اِستثنا 20

جنگ دے اصُول

1جڈاں وی تُساں جنگ کیتے نِکلو تے ڈیکھو جو دُشمنڑ گِنتری ءچ زیادہ ہِن تے اُنہاں کولھ گھوڑے تے رَتھ وی ہِن تاں اُنہاں تُوں نہ ڈرائے کیوں جو رب العالمین تُہاڈا خُدا جیہڑا تُہاکُوں مِصر ءچوں کڈھ آیا ہا، تُہاڈے نال ہے۔ 2جنگ کیتے نِکلنڑ تُوں پہلے کاہِن سامنڑے آوے تے فوج نال خطاب کرے 3تے آکھے ”سُنڑو اِسرائیلیو! اَج تُساں دُشمنڑ نال لڑن ویندے پئے ہیوے۔ اُنہاں دی وجہ تُوں پریشان نہ تھیوائے، اُنہاں تُوں خوف نہ کھوائے تے نہ گھبرائے، 4کیوں جو رب العالمین تُہاڈا خُدا خود تُہاڈے نال وَنج تے دُشمنڑ نال لڑسی، اُوہو تُہاکُوں فتح بخشیسی۔“

5وَل ناظم فوج نال خطاب کرݨ، ”کیا اِتھاں کوئی ہے جئیں آپنڑا نواں گھر بنڑایا ہووے پر اُونکُوں ہُنڑ تئیں مخصوص نہ کیتا ہووے؟ او واپس آپنڑے گھر چلیا ونجے۔ اِینویں نہ تھیوے جو او جنگ ءچ ماریا ونجے تے اُوندے گھر کُوں کوئی بِیا گِھن تے مخصوص کر ڈیوے۔ 6کیا کوئی ایجھا ہے جئیں انگُور دا باغ لایا ہووے تے ہُنڑ تئیں اُوندا پھل نہ کھادا ہووے؟ او آپنڑے گھر واپس چلیا ونجے۔ اِینویں نہ تھیوے جو او جنگ ءچ ماریا ونجے تے کوئی بِیا اُوندے باغ دا فائدہ چاوے۔ 7کیا کوئی ایجھا ہے جیندی منگنڑیں تھئی ہوئی ہووے پر ہُنڑ تئیں شادی نہ کیتی ہووے؟ او آپنڑے گھر واپس چلیا ونجے۔ اِینویں نہ تھیوے جو او جنگ ءچ ماریا ونجے تے کوئی بِیا اُوندی منگیتر نال شادی کر گِھنے۔“

8ناظم ایہ وی آکھنڑ، ”جے کوئی خوف زدہ یا پریشان ہے او آپنڑے گھر واپس چلیا ونجے تاں جو ڈُوجھے ساتھیاں کُوں بےدل نہ کرے۔“ 9ایہ گالھیں کرݨ تُوں بعد او فوجیاں اُتے افسر مقرر کر ڈیوݨ۔

10جِیں ویلے تُساں کہیں وی شہر اُتے حملہ کرݨ کیتے اُوندے نزدیک پُجو تاں پہلے اُوندے لوکاں کُوں ہتھیار سٹنڑ دا موقع ڈیوائے۔ 11جیکر او مَن ونجنڑ تے آپنڑے پھاٹک تُہاڈے کیتے کھول ڈیوݨ تاں او سارے لوک بغیر پیسے دے کم کر تے تُہاڈی خدمت کرݨ۔ 12پر جیکر او ہتھیار سٹنڑ تُوں اِنکار کر ڈیوݨ تے جنگ چِھڑ ونجے تاں وَل شہر کُوں گھیرا پا گِھنائے۔ 13جیہڑے ویلے رب العالمین تُہاڈا خُدا شہر کُوں تُہاڈے ہتھاں ءچ کر ڈیوے تاں اُوندے سارے مرداں کُوں قتل کر ڈیوائے۔ 14تُساں تریمتاں، بالاں تے ڈھورڈنگراں سمیت شہر دا سارا مال آپنڑے کولھ رکھ سگدے ہیوے۔ دُشمنڑ دیاں جیہڑیاں چیزاں رب العالمین تُہاڈا خُدا تُہاڈے حوالے کر ڈیوے، او تُساں اِستعمال کر سگدے ہیوے۔ 15تُساں اُنہاں شہراں نال وی اِینویں ای سلوک کرائے جیہڑے تُہاڈے تُوں بہُوں دُور ہِن تے آسُوں پاسُوں آلیاں قوماں دے نئیں۔

16پر جیہڑا شہر اُوں مُلک ءچ موجود ہے جیہڑا رب العالمین تُہاڈا خُدا تُہاکُوں میراث ءچ ڈیندا پئے، اُوندے ءچ موجود سارے جانداراں کُوں ہلاک کر ڈیوائے۔ 17اُنہاں کُوں مکمل طور تے ہلاک کر ڈیوائے، جِینویں رب العالمین تُہاڈے خُدا تُہاکُوں حُکم ڈِتے۔ اُنہاں ءچ حِتّی، اموری، کنعانی، فرِزّی، حِوّی تے یبُوسی سبھ شامل ہِن۔ 18جیکر تُساں اِینویں نہ کیتا تاں جیہڑیاں مکرُوہ حرکتاں او آپنڑے دیوتیاں دی پُوجا کرݨ ویلے کریندے ہِن، اُوہو او تُہاکُوں وی سکھیسن تے اِینویں تُہاڈے تُوں رب العالمین تُہاڈے خُدا دے خلاف گُناہ کرویسن۔

19جیکر کہیں شہر اُتے قبضہ کرݨ کیتے اُونکُوں دیر تئیں گھیرا پا تے رکھنڑا پووے تاں اُوندے درختاں کُوں کُہاڑی نال کپ تے تباہ نہ کرائے کیوں جو اُنہاں دا پھل تُہاڈے کھاوݨ دے کم آسی۔ اُنہاں کُوں نہ کپائے۔ درخت تُہاڈے دُشمنڑ تھوڑی ہِن جو تُساں اُنہاں اُتے حملہ کرو؟ 20صرف اُنہاں درختاں کُوں کپائے جِنہاں اُتے پھل نئیں لگدے۔ اُنہاں کُوں کپ تے گھیرے کیتے اِستعمال کیتا وَنج سگدے جِیں ویلے تئیں شہر تُہاڈے قبضے ءچ نہ آ ونجے۔