اِستثنا 24

طلاق تے ڈُوجھی شادی

1جیکر کوئی بندہ کہیں عورت نال شادی کرے پر بعد ءچ او اُونکُوں پسند نہ کرے، کیوں جو اُونکُوں اُوندی کہیں شرمناک گالھ دا پتہ لگ گئے تے او طلاق نامہ لِکھ تے عورت کُوں ڈیوے تے اُونکُوں آپنڑے گھرُوں کڈھ تے واپس بھیج ڈیوے۔ 2تے اُوندے بعد اُوں عورت دی شادی کہیں ڈُوجھے جوان نال تھی ویندی ہے، 3تے او وی اُونکُوں پسند نئیں کریندا، او وی طلاق نامہ لِکھ تے اُوں عورت کُوں ڈیوے تے آپنڑے گھرُوں کڈھ ڈیوے یا تھی سگدے جو ڈُوجھا پایا مر ونجے، 4تاں عورت دے پہلے پئے کُوں اُوندے نال ولا شادی کرݨ دی اِجازت نئیں کیوں جو او عورت اُوندے کیتے ناپاک ہے۔ ایجھی حرکت رب العالمین دی نِگاہ ءچ مکرُوہ ہے۔ تُوں ایجھے گُناہ نال اُوں مُلک کُوں ناپاک نہ کریں جیہڑا رب العالمین تیڈا خُدا تیکُوں میراث ءچ ڈیندا پئے۔

مزید ہدایتاں

5جیکر کہیں بندے نوِیں نوِیں شادی کیتی ہووے تاں تُوں اُونکُوں جنگ کیتے نہ بھیجیں تے نہ اُونکُوں کوئی ذمہ داری ڈیویں۔ ہِک سال تئیں او اِیں ذمہ داری تُوں ازاد رہ تے آپنڑے گھر ءچ آپنڑی ذال کُوں خوش رکھے۔

6جے کوئی تیڈے تُوں اُدھار گِھنے تاں تُوں ضمانت دے طور تے اُوندی چکّی بلکہ اُوندا اُتلا پُڑ وی نہ گِھنیں، کیوں جو اِینویں کرݨ نال تُوں اُوندا روزگار گِھن گِھنسیں۔

7جے کوئی بندہ پکڑیا ونجے جئیں آپنڑے کہیں اِسرائیلی بِھرا کُوں اغوا کر تے غُلام بنڑا گِھدا ہووے یا ویچ ڈِتا ہووے تاں اُونکُوں سزائے موت ڈِتی ونجے۔ اِینویں تُوں ایجھی بُرائی کُوں آپنڑے ءچوں مِٹا ڈیویں۔

8جیکر تیکُوں چم دی وبائی بیماری لگ ونجے تاں وڈی احتیاط نال لاوی قبیلے دے کاہِناں دیاں ساریاں ہدایتاں اُتے عمل کریں۔ جیہڑا وی مَیں اُنہاں کُوں حُکم ڈِتے تُوں اُونکُوں پُورا کریں۔ 9یاد کر جو رب العالمین تیڈے خُدا مریم دے نال کیا کیتا1 جیہڑے ویلے تُوں مِصر تُوں نِکل تے سفر کریندا پِیا ہَویں۔

غریباں دے حقُوق

10آپنڑے ہمسائے کُوں اُدھار ڈیوݨ ویلے گِروی دے طور تے کوئی شے گِھننڑ کیتے اُوندے گھر نہ ونجیں 11بلکہ باہر کھڑ تے اُوندا اِنتظار کریں تے او آپ تیکُوں گِروی رکھی گئی شے کڈھ ڈیسی۔ 12جیکر او اِتنا غریب ہووے جو صرف آپنڑی چادر گِروی رکھنڑ کیتے ڈے سگے تاں وَل رات دے ویلے او چادر تیڈے کولھ نہ راہوے۔ 13اُونکُوں سِجھ لہوݨ تئیں واپس کر ڈیویں تاں جو قرض دار اُونکُوں اُتے گِھن تے سم سگے۔ وَل او تیکُوں برکت ڈیسی تے رب العالمین تیڈے خُدا دی نِگاہ ءچ ایہ کم نیکی ہوسی۔

14غریب تے ضرورت مند مزدُور نال زیادتی نہ کریں، بھانویں او اِسرائیلی بِھرا ہووے یا پردیسی۔ 15اُونکُوں ہر روز سِجھ لہوݨ تُوں پہلے اُوندی مزدُوری ڈے ڈیویں، کیوں جو اُوندا اِیندے نال گُزارہ تھیندے، کِتھائیں او رب العالمین دے حضُور تیڈی شکایت نہ کر ڈیوے تے تُوں قصُوروار تھیویں۔

16ماء پِیُو کُوں اُنہاں دے بالاں دے قصوراں پارُوں سزائے موت نہ ڈِتی ونجے، نہ ای بالاں کُوں اُنہاں دے ماء پِیُو دے قصوراں پارُوں۔ جیکر کہیں کُوں سزائے موت ڈیونڑیں ہووے تاں اُوندے اُوں گُناہ پارُوں ڈیویں جیہڑا اُوں خود کیتا ہووے۔

17پردیسیاں تے یتیماں دے حقُوق قائم رکھیں۔ اُدھار ڈیوݨ ویلے ضمانت ءچ بیوہ دی چادر نہ گِھنیں۔ 18او ویلا یاد کر جو تُوں وی مِصر ءچ غُلام ہَویں تے رب العالمین تیڈے خُدا تیکُوں اُتھوں چُھڑایا ہا۔ اِیں واسطے مَیں تیکُوں ایہ حُکم ڈیندا پِیا ہاں۔

19جِیں ویلے تُوں فصل کپیں تے ہِک گٹھا بُھل تے رَڑھ ءچ چھوڑ آویں تاں وَل اُونکُوں چاوݨ کیتے پِچُھوں تے نہ ونجیں۔ اُونکُوں پردیسیاں، یتیماں تے بیوہ عورتاں کیتے اُتھائیں چھوڑ ڈیویں۔ وَل رب العالمین تیڈا خُدا تیڈے ہر کم ءچ برکت ڈیسی۔ 20جڈاں تُساں آپنڑے زیتون دے درختاں کُوں جھاڑو تاں اُنہاں دیاں شاخاں کُوں دوبارہ نہ جھڑائے بلکہ بچیا ہویا پھل پردیسیاں، یتیماں تے بیوہ عورتاں کیتے چھوڑ ڈیوائے۔ 21اِینویں ای آپنڑے انگُور تروڑن کیتے ہِکے پھیری باغ ءچوں لنگھیں۔ اُوندے بعد اُونکُوں نہ چھیڑیں۔ جیہڑا پھل بچے او پردیسیاں، یتیماں تے بیوہ عورتاں کیتے چھوڑ ڈیویں۔ 22او ویلا یاد کر جو تُوں خود مِصر ءچ غُلام ہَویں، اِیں وجہ تُوں مَیں تیکُوں ایہ حُکم ڈیندا پِیا ہاں۔