اِستثنا 25

کوڑے مارݨ دی سزا

1جیکر لوکاں ءچ کوئی جھیڑا ہووے تے او آپنڑاں معاملہ عدالت ءچ پیش کرݨ تاں قاضی مقدمہ سُنڑ تے بے قصُور دے حق ءچ تے قصُوروار دے خلاف فیصلہ کرݨ۔ 2جیکر قصُوروار کوڑے مارݨ دے لائق نِکلے تاں قاضی اُونکُوں زمین اُتے مُنہ دے بھار لٹواوے تے اُونکُوں آپنڑے سامنڑے اُوندے قصُور دے مطابق کوڑے مرواوے۔ 3اُونکُوں ودھ تُوں ودھ چالیہہ کوڑے مارے ونجنڑ۔ اِیں تُوں زیادہ نہ مروائے نہ تاں تیڈا بِھرا تیڈی نِگاہ ءچ حقیر تھی ویسی۔

ڈاند دے نال بے اِنصافی نہ کریں

4فصل گہاوݨ ویلے ڈاند دا مُنہ نہ بدھیں۔

سکے بِھرا دی بیوہ نال شادی

5جیکر ڈُو بِھرا کٹھے راہندے ہووݨ تے ہِک بے اولاد مر ونجے تاں ڈُوجھے دا فرض ہے جو او بیوہ نال شادی کر گِھنے۔ او بیوہ آپنڑے پئے دے خاندان دے سوا کہیں بئے نال شادی نہ کرے بلکہ صرف آپنڑے پئے دے بِھرا نال۔ 6اِیں بِھرا تُوں جیہڑا پہلا پوتر جمسی او پہلے پئے دے ناں تُوں اکھویسی۔ اِیں طریقے نال مرحُوم دا ناں بنی اِسرائیل ءچ قائم راہسی۔

7جیکر او مرد آپنڑی بھرجائی نال شادی نہ کرݨ چاہوے تاں بھرجائی شہر دے پھاٹک تے کٹھے تھیوݨ آلے بزُرگاں کولھ ونجے تے اُنہاں کُوں آکھے جو ”میڈے مرحُوم پئے دے بِھرا میڈے نال شادی تُوں اِنکار کر ڈِتے، او آپنڑاں فرض ادا کرݨ کیتے تیار نئیں جو اُوندے بِھرا دا ناں قائم راہوے۔“ 8وَل شہر دے بزُرگ اُوں بندے کُوں سڈ تے اُونکُوں سمجھاوݨ۔ جیکر او اِیندے باوجود وی اُوندے نال شادی کرݨ تُوں اِنکار کرے 9تاں اُوندی بھرجائی بزُرگاں دی موجودگی ءچ اُوندے نیڑے ونج تے اُوندی ہِک جُتی لہا گِھنے تے اُوندے مُنہ اُتے تُھک سَٹ تے آکھے، ”اُوں بندے نال اِیہو سلوک کیتا ویندے جیہڑا آپنڑے بِھرا دی نسل قائم رکھنڑ کیتے تیار نئیں۔“ 10آئندہ بنی اِسرائیل ءچ اُوں بندے دے خاندان کُوں ”لہائی ہوئی جُتی آلا“ آکھیا ویسی۔

جھیڑے ءچ گندی حرکت نہ کریں

11جِیں ویلے ڈُو بندے لڑدے پئے ہووݨ تے ہِک دی ذال آپنڑے پئے کُوں بچاوݨ کیتے مخالف دا عضو ِ تناسل پکڑ گِھنے 12تاں لازم ہے جو تُوں اُوں عورت اُتے رحم نہ کریں بلکہ اُوندا ہتھ کپ سٹیں۔

دوکھا نہ ڈیویں

13تولنڑ ویلے آپنڑے تھیلے ءچ صحیح وزن دے وٹے رکھیں۔ تے دوکھا ڈیوݨ کیتے وڈے تے چھوٹے وٹے نہ رکھیں۔ 14اِینویں ای آپنڑے گھر ءچ اناج ناپنڑ کیتے وڈے تے چھوٹے برتن نہ رکھیں۔ 15بلکہ صحیح وزن دے وٹے تے صحیح ناپ دے برتن اِستعمال کریں تاں جو تُوں اُوں مُلک ءچ دیر تئیں زندہ راہویں جیہڑا رب العالمین تیڈا خُدا تیکُوں ڈیندے۔ 16کیوں جو ایجھی بے اِیمانی کرݨ آلا ہر بندہ رب العالمین تیڈے خُدا دی نِگاہ ءچ مکرُوہ ہے۔

بنی عمالیق کُوں سزا ڈیوݨ دا حُکم

17یاد رکھائے جو جِیں ویلے تُساں مِصر ءچوں نِکل تے سفر کریندے پئے ہَوے تاں بنی عمالیق تُہاڈے نال کیا کیتا ہا۔ 18جِیں ویلے تُساں رستے ءچ تھکے پئے ہَوے تاں او تُہاڈے اُتے حملہ کر تے پِچُھوں ٹُرݨ آلے سارے کمزوراں کُوں قتل کریندے ریہے۔ اُنہاں کُوں خُدا دا خوف نہ ہا۔ 19پر جِیں ویلے رب العالمین تُہاڈا خُدا تُہاکُوں اُوں مُلک ءچ جیہڑا او تُہاکُوں میراث ءچ قبضہ کرݨ کیتے ڈیندا پئے، تُہاکُوں آسُوں پاسُوں دے سارے دُشمنڑاں تُوں سکون ڈیسی تاں بنی عمالیق کُوں اِینویں ہلاک کرائے جو دُنیا ءچ اُنہاں دا ناں نشاں وی نہ راہوے۔ ایہ گالھ نہ بُھلائے۔