اِستثنا 22

مدد کرݨ کیتے تیار راہو

1جیکر تُہاکُوں بنی اِسرائیل دے کہیں بِھرا دا ڈاند یا بھیڈ بکری رستہ بُھلی ہوئی مِلے تاں اُونکُوں نظرانداز نہ کرائے بلکہ اُونکُوں اُوندے مالک تئیں پُچائے۔ 2جیکر مالک دا گھر نیڑے نہ ہووے یا تُہاکُوں پتہ نہ ہووے جو اِیندا مالک کوݨ ہے تاں وَل جانور کُوں آپنڑے گھر گِھن اوائے تے اُوں ویلے تئیں سنبھالی رکھائے جئیں تئیں اُوندا مالک گولھیندا ہویا آ نہ ونجے۔ وَل جانور اُونکُوں ڈے ڈیوائے۔ 3اُوندے بُھلے ہوئے کھوتے تے گُمے ہوئے کپڑے نال وی اِینویں ای کرائے بلکہ اُوندی جیہڑی وی گُمی ہوئی شے تُہاکُوں مِلے، اُونکُوں ڈے ڈیوائے تے نظرانداز نہ کرائے۔

4جیکر تُساں آپنڑے کہیں اِسرائیلی بِھرا دا کھوتا یا ڈاند رستے ءچ ڈھٹھا ہویا ڈیکھو تاں اُونکُوں نظر انداز نہ کرائے۔ جانور کُوں کھڑا کرݨ ءچ آپنڑے بِھرا دی مدد کرائے۔

قُدرت دے تابع راہو

5عورت کیتے مرد دے کپڑے پاوݨ منع ہے تے اِینویں ای مرد کیتے عورت دے کپڑے پاوݨ منع ہے۔ جیہڑا اِینویں کریندے او رب العالمین تُہاڈے خُدا دی نِگاہ ءچ مکرُوہ ہے۔

6جیکر تُہاکُوں رستے ءچ کہیں درخت یا زمین اُتے آلہنڑاں مِلے تے پکھی آپنڑے بچیاں یا انڈیاں اُتے بیٹھا ہووے تاں بچیاں کُوں ماء سمیت نہ پکڑائے۔ 7تُہاکُوں بچّے گِھننڑ دی تاں اِجازت ہے پر ماء کُوں چھوڑ ڈیوائے تاں جو تُہاڈا بھلا تھیوے تے تُساں دیر تئیں زندہ راہو۔

8نواں مکان بنڑاوݨ ویلے چھت دے چارے پاسُوں کندھی ڈیوائے۔ اِینویں نہ تھیوے جو کوئی بندہ اُتھوں کنُوں ڈھے پووے تے تُساں اُوندی موت دے ذمہ دار بنڑ ونجو۔

9آپنڑے انگُور دے باغ ءچ ڈُو قِسم دے بیج نہ رہائے، نہ تاں سبھ کُجھ خُدا کیتے مخصوص تے مُقدّس ہوسی، نہ صرف او فصل جیہڑی تُوں انگُوراں دے علاوہ لائی بلکہ انگُور وی1۔

10ڈاند تے کھوتے کُوں جوڑ تے ہَل نہ چلائے۔

11ایجھے کپڑے نہ پوائے جیہڑے اُون تے لینن دی ملاوٹ نال بنڑے ہوئے ہووݨ۔

12تُساں آپنڑی چادر دے چارے کناریاں اُتے پُھمنڑ لوائے۔

ازدواجی زندگی دی پاکیزگی

13جیکر کوئی بندہ شادی کر تے ذال دے کولھ ونجنڑ تُوں بعد اُونکُوں پسند نہ کرے 14تے اُوندی بدنامی کر تے آکھے، ”اِیں عورت نال شادی کرݨ تُوں بعد میکُوں پتہ لگے جو ایہ کُنواری نئیں۔“ 15تاں وَل ذال دے ماء پِیُو شہر دے پھاٹک تے کٹھے تھیوݨ آلے بزُرگاں کولھ ثبوت2چا آوݨ جو ساڈی دِھی شادی تُوں پہلے کُنواری ہئی۔ 16چھوہیر دا پِیُو بزُرگاں کُوں آکھے، ”مَیں آپنڑی دِھی دی شادی اِیں جوان نال کیتی ہے پر ہُنڑ ایہ اُوندے تُوں نفرت کریندے۔ 17ہُنڑ ایہ اُوندی بدنامی کریندے تے آدھے جو، ’میکُوں پتہ لگے جو تیڈی دِھی کُنواری نئیں۔‘ پر میڈی دِھی دے کُنواری ہووݨ دا ثبوت ایہ ہے۔“ وَل ماء پِیُو شہر دے بزُرگاں کُوں چادر ڈِکھاوݨ۔

