اِستثنا 21

نامعلوم قتل دا کفارہ

1جیہڑے ویلے تُساں اُوں مُلک ءچ آباد تھی ویسو جیہڑا رب العالمین تُہاکُوں قبضہ کرݨ کیتے ڈیندا پئے تاں تھی سگدے جو کوئی لاش کُھلے میدان ءچ کِتھائیں پئی ہووے۔ جیکر ایہ پتہ نہ ہووے جو اُونکُوں کئیں قتل کیتے، 2تاں پہلے آسُوں پاسُوں دے شہراں دے بزُرگاں تے قاضیاں تُوں پتہ کرو جو کیہڑا شہر لاش دے زیادہ نیڑے ہے۔ 3وَل اُوں شہر دے بزُرگ ہِک جوان ویہڑ چُنڑ گِھننڑ جیہڑی کڈھائیں کہیں کم ءچ اِستعمال نہ تھئی ہووے تے نہ پنجالی ءچ جُتی ہووے۔ 4او اُونکُوں ایجھی وادی ءچ گِھن ونجنڑ جِتھاں نہ تاں کڈھائیں ہَل چلیا ہووے، نہ پودے لگے ہووݨ تے جِتھاں ایجھی نہر ہووے جیہڑی پُورا سال واہندی ہووے۔ اُتھائیں ویہڑ دی گِچی بَھن ڈیوائے۔

5وَل لاوی قبیلے دے کاہِن نیڑے آوݨ کیوں جو رب العالمین تُہاڈے خُدا اُنہاں کُوں چُنڑ گِھدے جو او اُوندی خدمت کرݨ، رب العالمین دے ناں تے برکت ڈیوݨ تے سارے جھیڑیاں تے مار کُٹائی دا فیصلہ کرݨ۔ 6وَل لاش دے سبھ تُوں نیڑے آلے شہر دے بزُرگ آپنڑے ہتھ ویہڑ دی لاش اُتے دھووݨ 7تے آکھنڑ جو، ”اساں اِیں بندے کُوں قتل نئیں کیتا، نہ اساں ڈِٹھے جو کئیں ایہ کیتے۔ 8یا رب العالمین! بنی اِسرائیل دا ایہ کفارہ قبول فرما جِینکُوں تُوں فِدیہ ڈے تے چُھڑائے۔ آپنڑی قوم اِسرائیل کُوں اِیں بے قصُور دے قتل دا قصُوروار نہ بنڑا۔“ وَل مقتول دا کفارہ ڈِتا ویسی۔

9اِینویں تُساں اُوں بے قصُور بندے دے قتل دا داغ آپنڑے ءچوں مِٹا ڈیسو کیوں جو تُساں اُوہو کُجھ کیتا ہوسی جیہڑا رب العالمین دی نِگاہ ءچ چنگا ہے۔

جنگ ءچ قیدی تھیوݨ آلی عورت نال شادی

10جِیں ویلے تُوں آپنڑے دُشمنڑ نال جنگ کریں تے رب العالمین تیڈا خُدا تیکُوں فتح ڈیوے تے تُوں کُجھ کُوں قید کر گِھنیں 11تے جیکر اُنہاں ءچوں تیکُوں کوئی خُوب صورت عورت نظر آوے جیندے نال تیڈا دل لگ ونجے تاں تُوں اُوندے نال شادی کر سگدیں۔ 12اُونکُوں آپنڑے گھر گِھن آ، او آپنڑاں سر مُنواوے، آپنڑے ناخون کٹے 13تے او کپڑے بدلے جیہڑے قید تھیوݨ ویلے پاتی کھڑی ہئی1۔ او پُورا ہِک مہینہ آپنڑے ماء پِیُو کیتے ماتم کرے۔ وَل تُوں اُوندے نال شادی کر تے اُوندا پایا بنڑ سگدیں تے او تیڈی ذال ہوسی۔

14جیکر او تیکُوں بعد ءچ پسند نہ آوے تاں وَل جِتھاں اُوندا دل چاہوے اُونکُوں ونجنڑ ڈے۔ تیکُوں اُونکُوں ویچنڑ یا اُوندے نال لونڈی جِیہا سلوک کرݨ دی اِجازت نئیں کیوں جو تُوں اُوندی بے حُرمتی کیتی ہے۔

پلوٹھے دے حقُوق

15جیکر کہیں مرد دیاں ڈُو ذالاں ہووݨ تے ہِک کُوں او پیار کریندا ہووے تے ڈُوجھی کُوں نئیں تے ڈوہائیں ذالاں تُوں پوتر تھیوݨ، پر پلیٹھی دا بال اُوں ذال دا پوتر ہووے جیندے نال او پیار نئیں کریندا 16تاں جِیں ویلے پِیُو آپنڑی ملکیت وصیّت ءچ تقسیم کرے تاں لازم ہے جو او پلوٹھے پوتر دا وراثتی حق اصل پلوٹھے کُوں ڈیوے۔ اُونکُوں پلوٹھے دا حق اُوں ذال دے پوتر کُوں ڈیوݨ دی اِجازت نئیں جِینکُوں او پیار کریندے۔ 17اُونکُوں اُوں ذال دے پوتر کُوں جیندے نال او پیار نئیں کریندا، آپنڑا اصلی پلوٹھا مَن تے ڈُوجھے پوتراں دی نسبت وراثت دا ڈُونڑا حصہ ڈیونڑے کیوں جو او آپنڑے پِیُو دی طاقت دا پہلا پھل ہے۔ پلوٹھے دا حق اُوندا ای ہے۔

نافرمان پوتر

18جیکر کہیں دا پوتر ضِدی تے باغی تھی گِیا ہووے جیہڑا آپنڑے ماء پِیُو دی فرمانبرداری نئیں کریندا، تے تنبیہ کرݨ دے باوجود او اُنہاں دی گالھ نئیں سُنڑدا 19تاں ماء پِیُو اُونکُوں پکڑ تے شہر دے پھاٹک تے گِھن ونجنڑ جِتھاں بزُرگ کٹھے تھیندے ہِن۔ 20تے اُنہاں کُوں آکھنڑ، ”ساڈا پوتر ضِدی تے باغی تھی گئے۔ ایہ ساڈی نئیں سُنڑدا تے عیاش تے شرابی ہے۔“ 21وَل شہر دے سارے مرد اُونکُوں سنگسار کر تے مار ڈیوݨ۔ اِینویں تُساں ایجھی بدی کُوں آپنڑے ءچوں مِٹا ڈیسو۔ سارے اِسرائیلی ایہ سُنڑ تے ڈر ویسن۔

سزائے موت دے مُجرم کُوں دفناوݨ دے اصُول

22جیکر کہیں ایجھا گُناہ کیتا ہووے جیندی سزا موت ہے تے او ماریا ونجے تے تُساں اُوندی لاش کُوں کہیں درخت نال لٹکا ڈیؤ2 23تاں اگلی سویل تئیں اُونکُوں اُتھاں نہ چُھڑائے بلکہ اُونکُوں اُوں ڈینہہ ای دفنا ڈیوائے کیوں جو جِینکُوں درخت اُتے لٹکایا گئے اُوندے اُتے خُدا دی لعنت ہے۔ اُونکُوں اُوں ڈینہہ ای دفنا ڈیوائے تاں جو او اُوں مُلک کُوں ناپاک نہ کر ڈیوے جیہڑا رب العالمین تُہاڈا خُدا تُہاکُوں میراث ءچ ڈیندا پئے۔