Modern Central Saraiki Bible
اِستثنا 27
عیبال پہاڑ اُتے قُربان گاہ
وَل مُوسیٰ بزُرگاں نال رَل تے بنی اِسرائیل کُوں آکھیا، ”اُنہاں سارے حُکماں اُتے عمل کرو جیہڑے مَیں اَج تُہاکُوں ڈیندا پِیا ہاں۔ جِیں ویلے تُساں یردن دریا کُوں پار کر تے اُوں مُلک ءچ داخل تھیسو جیہڑا رب العالمین تُہاڈا خُدا تُہاکُوں ڈیندا پئے تاں تُساں اُتھاں وڈے وڈے پتھر کھڑے کر تے اُنہاں اُتے سفیدی کرائے، تے شریعت دے سارے گالھیں لِکھائے۔ رب العالمین تُہاڈے پِیُو ڈاڈے دے خُدا دے وعدہ دے مطابق جِیں ویلے تُساں اُوں مُلک ءچ داخل تھیوݨ کیتے یردن دریا کُوں پار کریسو جیندے ءچ کھیر تے ماکھی وافر ہے، تاں اِیہو کُجھ کرائے۔ اُنہاں پتھراں کُوں جِنہاں دے بارے ءچ مَیں اَج تُہاکُوں حُکم ڈیندا پِیا ہاں، دریا پار کر تے عیبال پہاڑ اُتے کھڑا کرائے۔
اُتھائیں رب العالمین آپنڑے خُدا کیتے پتھراں نال ہِک قُربان گاہ بنڑائے۔ جیہڑے پتھر تُساں اُوندے کیتے اِستعمال کریسو، اُنہاں اُتے لُوہے دا کوئی اوزار نہ لوائے۔ صرف سالم پتھر اِستعمال کرائے۔ قُربان گاہ اُتے رب العالمین آپنڑے خُدا کُوں ساڑے ونجنڑ آلیاں قُربانیاں پیش کرائے۔ سلامتی دیاں قُربانیاں وی اُوندے اُتے پیش کرائے تے اُنہاں کُوں اُتھائیں رب العالمین آپنڑے خُدا دے حضُور کھا تے خوشی منائے۔ اُتھاں کھڑے کیتے گئے پتھراں اُتے شریعت دے سارے گالھیں کُوں صاف صاف لِکھائے۔“
عیبال پہاڑ تُوں لعنت
وَل مُوسیٰ تے لاوی قبیلے دے کاہِناں1 سارے بنی اِسرائیل کُوں آکھیا، ”اِسرائیلیو! چُپ تھی تے سُنڑو، ہُنڑ تُساں رب العالمین آپنڑے خُدا دے لوک بنڑ گئے ہیوے۔ اِیں کیتے اُوندے فرمانبردار راہو، تے اُنہاں حُکماں تے قانُوناں اُتے عمل کرو جیہڑے مَیں اَج تُہاکُوں ڈیندا پِیا ہاں۔“
اُوں ڈینہہ مُوسیٰ بنی اِسرائیل کُوں حُکم ڈے تے آکھیا، ”یردن دریا کُوں پار کرݨ دے بعد شمعون، لاوی، یہُوداہ، اِشکار، یُوسف تے بِنیمِین دے قبیلے گرِزِیم پہاڑ اُتے کھڑے تھی تے بنی اِسرائیل کیتے برکت دے گالھیں آکھنڑ۔ باقی قبیلے یعنی رُوبِن، جد، آشر، زبُولُون، دان تے نفتالی عیبال پہاڑ2 اُتے کھڑے تھی تے بنی اِسرائیل کیتے لعنت دے گالھیں آکھنڑ۔
وَل لاوی سارے لوکاں کُوں اُچی اواز ءچ آکھنڑ،
’اُوں بندے اُتے لعنت جیہڑا بُت کُوں گھڑ تے یا ڈھال تے بنڑاوے تے چُپ چپیتے کھڑا کرے۔ اِنسانی ہتھ دی ایجھی کاریگری تُوں رب العالمین کُوں نفرت ہے۔‘
جواب ءچ سبھ لوک آکھنڑ، ’آمین۔‘
وَل لاوی آکھنڑ، ’اُوں بندے اُتے لعنت جیہڑا آپنڑے ماء پِیُو دی بے عزتی کرے۔‘
سبھ لوک آکھنڑ، ’آمین۔‘
’اُوں بندے اُتے لعنت جیہڑا آپنڑے ہمسائے دی زمین دی حد دے نشان کُوں اگُوں پِچُھوں کرے۔‘
سبھ لوک آکھنڑ، ’آمین۔‘
’اُوں بندے اُتے لعنت جیہڑا کہیں اندھے کُوں غلط رستے اُتے گِھن ونجے۔‘
سبھ لوک آکھنڑ، ’آمین۔‘
’اُوں بندے اُتے لعنت جیہڑا پردیسیاں، یتیماں تے بیوہ عورتاں دے حق کُوں قائم نہ رکھے۔‘
سبھ لوک آکھنڑ، ’آمین۔‘
’اُوں بندے اُتے لعنت جیہڑا آپنڑے پِیُو دی ذال نال ہم بِستری کرے، کیوں جو او آپنڑے پِیُو دی بے حُرمتی کریندے۔‘
سبھ لوک آکھنڑ، ’آمین۔‘
’اُوں بندے اُتے لعنت جیہڑا جانور نال جنسی مِلاپ کرے۔‘
سبھ لوک آکھنڑ، ’آمین۔‘
’اُوں بندے اُتے لعنت جیہڑا آپنڑی سکی بھینڑ، آپنڑے پِیُو دی دِھی یا ماء دی دِھی نال ہم بِستری کرے۔‘
سبھ لوک آکھنڑ، ’آمین۔‘
’اُوں بندے اُتے لعنت جیہڑا آپنڑی سس نال ہم بِستری کرے۔‘
سبھ لوک آکھنڑ، ’آمین۔‘
’اُوں بندے اُتے لعنت جیہڑا چُپ چپیتے آپنڑے ہمسائے کُوں مار گھتے۔‘
سبھ لوک آکھنڑ، ’آمین۔‘
’اُوں بندے اُتے لعنت جیہڑا پیسے گِھن تے کہیں بے قصُور کُوں مار گھتے۔‘
سبھ لوک آکھنڑ، ’آمین۔‘
’اُوں بندے اُتے لعنت جیہڑا شریعت دے گالھیں اُتے عمل نئیں کریندا تے نہ اُنہاں کُوں قائم رکھیندے۔‘
سبھ لوک آکھنڑ، ’آمین۔‘
Source notes (2)
- Footnote سارے کاہِن ہارُون دی اولاد ءچوں ہَن تے ہارُون خود یعقُوب دے پوتر لاوی دے قبیلے ءچوں ہا، اِیں کیتے کاہِن صرف لاوی قبیلے ءچوں تھی سگدے ہَن۔
- Footnote عیبال پہاڑ تے گرِزِیم پہاڑ ہِک ڈُوجھے دے آمنڑے سامنڑے ہِن تے ہِک وادی اِنہاں دے وچال ہے۔
Modern Central Saraiki Bible. Copyright © Strategic Resource Group. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.