اِستثنا 5

ڈاہ حُکم

1مُوسیٰ سارے بنی اِسرائیل کُوں کٹھا کر تے آکھیا،

اِسرائیلیو! دھیان نال او حُکم تے قانُون سُنڑو جیہڑے مَیں اَج تُہاکُوں ڈسیندا پِیا ہاں۔ اُنہاں کُوں سِکھ تے وڈی احتیاط نال اُنہاں اُتے عمل کرائے۔ 2رب العالمین ساڈے خُدا سِینا پہاڑ اُتے ساڈے نال عہد کیتا ہا۔ 3اُوں ایہ عہد ساڈے پِیُو ڈاڈے نال نئیں بلکہ ساڈے نال کیتا ہا، جیہڑے اَج اِیں جاہ تے زندہ ہیں۔ 4رب العالمین پہاڑ اُتے بھاہ ءچوں سامنڑے تھی تے تُہاڈے نال کلام کیتا۔ 5اُوں ویلے مَیں تُہاڈے تے رب العالمین دے وچال کھڑا تھیّا تاں جو تُہاکُوں رب العالمین دا پیغام سُنڑاواں، کیوں جو تُساں اُوں بھاہ تُوں ڈردے ہَوے تے پہاڑ اُتے نہ چڑھے۔ اُوں ویلے رب العالمین آکھیا،

6”مَیں رب العالمین تیڈا خُدا ہاں جیہڑا تیکُوں1 مِصر دی غُلامی ءچوں کڈھ آیا ہاں۔ 7تُوں میڈے علاوہ کہیں بئے معبُود دی عبادت نہ کریں۔

8آپنڑے کیتے بُت نہ بنڑاویں۔ کہیں وی شے دی مُورت نہ بنڑاویں، بھانویں او اسمان اُتے یا تلے زمین اُتے یا سمندر ءچ ہووے۔ 9نہ بُتاں کُوں سجدہ کریں تے نہ اُنہاں دی عبادت کریں، کیوں جو مَیں رب العالمین تیڈا خُدا غیور خُدا ہاں۔ جیہڑے میڈے نال نفرت کریندے ہِن، اُنہاں کُوں مَیں تریجھی تے چوتھی پُشت تئیں سزا ڈیندا ہاں۔ 10پر جیہڑے میڈے نال محبت رکھیندے تے میڈے حُکم منیندے ہِن، اُنہاں اُتے مَیں ہزار پُشتاں تئیں مہربان راہندا ہاں۔

11تُوں آپنڑے خُدا رب العالمین دا ناں غلط مقصد کیتے اِستعمال نہ کریں۔ جیہڑا وی اِینویں کریندے، میں رب العالمین اُونکُوں سزا ڈِتے بغیر نہ چُھڑیساں۔

12تُوں رب العالمین آپنڑے خُدا دے حُکم دے مطابق سبت دے ڈینہہ کُوں یاد رکھیں تے اُونکُوں مُقدّس منیں۔ 13ہفتے دے چِھی ڈینہہ تُوں محنت کر تے آپنڑا سارا کم کریں۔ 14پر ستواں ڈینہہ رب العالمین تیڈے خُدا دے سبت دا ڈینہہ ہے۔ اُوں ڈینہوار اصلُوں کم نہ کریں، نہ تُوں، نہ تیڈے پوتر، نہ دِھی، نہ نوکر، نہ نوکرانڑی، نہ ڈاند، نہ کھوتا، نہ ڈنگر تے نہ پردیسی جیہڑا تیڈے نال راہندا ہووے۔ 15یاد رکھیں جو تُوں مِصر ءچ غُلام ہَویں تے ایہ جو رب العالمین تیڈا خُدا ای تیکُوں آپنڑے وڈے زور تے طاقت نال اُتھوں کڈھ تے گِھن آیا۔ اِیں واسطے اُوں تیکُوں سبت دے ڈینہہ کُوں مناوݨ دا حُکم ڈِتا ہے۔

16تُوں رب العالمین آپنڑے خُدا دے حُکم دے مطابق آپنڑے ماء پِیُو دی عزت کریں، تاں جو تیڈی حیاتی وڈی تھیوے تے اُوں مُلک ءچ جیہڑا میں رب العالمین تیڈا خُدا تیکُوں ڈیوݨ آلا ہاں، تیڈا بھلا تھیوے۔

