اِستثنا 4

فرماں بردار راہوݨ کیتے حُکم

1اِسرائیلیو! ہُنڑ او سارے حُکم تے قانُون دھیان نال سُنڑ گِھنو، جیہڑے مَیں تُہاکُوں سکھیندا ہاں۔ اُنہاں اُتے عمل کرو تاں جو تُساں زندہ راہو تے وَنج تے اُوں مُلک اُتے قبضہ کرو جیہڑا رب العالمین تُہاڈے پِیُو ڈاڈے دا خُدا تُہاکُوں ڈیوݨ آلا ہے۔ 2جیہڑے حُکم مَیں تُہاکُوں سکھیندا ہاں، اُنہاں کُوں نہ ودھائے تے نہ گھٹائے۔ رب العالمین آپنڑے خُدا دے سارے حُکماں اُتے عمل کرو جیہڑے مَیں تُہاکُوں ڈسیندا ہاں۔ 3تُساں خود ڈِٹھے جو رب العالمین بعل فغُور نال کیا کُجھ کیتا ہا۔ اُتھاں رب العالمین تُہاڈے خُدا ہر ہِک کُوں ہلاک کر ڈِتا جئیں فغُور دے بعل دیوتا دی پُوجا کیتی ہئی۔ 4پر تُساں جیہڑے رب العالمین آپنڑے خُدا دے نال وفادار ریہے، اَج تئیں زندہ ہیوے۔

5ڈیکھو، مَیں تُہاکُوں سارے حُکم تے قانُون اِینویں سِکھا ڈِتے ہِن جِینویں رب العالمین میڈے خُدا میکُوں حُکم ڈِتا ہا تاں جو تُساں اُوں مُلک ءچ اُنہاں اُتے عمل کرو جیندے اُتے تُساں قبضہ کرݨ آلے ہیوے۔ 6اُنہاں کُوں منّو تے عمل کرو۔ وَل ڈُوجھیاں قوماں کُوں تُہاڈی دانش مندی تے سمجھداری نظر آسی۔ او اُنہاں سارے حُکماں دے بارے ءچ سُنڑ تے اکھیسن، ”واہ! ایہ عظیم قوم کیجھی دانش مند تے سمجھدار ہے۔“

7کیوں جو ایجھی کیہڑی عظیم قوم ہے جِیندا معبُود اِتنا نیڑے ہے جِتنا رب العالمین ساڈا خُدا جو جِیں ویلے اساں مدد کیتے سڈیندے ہیں، ساڈے نیڑے ہے؟ 8کیہڑی ایجھی عظیم قوم ہے جِیندے کولھ ایجھے اِنصاف آلے حُکم تے قانُون ہِن جیہڑے اِیں شریعت ءچ ہِن جِینکُوں مَیں اَج تُہاڈے سامنڑے پیش کریندا پِیا ہاں؟

9پر خبردار! احتیاط کرائے تے او سارے گالھیں نہ بُھلائے جیہڑیاں تُہاڈے اکھیں ڈِٹھیاں ہِن۔ او ساری عُمر تُہاڈے دل ءچوں نہ مِٹنڑ بلکہ اُنہاں کُوں آپنڑے بالاں تے پوترے پوترِیاں کُوں وی ڈسائے۔ 10او ڈینہہ یاد کرو جِیں ویلے تُساں سِینا پہاڑ1 دے کولھ رب العالمین آپنڑے خُدا دے حضُور کھڑے ہَوے، تے اُوں میکُوں آکھیا ”لوکاں کُوں اِتھاں میڈے کولھ کٹھا کر تاں جو مَیں اُنہاں کُوں آپنڑے گالھیں سُنڑاواں تے او ساری عُمر میڈا خوف مننڑ تے آپنڑے بالاں کُوں وی اِیہو سکھیندے راہوݨ۔“

