اِستثنا 23

مُقدّس جماعت ءچ شامل تھیوݨ دیاں شرطاں

1رب العالمین دے مُقدّس اِجتماع ءچ اُوں بندے کُوں شامل تھیوݨ دی اِجازت نئیں جیندے خُصئے کُچل تے یا آلت کٹ تے خوجہ بنڑایا گِیا ہووے1۔ 2اِینویں ای او وی رب العالمین دے مُقدّس اِجتماع ءچ شامل نہ تھیوݨ جیہڑے ناجائز تعلقات دے نتیجے ءچ پیدا تھئے ہِن۔ اُنہاں دی اولاد وی ڈاہویں پُشت تئیں اُوندے ءچ شامل نہ تھیوے۔

3بنی عمُون یا بنی موآب دا کوئی وی بندہ مُقدّس اِجتماع ءچ شامل نئیں تھی سگدا۔ اُنہاں دی اولاد وی ڈاہویں پُشت تئیں شریک نئیں تھی سگدی، 4کیوں جو جیہڑے ویلے تُساں مِصر ءچوں نِکل تے آئے ہَوے تاں او روٹی تے پانڑی چا تے تُہاکُوں مِلنڑ نہ آئے ہَن۔ نہ صرف ایہ پر اُنہاں مسوپتامیہ دے شہر فتور ءچ وَنج تے بلعام بِن بعور کُوں پیسے ڈِتے تاں جو او تُہاڈے اُتے لعنت کرے2۔ 5پر رب العالمین تُہاڈے خُدا بلعام دی نہ سُنڑی بلکہ اُوندی لعنت برکت ءچ بدل ڈِتی، کیوں جو رب العالمین تُہاڈا خُدا تُہاڈے نال پیار کریندے۔ 6ساری عُمر ایجھا کُجھ نہ کرائے جیندے نال اُنہاں قوماں دی سلامتی تے بھلائی ہووے۔

7پر ادُومیاں نال نفرت نہ رکھائے کیوں جو او تُہاڈے بِھرا ہِن۔ اِینویں ای مِصریاں نال وی نفرت نہ رکھائے کیوں جو تُساں اُنہاں دے مُلک ءچ پردیسی دے طور تے ریہے ہَوے۔ 8اُنہاں دی تریجھی نسل دے لوک رب العالمین دے مُقدّس اِجتماع ءچ شریک تھی سگدے ہِن۔

لشکر گاہ کُوں پاک صاف رکھنڑا

9آپنڑے دُشمنڑ نال جنگ کرݨ ویلے لشکر گاہ ءچ آپنڑے آپ کُوں ہر ناپاک شے تُوں دُور رکھائے۔ 10مثلاً جیکر کوئی بندہ رات دے ویلے سُتے ہوئے ناپاک تھی ونجے تاں او ڈیرے تُوں باہر ونجے تے سارا ڈینہہ باہر راہوے۔ 11ڈینہہ لہندے ویلے او دھاں گِھنے تے سِجھ لہنڑ دے بعد ڈیرے ءچ وَل آ سگدے۔

12آپنڑی حاجت رفع کرݨ کیتے ڈیرے دے باہر کوئی جاہ مقرر کرائے۔ 13جِیں ویلے کہیں کُوں حاجت کیتے بَہونڑاں ہووے تاں او اُوندے کیتے ہِک کھڈا مارے تے بعد ءچ اُونکُوں مِٹی نال ڈھک ڈیوے۔ اِیں واسطے کھڈا بنڑاوݨ کیتے آپنڑے سامان ءچ کوئی رمبی رکھنڑ ضروری ہے۔

14رب العالمین تُہاڈا خُدا تُہاڈے ڈیرے ءچ تُہاڈے وچال ٹُردے پِھردے، تاں جو تُہاکُوں محفوظ رکھے تے تُہاڈے دُشمنڑاں کُوں تُہاڈے ہتھ ءچ کر ڈیوے۔ اِیں واسطے ایہ لازم ہے جو تُہاڈا ڈیرہ اُوندے کیتے پاک راہوے۔ اِینویں نہ تھیوے جو او اُتھاں کوئی گند ڈیکھ تے تُہاڈے تُوں دُور تھی ونجے۔

فرار تھیوݨ آلے غُلاماں دی مدد کرنڑا

15جیکر کوئی غُلام آپنڑے مالک تُوں بھج تے تیڈے کولھ پناہ گِھنے تاں تُوں اُونکُوں اُوندے مالک کُوں واپس نہ کریں۔ 16او تیڈے نال تے تیڈے وچال اُوں شہر ءچ ای راہوے جیہڑا اُونکُوں پسند آوے۔ تُوں اُونکُوں نہ ستاویں۔

جِسم فروشی منع ہے

17کہیں دیوتا دی خدمت ءچ جِسم فروشی کرݨ بنی اِسرائیل دی ہر عورت تے مرد کیتے منع ہے۔ 18مَنت پُوری تھیوݨ ویلے نہ کہیں طوائف دا پیسہ تے نہ کُتے دے پیسے3 رب دے گھر ءچ گِھن اوائے، کیوں جو رب العالمین تُہاڈے خُدا دی نِگاہ ءچ ایہ ڈوہائیں کم مکرُوہ ہِن۔

آپنڑے بِھرانواں تُوں سُود نہ گِھنائے

19جِیں ویلے تُوں آپنڑے کہیں اِسرائیلی بِھرا کُوں قرض ڈیویں بھانویں او پیسے، روٹی یا کوئی بئی شے ہووے تاں واپس گِھندے ویلے اُوندے تُوں سُود نہ گِھنیں۔ 20تُوں پردیسی تُوں سُود گِھن سگدیں پر آپنڑے اِسرائیلی بِھرا تُوں نئیں تاں جو اُوں مُلک ءچ جیندے اُتے تُوں قبضہ کرݨ کیتے ویندا پِیا ہیں، رب العالمین تیڈا خُدا تیڈے ہر کم ءچ برکت ڈیوے۔

آپنڑی مَنت پُوری کریں

21جیہڑے ویلے تُوں رب العالمین آپنڑے خُدا دے حضُور مَنت منیں تاں اُونکُوں پُورا کرݨ ءچ دیر نہ کریں۔ رب العالمین تیڈا خُدا یقیناً تَیں تُوں اِیندا مطالبہ کریسی۔ جیکر تُوں اِینکُوں پُورا نہ کیتا تاں تُوں قصُوروار ہوسیں۔ 22جیکر تُوں مَنت نہ منیں تاں تُوں قصُوروار نہ ہوسیں۔ 23پر جیہڑا کُجھ تُوں آپنڑی دِلی خوشی نال رب العالمین آپنڑے خُدا دے حضُور مَنت مَن تے آکھیں تاں ہر صورت ءچ اُونکُوں پُورا کریں۔

اِسرائیلی بِھرا دی پیداوار ءچوں کھاوݨ دا اصُول

24آپنڑے اِسرائیلی بِھرا دے انگُوراں دے باغ ءچوں لنگھدے ویلے تیکُوں جِتنا دل آکھے انگُور کھاوݨ دی اِجازت ہے پر کہیں برتن ءچ پھل کٹھا کرݨ دی اِجازت نئیں۔ 25اِینویں ای کہیں اِسرائیلی بِھرا دے اناج دے کھیت ءچوں لنگھدے ویلے تیکُوں ہتھاں نال اناج دے سِٹے بَھننڑ دی اِجازت ہے پر ڈاتری اِستعمال نہ کریں۔