِیں شریعت دی نقل ہِک کتاب ءچ لِکھواوے۔ 19ایہ کتاب او آپنڑے کولھ رکھے تے ساری حیاتی اُونکُوں روزانہ پڑھدا راہوے تاں جو رب العالمین آپنڑے خُدا دا خوف مننڑا تے اِیں شریعت تے قانُوناں اُتے عمل کرنڑا سِکھے۔ 20اِینویں او آپنڑے آپ کُوں آپنڑے اِسرائیلی بِھرانواں تُوں زیادہ اہم نہ سمجھسی تے شریعت تُوں کھبے سجے نہ مُڑسی۔ وَل او تے اُوندی اولاد لمبی مُدت تئیں بنی اِسرائیل اُتے حکُومت کریسن۔