اِستثنا 7

خُدا دے چُنڑے ہوئے لوک

1جِیں ویلے رب العالمین تُہاڈا خُدا تُہاکُوں اُوں مُلک ءچ گِھن ویسی جیندے اُتے تُساں قبضہ کرݨ کیتے ویندے پئے ہیوے تاں او بہُوں ساریاں قوماں کُوں یعنی حِتّی، جِرجاسی، اموری، کنعانی، فرِزّی، حِوّی تے یبُوسی قوماں کُوں تُہاڈے اگُوں بھجا ڈیسی۔ ایہ سَت قوماں تعداد تے طاقت دے لحاظ نال تُہاڈے تُوں وڈیاں ہِن۔ 2وَل وی رب العالمین تُہاڈا خُدا اُنہاں کُوں تُہاڈے حوالے کریسی۔ جِیں ویلے تُساں اُنہاں کُوں شکست ڈیسو تاں اُنہاں کُوں مکمل طور تے ہلاک کر ڈیوائے۔ نہ اُنہاں دے نال کوئی عہد بدھائے تے نہ ای اُنہاں اُتے رحم کرائے۔ 3اُنہاں ءچوں کہیں دے نال شادی نہ کرائے۔ نہ آپنڑیاں دِھیاں اُنہاں دے پوتراں کُوں ڈیوائے تے نہ آپنڑے پوتراں کیتے اُنہاں دیاں دِھیاں گِھنائے۔ 4کیوں جو او تُہاڈے بالاں کُوں میڈی پیروی کرݨ تُوں ہٹا ڈیسن تے او میڈی نئیں بلکہ اُنہاں دے دیوتیاں دی خدمت کریسن۔ وَل رب العالمین دا غضب تُہاڈے اُتے نازل تھی تے جلدی تُہاکُوں ہلاک کر ڈیسی۔ 5اِیں کیتے اُنہاں دیاں قُربان گاہاں1 کُوں ڈھا ڈیوائے۔ اُنہاں دے بُتاں دے پتھر آلے تھمبیاں کُوں بَھن ڈیوائے۔ اُنہاں دے یسِیرت دیوی دے لکڑ آلے تھمبے کٹ ڈیوائے تے اُنہاں دے بُت ساڑ ڈیوائے۔ 6کیوں جو تُساں رب العالمین آپنڑے خُدا کیتے مخصوص تے مُقدّس لوک ہیوے۔ اُوں دُنیا دیاں سبھ قوماں ءچوں تُہاکُوں چُنڑ تے آپنڑی قوم تے خاص ملکیت بنڑائے۔

7رب العالمین کیوں تُہاڈے نال محبت کیتی تے چُنڑیا؟ کیا اِیں وجہ تُوں جو تُساں تعداد ءچ بئیاں قوماں تُوں زیادہ ہَوے؟ نئیں۔ تُساں تاں بہُوں گھٹ ہَوے۔ 8بلکہ وجہ ایہ ہئی جو رب العالمین تُہاڈے نال محبت کریندا ہے تے اُوں وعدہ کُوں جیہڑا اُوں قَسم کھا تے تُہاڈے پِیُو ڈاڈے نال کیتا ہا، پُورا کیتا۔ اِیں کیتے اُوں فِدیہ ڈے تے تُہاکُوں وڈی قُدرت نال مِصر دی غُلامی تے فرعون بادشاہ دے ہتُھوں بچا گِھدا۔ 9اِیں کیتے جاݨ گِھنو جو صرف رب العالمین تُہاڈا خُدا ای خُدا ہے۔ او وفادار خُدا ہے۔ جیہڑے اُوندے نال محبت رکھیندے تے اُوندے حُکماں اُتے عمل کریندے ہِن، اُنہاں نال او ہزار پُشتاں تئیں آپنڑا عہد قائم رکھیندے تے اُنہاں اُتے مہربانی کریندے۔ 10پر اُوندے نال نفرت کرݨ آلیاں کُوں او سزا ڈے تے برباد کریسی۔ جیا، جیہڑا اُوندے نال نفرت کریندے، او اُونکُوں مناسب سزا ڈیوݨ ءچ دیر نہ لیسی۔