18وَل بزُرگ اُوں بندے کُوں پکڑ تے کوڑے لاوݨ۔ 19اِیندے علاوہ اُونکُوں جُرمانے دے طور تے چھوہیر دے پِیُو کُوں چاندی دے سو سکے ڈیونڑے پوسن کیوں جو اُوں بنی اِسرائیل دی ہِک کُنواری دی بدنامی کیتی ہے۔ لازم ہے جو او اُوں چھوہیر کُوں آپنڑی ذال بنڑا تے رکھے۔ او ساری حیاتی اُونکُوں طلاق نئیں ڈے سگدا۔

20پر جیکر اُوں پئے دی گالھ سچ نِکلے تے چھوہیر دے شادی تُوں پہلے کُنواری ہووݨ دا ثبوت نہ مِلے 21تاں بزُرگ اُونکُوں اُوندے پِیُو دے گھر گِھن آوݨ تے اُتھاں شہر دے لوک اُونکُوں سنگسار کر ڈیوݨ کیوں جو پِیُو دے گھر راہندے ہوئے اُوں بدکاری کر تے بنی اِسرائیل ءچ ہِک مکرُوہ کم کیتے۔ اِینویں تُساں ایجھی بدی کُوں آپنڑے ءچوں مِٹا ڈیوائے۔ 22جیکر کوئی بندہ کہیں دی ذال نال زِنا کریندے ہوئے پکڑیا ونجے تاں ڈوہائیں کُوں قتل کر ڈِتا ونجے۔ اِینویں تُساں ایجھی بدی کُوں آپنڑے ءچوں مِٹا ڈیوائے۔

23جیکر کہیں آبادی ءچ کہیں جوان دی مُلاقات کہیں ایجھی کُنواری نال تھی ونجے جیندی منگنڑیں کہیں بئے نال تھئی ہووے تے او اُوندے نال ہمبستری کرے 24تاں لازم ہے جو تُساں اُنہاں ڈوہائیں کُوں شہر دے پھاٹک تے گِھن اوائے تے سنگسار کر تے مار ڈیوائے۔ چھوہیر کُوں اِیں کیتے جو اُوں آبادی ءچ ہوندے ہوئے کہیں کُوں مدد کیتے نئیں سڈیا تے مرد کُوں اِیں کیتے جو اُوں کہیں بئے دی منگ دی بے حُرمتی کیتی ہے۔ اِینویں تُساں ایجھی بدی کُوں آپنڑے ءچوں مِٹا ڈیوائے۔

25جیکر مرد کہیں غیر آباد جاہ تے کہیں بئے دی منگیتر نال جنسی زیادتی کرے تاں وَل صرف مرد کُوں سزائے موت ڈِتی ونجے۔ 26چھوہیر کُوں کوئی سزا نہ ڈیوائے، کیوں جو اُوں ایجھا کُجھ نئیں کیتا جیندی سزا موت ہووے۔ زیادتی کرݨ آلے بندے دی حرکت اُوں بندے دے برابر ہے جئیں کہیں اُتے حملہ کر تے اُونکُوں قتل کر ڈِتا ہووے۔ 27کیوں جو چھوہیر اُونکُوں اُتھاں مِلی جِتھاں لوک نہ ہَن تے بے شک چھوہیر مدد کیتے چیخی وی ہئی پر اُتھاں اُونکُوں بچاوݨ آلا کوئی نہ ہا۔

28جیکر کوئی مرد ایجھی چھوہیر نال جنسی زیادتی کرے جیندی منگنڑیں نہ تھئی ہووے تے او پکڑے ونجنڑ 29تاں مرد اُوں چھوہیر دے پِیُو کُوں چاندی دے پنجھاہ سکے ڈیوے۔ لازم ہے جو او مرد اُوں چھوہیر نال شادی کرے، کیوں جو اُوں اُوندی بے حُرمتی کیتی ہے۔ او ساری حیاتی اُونکُوں طلاق وی نئیں ڈے سگدا۔

30آپنڑے پِیُو دی ذال نال شادی کرݨ منع ہے۔ جیہڑا اِینویں کریندے او آپنڑے پِیُو دی بے حُرمتی کریندے۔