اِستثنا 19

پناہ دے شہر

1رب العالمین تُہاڈا خُدا اُوں مُلک ءچ آباد قوماں کُوں تباہ کر ڈیسی جیہڑا او تُہاکُوں ڈیندا پئے۔ جیہڑے ویلے تُساں اُنہاں کُوں کڈھ تے اُنہاں دے شہراں تے گھراں ءچ آباد تھی ویسو، 2تاں تُساں ترے شہراں کُوں اَنج کر گِھنائے۔ 3پُورے مُلک کُوں جیہڑا رب العالمین تُہاڈا خُدا تُہاکُوں وراثت ءچ ڈیسی، ناپ تے ترے حصیاں ءچ تقسیم کرائے، تاں جو ہر او بندہ جیندے ہتُھوں کوئی قتل تھیّا ہووے، او پناہ دے اِنہاں شہراں ءچوں کہیں ءچ وی بھج سگے۔ 4او ایجھے شہر ءچ وَنج تے بدلہ گِھننڑ آلیاں تُوں محفوظ رہ سگسی، شرط ایہ ہے جو اُوں جاݨ بُجھ تے یا کہیں دُشمنڑی پارُوں کہیں کُوں نہ ماریا ہووے۔

5مثلاً ہِک بندہ آپنڑے کہیں ساتھی نال جنگل ءچ درخت کپنڑ کیتے ونجے تے کُہاڑی چلیندے ہوئے اُوندی کُہاڑی دستے ءچوں نِکل تے ڈُوجھے ساتھی کُوں وَنج لگے تے او مر ونجے تاں ایجھا بندہ پناہ دے اِنہاں شہراں ءچوں کہیں وی شہر ءچ بھج تے زندہ بچ سگدے۔ 6اِیں واسطے لازم ہے جو ایجھے شہراں دا سفر زیادہ نہ ہووے، نہ تاں خون دا بدلہ گِھننڑ آلا کاوڑ ءچ اُوندا پِچھا کر تے اُونکُوں پکڑ تے مار ڈیسی، بھانویں جو بھجنڑ آلا واجب القتل نئیں کیوں جو جیہڑا کُجھ اُوں کیتے او دُشمنڑی پارُوں نئیں بلکہ غیر اِرادی طور تے تھیّا ہا۔ 7اِیں واسطے مَیں تُہاکُوں حُکم ڈیندا پِیا ہاں جو تُساں پناہ دے ترے شہر مُقرر کر ڈیوائے۔

8بعد ءچ رب العالمین تُہاڈا خُدا تُہاڈیاں سرحداں مزید ودھا ڈیسی، جِینویں اُوں تُہاڈے پِیُو ڈاڈے نال قَسم کھا تے وعدہ کیتا ہا۔ او آپنڑے وعدے دے مطابق تُہاکُوں پُورا مُلک ڈیسی۔ 9پر شرط ایہ ہے جو تُساں احتیاط نال اُنہاں سارے حُکماں اُتے عمل کرو جیہڑے مَیں اَج تُہاکُوں ڈیندا پِیا ہاں یعنی تُساں رب العالمین آپنڑے خُدا نال پیار کرو تے ہمیشاں اُوندی راہ اُتے ٹُردے راہو۔ وَل جِیں ویلے پُورا مُلک تُہاکُوں مِل ونجے تاں تُساں پناہ دے ترے بئے شہر اَنج کر ڈیوائے، 10تاں جو تُہاڈے مُلک ءچ جیہڑا رب العالمین تُہاڈا خُدا تُہاکُوں میراث ءچ ڈیندا پئے، بے قصُور لوکاں کُوں جان تُوں نہ ماریا ونجے تے او خون تُہاڈی گردن اُتے نہ ہووے۔

11پر جیکر کوئی بندہ دُشمنڑی پارُوں کہیں دی تاڑ ءچ بہہ ونجے تے حملہ کر تے اُونکُوں مار سٹے، تے اُوندے بعد قاتل پناہ دے کہیں شہر ءچ بھج ونجے، 12تاں اُوندے شہر دے بزُرگ، لوکاں کُوں بھیج تے اُونکُوں واپس منگوا گِھننڑ تے اُونکُوں خون دا بدلہ گِھننڑ آلیاں دے حوالے کرݨ تاں جو اُونکُوں قتل کیتا ونجے۔ 13اُوندے اُتے رحم نہ کرائے۔ بلکہ تُساں بنی اِسرائیل ءچوں بے گُناہ دے خون وہاوݨ دا داغ مِٹا ڈیوائے تاں جو تُہاڈا بھلا تھیوے۔

زمیناں دی حد

14جِیں ویلے تُساں اُوں مُلک ءچ راہسو جیہڑا رب العالمین تُہاڈا خُدا تُہاکُوں قبضہ کرݨ کیتے ڈیسی تاں آپنڑی میراث دیاں اُنہاں حداں کُوں اگُوں پِچُھوں نہ کرائے جیہڑیاں تُہاڈے پِیُو ڈاڈے مقرر کیتیاں ہَن۔

عدالت ءچ گواہ

15تُساں کہیں کُوں ہِک گواہ دے آکھنڑ اُتے قصُوروار نئیں کھڑا سگدے۔ جیہڑا وی جُرم تھی ونجے، گھٹ تُوں گھٹ ڈُو یا ترے گواہاں دی ضرورت ہے، نہ تاں تُساں اُونکُوں قصُوروار نئیں کھڑا سگدے۔

16جیکر کوئی کہیں بندے اُتے بدی کرݨ دا اِلزام لاوے پر او گواہ کُوڑا ہووے 17تاں ڈوہائیں بندے رب العالمین دے حضُور کاہِناں تے اُوں ویلے خدمت کرݨ آلے قاضیاں کُوں آپنڑاں معاملہ پیش کرݨ۔ 18قاضی اُوندی چنگی طرحاں تفتیش کرݨ تے جیکر او گواہ کُوڑا نِکلے تے اُوں آپنڑے بِھرا اُتے غلط اِلزام لایا ہووے 19تاں اُوندے نال او کُجھ کیتا ونجے جیہڑا او آپنڑے بِھرا نال کراوݨ چاہندا ہا۔ اِینویں تُساں ایجھی بدی کُوں آپنڑے ءچوں مِٹا ڈیوائے۔ 20وَل باقی سارے لوک ایہ سُنڑ تے ڈر ویسن تے اگُوں تے تُہاڈے وچال ایجھا بُرا کم کرݨ دی جُرأت نہ کریسن۔ 21جِیندا قصُور ہووے اُوندے اُتے رحم نئیں کرنڑا۔ اصُول اِیہو ہووے جو جان دے بدلے جان، اکھ دے بدلے اکھ، ڈند دے بدلے ڈند، ہتھ دے بدلے ہتھ تے پیر دے بدلے پیر۔