11اُوں ویلے تُساں نیڑے آ تے پہاڑ تلے کھڑے تھی گئے۔ پہاڑ بھاہ نال بکھدا پِیا ہا جیہڑی اسمان تئیں ویندی پئی ہئی جڈاں جو کالے بدّل تے گُھپ اندھارا اُونکُوں لُکائی پِیا ہا۔ 12وَل رب العالمین بھاہ ءچوں تُہاڈے نال گالھیں کیتیاں۔ تُساں اُوندے گالھیں سُنڑیاں پر کوئی شکل نہ ڈِٹھی۔ صرف اواز سُنڑائی ڈیندی پئی ہئی۔ 13اُوں تُہاڈے واسطے آپنڑے عہد دے ڈاہ حُکماں دا اعلان کیتا تے حُکم ڈِتا جو اُنہاں اُتے عمل کرو۔ وَل اُوں اُنہاں کُوں پتھر دیاں ڈُو تختیاں اُتے لِکھ ڈِتا۔ 14رب العالمین میکُوں ہدایت کیتی جو ”اُنہاں کُوں او سارے حُکم تے قانُون سِکھا تاں جو او اُوں مُلک ءچ جیندے اُتے او قبضہ کرݨ کیتے یردن دریا کُوں پار کر تے ویندے پئے ہِن، اُنہاں اُتے عمل کرݨ۔“

بُت پرستی دے خلاف تنبیہ

15جِیں ویلے رب العالمین سِینا پہاڑ اُتے تُہاڈے نال گالھیں کیتیاں تاں تُساں کوئی شکل نہ ڈِٹھی۔ اِیں کیتے خبردار راہو 16جو تُساں وِگڑ تے آپنڑے کیتے کہیں مرد، عورت، 17زمین اُتے ٹُرݨ آلے ڈنگر، پکھی، 18ریڑھن آلے جانور یا مچھی دی شکل دا کوئی بُت نہ بنڑاؤ۔ 19جِیں ویلے تُساں اسمان دو اکھ چا تے سِجھ، چَن تے تاریاں کُوں ڈیکھو تاں گُمراہ تھی تے اسمان دے اِیں سارے لشکر کُوں سجدہ کرݨ تے اُوندی عبادت کرݨ دی ازمائش ءچ نہ پوو، جِنہاں کُوں رب العالمین تُہاڈے خُدا ساریاں قوماں کیتے رکھیا ہے۔ 20پر اُوں تُہاکُوں لُوہے دی بٹھی یعنی مِصر ءچوں کڈھیا ہے تاں جو تُساں اُوندے خاص لوک بنڑ ونجو۔ تے اَج اِینویں ای ہے۔

21تُہاڈے پارُوں رب العالمین میڈے نال ناراض تھی تے قَسم کھادی جو ”تُوں یردن دریا کُوں پار کر تے اُوں چنگے مُلک ءچ داخل نہ تھیسیں جیہڑا مَیں اُنہاں کُوں میراث ءچ ڈیوݨ آلا ہاں۔“

22اِیں واسطے مَیں اِتھائیں اِیں مُلک ءچ مر ویساں تے یردن دریا کُوں پار نہ کر سگساں پر تُساں دریا پار کر تے اُوں چنگے مُلک اُتے قبضہ کریسو۔ 23ہر صورت ءچ او عہد یاد رکھائے جیہڑا رب العالمین تُہاڈے خُدا تُہاڈے نال بدھیا ہے۔ جِینویں رب العالمین منع کیتا ہے، تُساں آپنڑے واسطے کہیں وی شے دا بُت نہ بنڑائے۔ 24کیوں جو رب العالمین تُہاڈا خُدا ساڑ تے کولا کرݨ آلی بھاہ ہے، او غیور خُدا ہے۔