17تُوں قتل نہ کریں۔

18تُوں زِنا نہ کریں۔

19تُوں چوری نہ کریں۔

20تُوں آپنڑے ہمسائے دے بارے ءچ کُوڑی گواہی نہ ڈیویں۔

21تُوں آپنڑے ہمسائے دی ذال دی خواہش نہ کریں۔ اُوندے گھر، اُوندی زمین، نوکر، نوکرانڑی، ڈاند تے کھوتے بلکہ اُوندی کہیں وی شے دا لالچ نہ کریں۔“

22اِیہو حُکم رب العالمین سِینا پہاڑ اُتے بھاہ، بدّل تے اندھارے ءچوں زور دار اواز نال تُہاڈی ساری جماعت کُوں ڈِتے تے بِیا کُجھ نہ آکھیا۔ وَل اُوں اُنہاں کُوں پتھر دیاں ڈُو تختیاں اُتے لِکھ تے میکُوں ڈے ڈِتا۔

لوک خُدا تُوں ڈردے ہِن

23جِیں ویلے پہاڑ بھاہ نال بلدا پِیا ہا تے تُساں اندھارے ءچوں ایہ اواز سُنڑی تاں تُہاڈے قبیلے دے سردار تے بزُرگ میڈے کولھ آئے 24تے آکھیا، ”رب العالمین ساڈے خُدا ساڈے اُتے آپنڑا جلال تے عظمت ظاہر کیتے تے اَج اساں بھاہ ءچوں اُوندی اواز سُنڑی ہے۔ اساں ڈیکھ گِھدے جو خُدا اِنسان نال کلام کریندے تاں وی اِنسان زندہ رہ سگدے۔ 25پر ہُنڑ اساں کیوں آپنڑی جان خطرے ءچ سَٹُوں؟ جیکر اساں رب العالمین آپنڑے خُدا دی اواز مزید سُنڑوں تاں ایہ وڈی بھاہ ساکُوں ساڑ تے سواہ کر ڈیسی تے اساں مر ویسوں۔ 26کیوں جو فانی اِنساناں ءچوں کوݨ ساڈے آلی کار زندہ خُدا کُوں بھاہ ءچوں کلام کریندے ہوئے سُنڑ تے زندہ ریہا؟ 27تُساں ای نیڑے وَنج تے اُنہاں سارے گالھیں کُوں سُنڑو جیہڑیاں رب العالمین ساڈا خُدا ڈساونڑا چاہندے۔ وَل واپس وَل تے ساکُوں او گالھیں سُنڑاؤ۔ اساں اُنہاں کُوں سُنڑسوں تے عمل کریسوں۔“

28رب العالمین ایہ گالھیں سُنڑ تے میکُوں آکھیا، ”مَیں اُنہاں لوکاں دیاں ایہ گالھیں سُنڑ گِھدیاں ہِن جیہڑیاں اُنہاں تیڈے نال کیتیاں۔ او ٹھیک آدھے ہِن۔ 29کاش اُنہاں دی سوچ ہمیشاں اِینویں ای راہوے جو میڈا خوف مننڑ تے میڈے سارے حُکماں اُتے عمل کرݨ۔ جیکر او اِینویں کریسن تاں اُنہاں دا تے اُنہاں دی اولاد دا ہمیشاں بھلا تھیسی۔ 30وَنج، اُنہاں کُوں ڈسا جو آپنڑے ڈیرے ءچ وَل ونجنڑ۔ 31پر تُوں اِتھاں میڈے کولھ رہ، تاں جو مَیں تیکُوں سارے فرمان، حُکم تے قانُون ڈے ڈیواں۔ اُنہاں لوکاں کُوں سکھاویں تاں جو او اُوں مُلک ءچ اُنہاں اُتے عمل کرݨ جیہڑا مَیں اُنہاں کُوں میراث ءچ ڈیساں۔“

32اِیں کیتے احتیاط نال اُنہاں حُکماں اُتے عمل کرائے جیہڑے رب العالمین تُہاڈے خُدا تُہاکُوں ڈِتے ہِن۔ اُنہاں تُوں نہ کھبے ہٹائےتے نہ سجے۔ 33ہمیشاں اُوں رستے اُتے ٹُردے رہوائے جیہڑا رب العالمین تُہاڈے خُدا تُہاکُوں ڈسایا ہے، وَل تُہاڈا بھلا تھیسی تے اُوں مُلک ءچ تُہاڈی حیاتی وڈی ہوسی جیندے اُتے تُساں قبضہ کریسو۔