11اِیں کیتے دھیان نال اُنہاں سارے فرماناں، حُکماں تے قانُوناں اُتے عمل کرو جیہڑے مَیں اَج تُہاکُوں ڈیندا پِیا ہاں۔ 12جیکر تُساں اُنہاں اُتے توجہ ڈیسو تے احتیاط نال اُنہاں اُتے عمل کریسو تاں وَل رب العالمین تُہاڈا خُدا تُہاڈے نال آپنڑا عہد قائم رکھیسی تے تُہاڈے نال مہربانی کریسی، بالکل اُوں وعدے دے مطابق جیہڑا اُوں قَسم کھا تے تُہاڈے پِیُو ڈاڈے نال کیتا ہا۔ 13او تُہاڈے نال محبت کریسی تے تُہاکُوں اُوں مُلک ءچ جیہڑا تُہاکُوں ڈیوݨ دا وعدہ اُوں قَسم کھا تے تُہاڈے پِیُو ڈاڈے نال کیتا ہا، برکت ڈیسی تے تُہاڈی تعداد ودھیسی۔ او تُہاڈی اولاد، تُہاڈی زمین دی پیداوار یعنی اناج، انگُور، زیتون تے تُہاڈے گائیں ڈاند تے بھیڈ بکریاں اُتے برکت نازل کریسی۔ 14تُہاکُوں بئیاں ساریاں قوماں تُوں زیادہ برکت مِلسی۔ نہ تُہاڈے ءچ بانجھ پن ہوسی تے نہ تُہاڈے ڈھورڈنگراں ءچ۔ 15رب العالمین ہر بیماری کُوں تُہاڈے تُوں پرے رکھیسی۔ او تُہاڈے ءچ خطرناک وباواں کِھنڈݨ نہ ڈیسی جِنہاں نال تُساں مِصر ءچ واقف تھئے ہَوے بلکہ اُنہاں کُوں اُنہاں ءچ کِھنڈیسی جیہڑے تُہاڈے نال نفرت رکھیندے ہِن۔

16جِنہاں قوماں کُوں رب العالمین تُہاڈا خُدا تُہاڈے ہتھ ءچ کر ڈیسی، اُنہاں کُوں ہلاک کرݨ لازمی ہے۔ اُنہاں اُتے رحم نہ کرائے تے نہ اُنہاں دے دیوتیاں دی خدمت کرائے، نہ تاں تُساں پَھس ویسو۔

17جے تُہاڈا دل آکھے جو، ”ایہ قوماں ساڈے تُوں طاقتور ہِن، اساں کِینویں اُنہاں کُوں کڈھ سگدے ہیں؟“ 18وَل وی اُنہاں تُوں نہ ڈرائے۔ اُوہو کُجھ ذہن ءچ رکھائے جیہڑا رب العالمین تُہاڈے خُدا فرعون تے سارے مِصر دے نال کیتا ہا۔ 19کیوں جو تُساں آپنڑے اکھیں نال او ساریاں مُصیبتاں، نشان، معجزے، تے او وڈا زور تے طاقت ڈِٹھی جیندے نال رب العالمین تُہاڈا خُدا تُہاکُوں اُتھوں کڈھ آیا ہا۔ اُوہو کُجھ رب العالمین تُہاڈا خُدا اُنہاں قوماں دے نال وی کریسی جِنہاں تُوں تُساں اِیں ویلے ڈردے ہیوے۔ 20نہ صرف ایہ بلکہ رب العالمین تُہاڈا خُدا اُنہاں دے وچال ڈیمبُو وی بھجیسی تاں جو او وی تباہ تھی ونجنڑ جیہڑے پہلے حملیاں تُوں بچ تے لُک گئے ہَن۔ 21اُنہاں تُوں خوف نہ کھوائے، کیوں جو رب العالمین تُہاڈا خُدا تُہاڈے وچال ہے۔ او عظیم خُدا ہے جیندے تُوں سارے ڈردے ہِن۔ 22او ہولے ہولے قوماں کُوں تُہاڈے اگُوں دُور کر ڈیسی۔ تُساں اُنہاں کُوں ہِکے پھیری ختم نہ کر سگسو، نہ تاں جنگلی جانور کِھنڈ تے تُہاڈے کیتے نُقصان دا سبب بنڑسن۔

23رب العالمین تُہاڈا خُدا اُنہاں قوماں کُوں تُہاڈے حوالے کر ڈیسی۔ او اُنہاں دے وچال ایجھی سخت افراتفری پیدا کریسی جو او برباد تھی ویسن۔ 24او اُنہاں دے بادشاہاں کُوں وی تُہاڈے قابو ءچ کر ڈیسی تے تُساں اُنہاں دا ناں نشان مِٹا ڈیسو۔ کوئی وی تُہاڈا سامنڑا نہ کر سگسی پر تُساں اُنہاں ساریاں کُوں ہلاک کر ڈیسو۔

25اُنہاں دے دیوتیاں دیاں مُورتاں ساڑ ڈیوائے۔ جیہڑا سونا چاندی اُنہاں اُتے چڑھیا ہووے اُوندا لالچ نہ کرائے تے اُونکُوں نہ گِھنائے نہ تاں تُساں پَھس ویسو کیوں جو اُنہاں شیواں تُوں رب العالمین تُہاڈے خُدا کُوں نفرت ہے۔ 26ایجھی مکرُوہ شے آپنڑے گھر ءچ نہ گِھن اوائے، نہ تاں تُہاکُوں وی اُنہاں آلی کار مکمل طور تے ہلاک کیتا ویسی۔ تُہاکُوں اُوندے تُوں شدید نفرت ہووے، کیوں جو اُونکُوں بربادی کیتے مُقرر کیتا گئے۔