اِستثنا 18

کاہِناں تے لاویاں دا حصہ

1کاہِناں بلکہ سارے لاوی قبیلے کُوں بنی اِسرائیل دے باقی قبیلیاں نال کوئی حصہ یا میراث نہ مِلسی۔ او ساڑے ونجنڑ آلے نذرانیاں تے رب العالمین دے بئے نذرانیاں ءچوں میراث دے طور تے کھاوݨ۔ 2اُنہاں دے کولھ آپنڑے اِسرائیلی بِھرانواں آلی کار وراثتی زمین نہ ہوسی، بلکہ رب العالمین خود اُنہاں دی میراث ہوسی جِینویں اُوں وعدہ کر تے آکھے۔

3جِیں ویلے لوک کہیں ڈاند یا بھیڈ کُوں قُربان کرݨ تاں کاہِناں دا ایہ حق ہوسی جو مونڈھے، جبڑے تے اوجھڑی اُنہاں کُوں ڈِتی ونجے۔ 4آپنڑیاں فصلاں دا پہلا پھل وی اُنہاں کُوں ڈیوائے یعنی اناج، انگُور دا رَس، زیتون دا تیل تے بھیڈاں دی کتری ہوئی پہلی اُون۔ 5کیوں جو رب العالمین تُہاڈے خُدا تُہاڈے سارے قبیلیاں ءچوں لاویاں تے اُنہاں دی اولاد کُوں آپنڑے ناں اُتے ہمیشاں خدمت کرݨ کیتے چُنڑیا ہے۔

6کُجھ لاوی بنی اِسرائیل دے مختلف شہراں ءچ راہسن۔ جیکر اُنہاں ءچوں کوئی اُوں جاہ تے آوݨ چاہوے جیہڑی رب العالمین مُقدّس تمبُو کیتے چُنڑسی 7تاں او اُتھاں رب العالمین دے حضُور خدمت کرݨ آلے لاویاں آلی کار مُقدّس تمبُو ءچ رب العالمین آپنڑے خُدا دے ناں اُتے خدمت کر سگدے۔ 8اُونکُوں نذرانیاں ءچوں ڈُوجھے لاویاں دے برابر دا حصہ مِلسی، بھانویں اُونکُوں خاندانی ملکیت دے پیسے مِلے ہووݨ یا نئیں۔

جادُو کرݨ منع ہے

9جِیں ویلے تُساں اُوں مُلک ءچ داخل تھیؤ جیہڑا رب العالمین تُہاڈا خُدا تُہاکُوں ڈیندا پئے، تاں اُتھاں راہوݨ آلیاں قوماں دے مکرُوہ کم نہ سِکھائے۔ 10تُہاڈے وچال کوئی ایجھا بندہ نہ ہووے جیہڑا آپنڑے پوتر یا دِھی کُوں قُربانی دے طور تے بھاہ ءچ سٹے، یا غیب دانی کرݨ آلا یا فال گِیری کرݨ آلا یا قسمت دا حال ڈساوݨ آلا یا جادُوگری کرݨ آلا۔ 11تے نہ تُہاڈے وچال کوئی منتر پڑھن آلا، جِنّاں کُوں حاضر کرݨ آلا، جادُو نال غیب دانی کرݨ آلا یا مویاں نال رابطہ کرݨ آلا ہووے۔ 12جیہڑا وی اِینویں کریسی او رب العالمین دی نِگاہ ءچ نفرت دے لائق ہے۔ اُنہاں مکرُوہ کماں دی وجہ کنُوں رب العالمین تُہاڈا خُدا تُہاڈے اگُوں اُنہاں قوماں کُوں کڈھ ڈیسی۔ 13اِیں واسطے لازم ہے جو تُساں رب العالمین آپنڑے خُدا دے سامنڑے بے قصُور راہو۔

آوݨ آلے نبی دا وعدہ

14جِنہاں قوماں کُوں تُساں کڈھنڑ آلے ہیوے او اُنہاں دی سُنڑدیاں ہِن جیہڑے فال کڈھیندے تے غیب دانی کریندے ہِن۔ پر رب العالمین تُہاڈے خُدا تُہاکُوں اِینویں کرݨ دی اِجازت نئیں ڈِتی۔

15رب العالمین تُہاڈا خُدا تُہاڈے کیتے تُہاڈے بِھرانواں ءچوں میڈے جِیہا ہِک نبی کھڑا کریسی۔ اُوندی سُنڑائے 16کیوں جو سِینا پہاڑ اُتے اِجتماع دے ویلے تُساں خود رب العالمین آپنڑے خُدا تُوں درخاست کیتی ہئی جو ”اساں مزید رب العالمین آپنڑے خُدا دی اواز سُنڑݨ نئیں چاہندے تے نہ ایجھی بھڑکدی ہوئی بھاہ ڈیکھنڑ چاہندے ہیں، نہ تاں اساں مر ویسوں۔“ 17وَل رب العالمین میکُوں آکھیا، ”جیہڑا کُجھ او آدھے ہِن او ٹھیک ہے۔ 18مَیں اُنہاں ءچوں تَیں جِیہا ہِک نبی کھڑا کریساں۔ مَیں آپنڑا کلام اُوندے مُنہ ءچ پیساں تے او میڈی ہر گالھ اُنہاں تئیں پُچیسی۔ 19جِیں ویلے او نبی میڈے ناں ءچ کُجھ آکھے تاں لازم ہے جو تُساں اُوندی سُنڑو۔ جیہڑا نہ سُنڑسی اُوندے تُوں مَیں آپ جواب گِھنساں۔ 20جیکر کوئی نبی گُستاخ تھی تے میڈا ناں گِھن تے کُجھ آکھے جیہڑا مَیں اُونکُوں ڈساوݨ دا نئیں آکھیا یا بئے معبُوداں دا ناں گِھن تے کُجھ آکھے تاں اُونکُوں قتل کر ڈیوائے۔“

21جیکر تُہاڈے ذہن ءچ ایہ خیال آوے جو اساں کِینویں پتہ لاسگدے ہیں جو کوئی کلام واقعی رب العالمین ولُوں ہے یا نئیں، 22تاں جواب ایہ ہے جو جیکر نبی رب العالمین دا ناں گِھن تے کُجھ آکھے تے او پُورا نہ تھیوے تاں اِیندا مطلب ہے جو نبی دی گالھ رب العالمین ولُوں نئیں بلکہ اُوں گُستاخ تھی تے آکھیا ہا۔ اُوں تُوں نہ ڈرائے۔