اِستثنا 26

زمین دی پہلی پیداوار دے نذرانے

1جِیں ویلے تُوں اُوں مُلک ءچ داخل تھیسیں جیہڑا رب العالمین تیڈا خُدا تیکُوں میراث ءچ ڈیندا پئے تے تُوں اُوندے اُتے قبضہ کر تے آباد تھی ویسیں 2تاں تُوں جیہڑی وی فصل کپیسیں اُوندے پہلے پھل ءچوں کُجھ ہِک ٹوکرے ءچ پا تے اُوں جاہ تے گِھن ونجیں جیہڑی رب العالمین تیڈا خُدا آپنڑے ناں دے جلال1 کیتے چُنڑسی۔ 3اُتھاں خدمت کرݨ آلے کاہِن کُوں آکھ، ”اَج مَیں رب العالمین آپنڑے خُدا دے حضُور اِقرار کریندا ہاں جو مَیں اُوں مُلک ءچ پُج گِیا ہاں جِینکُوں ساکُوں ڈیوݨ دا وعدہ رب العالمین قَسم کھا تے ساڈے پِیُو ڈاڈے نال کیتا ہا۔“

4وَل کاہِن تیڈا ٹوکرا چا تے اُونکُوں رب العالمین تیڈے خُدا دی قُربان گاہ دے سامنڑے رکھ ڈیوے۔ 5وَل تُوں رب العالمین آپنڑے خُدا دے حضُور آکھیں، ”میڈا پِیُو ڈاڈا یعقُوب اِڈے اُڈے پِھرݨ آلا ارامی ہا جیہڑا آپنڑے تھوڑے جِیہے لوکاں نال مِصر ءچ وَنج تے آباد تھیّا تے اُتھاں او ہِک وڈی تے طاقتور قوم بنڑ گِیا۔ 6پر مِصریاں ساڈے نال بُرا سلوک کیتا تے ساکُوں ستایا تے سخت غُلامی ءچ پَھسا ڈِتا۔ 7وَل اساں رب العالمین آپنڑے پِیُو ڈاڈے دے خُدا تُوں فریاد کیتی تے رب العالمین ساڈی سُنڑی۔ اُوں ساڈا ڈُکھ، ساڈی سخت مُشقت تے ساڈی بُری حالت ڈِٹھی، 8تے وڈے زور تے طاقت دا اِظہار کر تے ساکُوں مِصر ءچوں کڈھ آیا۔ اُوں ویلے اُوں مِصریاں ءچ ہولناک نشان تے معجزے ڈِکھائے۔ 9او ساکُوں اِتھاں گِھن آیا تے ایہ مُلک ساکُوں ڈِتا جیندے ءچ کھیر تے ماکھی وافر ہے۔ 10یا رب العالمین! ہُنڑ مَیں تیکُوں اُوں زمین دا پہلا پھل پیش کریندا ہاں جیہڑی تُوں میکُوں بخشی ہے۔“

تُوں آپنڑی پیداوار دا ٹوکرا رب العالمین آپنڑے خُدا دے سامنڑے رکھ تے اُونکُوں سجدہ کریں۔ 11وَل خوشی منانویں جو رب العالمین تیڈے خُدا تیکُوں تے تیڈے گھر آلیاں کُوں ایہ ساریاں چنگیاں چیزاں ڈِتیاں ہِن۔ اِیں خوشی ءچ آپنڑے وچال راہوݨ آلے لاویاں تے پردیسیاں کُوں وی شامل کریں۔

فصل ءچوں ضرورت منداں دا حصہ

12ہر تریجھے سال جیہڑا ڈاہواں حصہ ڈیوݨ دا خاص سال ہے2، آپنڑیاں ساریاں فصلاں دا ڈاہواں حصہ لاویاں، پردیسیاں، یتیماں تے بیوہ عورتاں کُوں ڈیویں تاں جو او تیڈے شہراں ءچ کھانڑا کھا تے رَج ونجنڑ۔ 13وَل رب العالمین آپنڑے خُدا کُوں آکھیں، ”مَیں تیڈے حُکم دے مطابق آپنڑے گھر ءچوں تیڈے کیتے مخصوص تے مُقدّس حصہ کڈھ تے اُونکُوں لاویاں، پردیسیاں، یتیماں تے بیوہ عورتاں کُوں ڈِتے۔ مَیں تیڈے حُکماں تُوں کنارہ نئیں کیتا تے کُجھ نئیں بُھلیا۔ 14ماتم کرݨ ویلے مَیں اِیں مخصوص تے مُقدّس حصے ءچوں کُجھ نئیں کھادا۔ مَیں ناپاکی دی حالت ءچ اِینکُوں ہتھ نئیں لایا۔ مَیں اِیندے ءچوں مُردیاں کُوں وی کُجھ نئیں پیش کیتا۔ مَیں رب العالمین آپنڑے خُدا دی ہر گالھ مَن تے او سبھ کُجھ کیتے جیہڑا تُوں میکُوں حُکم ڈِتا ہا۔ 15اسمان تُوں جیہڑا تیڈی مُقدّس سکونت گاہ ہے، نِگاہ کر تے آپنڑی قوم بنی اِسرائیل کُوں برکت ڈے۔ اُوں مُلک کُوں وی برکت ڈے جِیندا وعدہ تُوں قَسم کھا تے ساڈے پِیُو ڈاڈے نال کیتا ہا تے جیہڑا تُوں ساکُوں بخش وی ڈِتے تے جیندے ءچ کھیر تے ماکھی وافر ہے3۔“

خُدا دے خاص لوک

16اَج رب العالمین تیڈا خُدا تیکُوں اِنہاں حُکماں تے قانُوناں دی پیروی کرݨ دا حُکم ڈیندا پئے۔ پُورے دل تے جان نال تے وڈی احتیاط کریندے ہوئے اِنہاں اُتے عمل کر۔

17[اے بنی اِسرائیل] اَج تُوں اعلان کیتے جو، ”رب العالمین میڈا خُدا ہے، مَیں اُوندے رستے اُتے ٹُردا راہساں، اُوندے حُکماں، ہدایتاں تے قانُوناں دا پابند راہساں تے اُوندی گالھ سُنڑساں۔“ 18تے اَج رب العالمین اعلان کیتے جو ”تُوں میڈی خاص قوم تے ملکیت ہیں، جِینویں مَیں تیڈے نال وعدہ کیتے۔ ہُنڑ میڈے سارے حُکماں اُتے عمل کریندا رہ۔ 19جِتنیاں وی قوماں مَیں بنڑائیاں ہِن، اُنہاں تُوں مَیں تیکُوں تعریف، شُہرت تے عزت چ اُچا کریساں۔ تُوں رب العالمین آپنڑے خُدا کیتے مخصوص تے مُقدّس قوم ہوسیں، جِینویں مَیں تیڈے نال وعدہ کیتے۔“