اِستثنا 6

ساریاں تُوں وڈا حُکم

1ایہ او سارے فرمان، حُکم تے قانُون ہِن جیہڑے رب العالمین تُہاڈے خُدا تُہاکُوں سِکھاوݨ دا حُکم ڈِتا ہا تاں جو تُساں اُوں مُلک ءچ اُنہاں اُتے عمل کرو جیندے اُتے تُساں قبضہ کرݨ آلے ہیوے۔ 2ساری عُمر تُساں، تُہاڈے پوتر تے پوترے رب العالمین آپنڑے خُدا دا خوف مننڑ تے اُوندے اُنہاں سارے حُکماں کُوں مننڑ جیہڑے مَیں تُہاکُوں ڈیندا پِیا ہاں، تاں جو تُہاڈی حیاتی وڈی ہووے۔ 3اِسرائیلیو! ایہ گالھیں سُنڑ تے وڈی احتیاط نال اُنہاں اُتے عمل کرو1 تاں جو رب العالمین تُہاڈے پِیُو ڈاڈے دے خُدا دے وعدہ دے مطابق تُہاڈا بھلا تھیوے تے تُہاڈی تعداد اُوں مُلک ءچ بہُوں ودھ ونجے جیندے ءچ کھیر تے ماکھی وافر ہے۔

4اِسرائیلیو، سُنڑو! رب العالمین ساڈا خُدا ہِک ای خُدا ہے۔ 5رب العالمین آپنڑے خُدا نال آپنڑے سارے دل، آپنڑی ساری جان تے آپنڑی ساری طاقت نال محبت رکھو۔ 6جیہڑے حُکم مَیں اَج تُہاکُوں ڈسیندا پِیا ہاں، اُنہاں کُوں آپنڑے دل اُتے نقش کر گِھنو۔ 7اُنہاں کُوں آپنڑے بالاں کُوں سِکھائے تے گھر ءچ بیٹھے ہوئے، رستے ءچ ٹُردے ہوئے، لیٹے ہوئے یا اُٹھدے ویلے اُنہاں دا ذِکر کرائے۔ 8اُنہاں کُوں یاد دہانی کیتے نشاناں دے طور تے آپنڑے باہیں تے متھے اُتے لوائے۔ 9اُنہاں کُوں آپنڑے گھراں دے درسالاں تے شہراں دے پھاٹکاں اُتے لِکھائے۔

10جِیں ویلے رب العالمین تُہاڈا خُدا تُہاکُوں اُوں مُلک ءچ گِھن ویسی جِینکُوں تُہاکُوں ڈیوݨ دا وعدہ اُوں تُہاڈے پِیُو ڈاڈے ابرہام، اِضحاق تے یعقُوب نال کیتا ہا، جیندے وڈے تے شاندار شہر ہِن جِنہاں کُوں تُساں خود نئیں بنڑایا، 11جیندے مکان چنگیاں شیواں نال بھرے ہوئے ہِن جِنہاں کُوں تُساں نئیں رکھیا، جیندے کُھوہ ہِن جِنہاں کُوں تُساں نئیں کھٹیا تے جیندے ءچ انگُور تے زیتون دے باغ ہِن جِنہاں کُوں تُساں نئیں لایا۔ تے جِیں ویلے تُساں ڈھیر کھانڑا کھا تے رَج ونجو، 12تاں خبردار! رب العالمین کُوں نہ بُھلائے جیہڑا تُہاکُوں مِصر دی غُلامی ءچوں کڈھ آیا ہے۔

13رب آپنڑے خُدا دا خوف منائے۔ صرف اُوندی عبادت کرائے تے صرف اُوندا ناں گِھن تے قَسم کھوائے۔ 14تُساں بئے معبُوداں یعنی آپنڑے آسُوں پاسُوں دیاں قوماں دے معبُوداں دی پیروی نہ کرائے۔ 15نہ تاں اُوندا غضب تُہاڈے اُتے بھڑک تے تُہاڈا ناں زمین تُوں مِٹا ڈیسی کیوں جو رب العالمین تُہاڈا خُدا جیہڑا تُہاڈے وچال راہندے، غیور خُدا ہے۔

16رب آپنڑے خُدا کُوں نہ ازمائے جِینویں تُساں مسّہ2 ءچ کیتا ہا۔ 17دھیان نال رب العالمین آپنڑے خُدا دے حُکماں، ہدایتاں تے قانُوناں اُتے جیہڑے اُوں تُہاکُوں ڈِتے ہِن، عمل کرائے۔ 18جیہڑا کُجھ رب العالمین دی نظر ءچ صحیح تے چنگا ہے او کرو تاں جو تُہاڈا بھلا تھیوے تے تُساں اُوں چنگے مُلک ءچ داخل تھی تے اُوندے اُتے قبضہ کر سگو جِینکُوں ڈیوݨ دا وعدہ رب العالمین تُہاڈے پِیُو ڈاڈے نال قَسم کھا تے کیتا ہا۔ 19تے جِینویں رب العالمین آکھیا ہے تُساں آپنڑے سارے دُشمنڑاں کُوں آپنڑے سامنڑے تُوں کڈھ ڈیؤ۔

20آوݨ آلے ڈینہاں ءچ تُہاڈے پوتر پُچھسن، ”رب العالمین ساڈے خُدا تُہاکُوں اُنہاں ساریاں ہدایتاں، حُکماں تے قانُوناں اُتے عمل کرݨ کیتے کیوں آکھیا ہے؟“ 21وَل اُنہاں کُوں جواب ڈیوائے جو ”اساں مِصر ءچ فرعون دے غُلام ہسے، پر رب العالمین وڈا زور ڈِکھا تے ساکُوں مِصر ءچوں کڈھ آیا۔ 22ساڈے اکھیں دے سامنڑے اُوں وڈے وڈے نشان تے معجزے کیتے تے مِصر، فرعون تے اُوندے سارے خاندان اُتے ہولناک مُصیبتاں بھیجیاں۔ 23اُوں ویلے او ساکُوں اُتھوں کڈھ آیا تاں جو ساکُوں گِھن تے او مُلک ڈیوے جِیندا وعدہ اُوں قَسم کھا تے ساڈے پِیُو ڈاڈے نال کیتا ہا۔ 24رب العالمین ساڈے خُدا ای ساکُوں آکھیا ہا جو اُنہاں سارے حُکماں اُتے عمل کرو تے رب العالمین آپنڑے خُدا دا خوف منّو تاں جو ساڈا ہمیشاں بھلا تھیوے تے او ساکُوں زندہ رکھے، جِینویں اَج دے ڈینہہ ہے۔ 25جیکر اساں رب العالمین آپنڑے خُدا دے حضُور احتیاط نال اُنہاں سارے حُکماں اُتے عمل کریسوں جِینویں اُوں ساکُوں کرݨ کیتے آکھیا ہے تاں وَل او ساکُوں نیک کھڑیسی۔“