25جِیں ویلے تُہاڈے بال تے پوترے جمسن تے تُہاکُوں اُوں مُلک ءچ راہندے ہوئے بہُوں عرصہ لنگھ ونجے تاں خطرہ ہے جو تُساں وِگڑ تے کہیں چیز دی مُورت بنڑاؤ تے رب العالمین آپنڑے خُدا دی نظر ءچ بدی کر تے اُونکُوں کاوڑ ڈیواؤ۔ 26پر اَج مَیں اسمان تے زمین کُوں گواہ بنڑیندا ہاں جو جیکر تُساں اِینویں کریسو تاں جلدی اُوں مُلک ءچوں مِٹ ویسو جیندے اُتے قبضہ کرݨ کیتے تُساں یردن دریا کُوں پار کرݨ کُوں ہیوے۔ تُساں دیر تئیں اُتھاں نہ راہسو بلکہ بالکل ہلاک تھی ویسو۔ 27رب العالمین تُہاکُوں ڈُوجھیاں قوماں ءچ تقسیم کر ڈیسی تے اُنہاں دے مُلکاں ءچ وی تُساں تھوڑے ای باقی بچسو۔ 28اُتھاں تُساں اِنساناں دے ہتھ دے بنڑے ہوئے لکڑ تے پتھر دے بُتاں دی خدمت کریسو جیہڑے نہ ڈیکھ سگدے ہِن، نہ کھا سگدے ہِن، تے نہ سُنگھ سگدے ہِن۔

29پر اُتھاں تُساں رب العالمین آپنڑے خُدا دے طالب تھیسو تے جیکر پُورے دل و جان نال اُوندے طالب تھیسو تاں او تُہاکُوں مِل ویسی۔ 30جِیں ویلے تُہاکُوں ایہ تکلیف تھیسی تے ایہ سارا کُجھ تُہاڈے اُتے آسی تاں اخیر تُساں رب العالمین آپنڑے خُدا دو رجُوع کریسو تے اُوندی سُنڑسو۔ 31کیوں جو رب العالمین تُہاڈا خُدا رحیم خُدا ہے۔ او نہ تاں تُہاکُوں چھوڑیسی، نہ ہلاک کریسی تے نہ اُوں عہد کُوں بُھلسی جیہڑا اُوں قَسم کھا تے تُہاڈے پِیُو ڈاڈے نال بدھیا ہا۔

رب العالمین ای واحد خُدا ہے

32دُنیا ءچ اِنسان دے خلق تھیوݨ تُوں گِھن تے اَج تئیں گُزرے زمانے دی تفتیش کر۔ اسمان دے ہِک سرے تُوں ڈُوجھے سرے تئیں معلوم کر، کیا اِیں تُوں پہلے کڈھائیں ایجھا عظیم کم تھیّا ہے یا سُنڑݨ ءچ آیا ہے؟ 33کیا کہیں بئی قوم خُدا دی اواز بھاہ ءچوں آندی ہوئی سُنڑی جِینویں تُساں سُنڑی، تے زندہ بچی ہے؟ 34کیا کہیں بئے معبُود کڈھائیں جُرأت کیتی ہے جو ہِک پُوری قوم کُوں ہِک مُلک تُوں کڈھ تے آپنڑی ملکیت بنڑاوے؟ پر رب العالمین تُہاڈے خُدا ایہ سبھ کُجھ کیتا۔ اُوں تُہاڈے اکھیں دے سامنڑے مِصریاں کُوں ازمایا، اُنہاں کُوں نشان تے معجزے ڈِکھائے، اُنہاں دے نال جنگ کیتی، آپنڑا وڈا زور تے طاقت ڈِکھائی تے ہولناک کماں دے نال اُنہاں اُتے غالب آیا۔

35تُہاکُوں ایہ سبھ کُجھ ڈِکھایا گِیا تاں جو تُساں جاݨ گِھنو جو رب العالمین ای خُدا ہے۔ اُوں تُوں علاوہ بِیا کوئی خُدا نئیں۔ 36اُوں تُہاکُوں نصیحت ڈیوݨ کیتے اسمان تُوں آپنڑی اواز سُنڑائی۔ زمین اُتے اُوں تُہاکُوں آپنڑی عظیم بھاہ ڈِکھائی جیندے ءچوں تُساں اُوندے گالھیں سُنڑیاں۔ 37اُونکُوں تُہاڈے پِیُو ڈاڈے نال محبت ہئی اِیں واسطے اُوں تُہاکُوں جیہڑے اُنہاں دی اولاد ہیوے چُنڑ گِھدا تے آپ آ تے آپنڑی عظیم قُدرت نال تُہاکُوں مِصر تُوں کڈھ آیا۔ 38اُوں تُہاڈے تُوں زیادہ وڈیاں تے تگڑیاں قوماں کُوں تُہاڈے سامنڑے تُوں کڈھ ڈِتا تاں جو تُہاکُوں اُنہاں دا مُلک میراث ءچ مِل ونجے۔ جِینویں اَج ظاہر ہے۔

39اِیں کیتے اَج جاݨ گِھنو تے ذہن ءچ رکھ گِھنو جو رب العالمین اسمان تے زمین دا خُدا ہے تے ڈُوجھا کوئی خُدا نئیں۔ 40اُوندے حُکماں تے قانُوناں اُتے عمل کرو جیہڑے مَیں اَج تُہاکُوں سُنڑیندا پِیا ہاں۔ وَل تُہاڈا تے تُہاڈی اولاد دا بھلا تھیسی تے تُساں دیر تئیں اُوں مُلک ءچ راہسو جیہڑا رب العالمین تُہاڈا خُدا تُہاکُوں ہمیشاں کیتے ڈیندا پئے۔

یردن دے مشرق ءچ پناہ دے شہر

41اِیندے بعد مُوسیٰ یردن دریا دے مشرق ءچ پناہ دے ترے شہر چُنڑ گِھدے۔ 42اُنہاں ءچ او بندہ بھج سگدا ہا جئیں دُشمنڑی پارُوں نئیں بلکہ غیر اِرادی طور تے کہیں کُوں جان تُوں مار سٹیا ہووے۔ ایجھے شہر ءچ او بھج تے آپنڑی جان بچا سگدے۔ 43اِیں کیتے رُوبِن دے قبیلے کیتے اُچے میدانی بیابان دا شہر بصر، جد دے قبیلے کیتے جِلعاد دا شہر رامات تے منسّی دے قبیلے کیتے بسن دا شہر جولان چُنڑیا گِیا۔

شریعت دا پیش لفظ

44ایہ او شریعت ہے جیہڑی مُوسیٰ بنی اِسرائیل دے اگُوں رکھی ہئی۔ 45مُوسیٰ ایہ ہدایتاں، حُکم تے قانُون اُوں ویلے اُنہاں دے اگُوں رکھے جِیں ویلے او مِصر تُوں نِکل تے 46یردن دریا دے مشرقی کنارے تے بیت فغُور دے سامنڑے ہَن۔ ایہ زمین پہلے اموری بادشاہ سِیحون دی ہئی جیہڑا حسبون ءچ بادشاہی کریندا ہا پر مِصر تُوں نِکلنڑ دے بعد مُوسیٰ تے بنی اِسرائیل اُونکُوں شکست ڈِتی۔ 47وَل اُوندے مُلک اُتے تے بسن دے بادشاہ عوج دے مُلک اُتے قبضہ کر گِھدا۔ اُنہاں ڈوہائیں اموری بادشاہاں دا ایہ سارا علاقہ یردن دریا دے مشرق ءچ ہا۔ 48اُوندی جنُوبی سرحد اَرنون دی وادی دے کنارے عروعیر شہر ہا، جڈاں جو اُوندی شمالی سرحد سِریُون2 یعنی حرمُون پہاڑ ہا۔ 49یردن دریا دی خشک وادی دا سارا مشرقی کنارہ پِسگہ دے پہاڑی سلسلے دے تلے واقع بحیرہ مُردار تئیں اُوندے ءچ شامل ہے۔