اِستثنا 3

بسن دے بادشاہ عوج دی شکست

1اِیں تُوں بعد اساں شمال دِر مُڑ تے بسن دے پاسے ٹُر پئے۔ بسن دا بادشاہ عوج آپنڑی ساری فوج دے نال نِکل تے ساڈا مُقابلہ کرݨ کیتے ادرعی آیا۔ 2پر رب العالمین میکُوں آکھیا، ”اُوندے تُوں نہ ڈر۔ مَیں اُونکُوں، اُوندی ساری فوج تے اُوندا مُلک تیڈے حوالے کر ڈِتے۔ اُوندے نال او کُجھ کر جیہڑا تَیں اموری بادشاہ سِیحون دے نال کیتا ہا، جیہڑا حسبون ءچ حکُومت کریندا ہا۔“

3تے اِینویں ای تھیّا۔ رب العالمین ساڈے خُدا بسن دے بادشاہ عوج تے اُوندی ساری قوم کُوں وی ساڈے حوالے کر ڈِتا۔ اساں ساریاں کُوں ہلاک کر ڈِتا تے کوئی وی باقی نہ بچیا۔ 4اُوں ویلے اساں اُوندے سارے شہراں اُتے قبضہ کر گِھدا تے ہِک شہر وی نہ چھوڑیا۔ اساں کُل سَٹھ شہراں اُتے یعنی ارجُوب دے سارے علاقے اُتے قبضہ کیتا جیندے اُتے بسن دے بادشاہ عوج دی حکُومت ہئی۔ 5اُنہاں سارے شہراں دی حفاظت اُچیاں اُچیاں چار دیواریاں تے وڈے کُنڈے آلے دروازیاں نال کیتی گئی ہئی۔ دیہات ءچ بہُوں ساریاں آبادیاں وی مِل گئیاں جِنہاں دیاں چار دیواریاں نہ ہَن۔ 6اساں اُنہاں دے نال او کُجھ کیتا جیہڑا اساں حسبون دے بادشاہ سِیحون دے نال کیتا ہا۔ اساں ہر شہر کُوں تے سارے جواناں، عورتاں تے بالاں کُوں مکمل طور تے ہلاک کر ڈِتا۔ 7پر اساں ڈھورڈنگراں تے شہراں دا سارا لُٹیا ہویا مال آپنڑے کیتے رکھ گِھدا۔

8اِینویں اساں اُوں ویلے امورِیاں دے ڈوہائیں بادشاہاں تُوں اَرنون دی وادی تُوں گِھن تے حرمُون پہاڑ تئیں یردن دریا دا مشرقی علاقہ کَھس گِھدا۔

9صیدا دے راہوݨ آلے حرمُون کُوں سِریُون آدھے ہَن جڈاں جو اموری اُونکُوں سنِیر آدھے ہَن۔

10اساں عوج بادشاہ دے سارے علاقے اُتے یعنی اُچے میدان دے سارے شہر، سارا جِلعاد تے بسن دے علاقے سلکہ تے ادرعی تئیں قبضہ کر گِھدا۔

11بسن دا بادشاہ عوج بنی رفا ءچوں آخری جوان ہا۔ اُوندا لُوہے دا پلنگ اِنسانی ہتھ دے ناپ دے مطابق تیرہاں فُٹ تُوں ودھ لمبا تے چِھی فُٹ کُھلا ہا تے اَج تئیں عمونیاں دے شہر ربّہ ءچ موجود ہے۔

یردن دے مشرق ءچ کنعان دی تقسیم

12جِیں ویلے اساں یردن دریا دے مشرقی علاقے اُتے قبضہ کیتا تاں مَیں رُوبِن تے جد دے قبیلیاں کُوں اُنہاں دا جنُوبی حصہ شہراں سمیت ڈے ڈِتا۔ ایہ حصہ جنُوب ءچ اَرنون وادی اُتے بنڑے ہوئے شہر عروعیر تُوں گِھن تے جِلعاد دے پہاڑی علاقے دے ادھے حصے تئیں ہا۔ 13جِلعاد دا شمالی حصہ تے بسن دا سارا مُلک جِتھاں پہلے عوج بادشاہ دی حکُومت ہئی، مَیں منسّی دے ادھے قبیلے کُوں ڈے ڈِتا ہا۔

بسن ءچ ارجُوب دا علاقہ ہے جیہڑا بنی رفا دا مُلک اکھویندا ہا۔

14منسّی دے قبیلے دے یائِیر ناں دے ہِک جوان بنی جسُور تے بنی معکات دی سرحد تئیں ارجُوب علاقے اُتے قبضہ کر گِھدا ہا۔ اُوں اِیں علاقے یعنی بسن دیاں وستیاں کُوں آپنڑا ناں ڈِتا تے اَج تئیں او علاقہ حَوّوت یائِیر [یعنی یائِیر دیاں وستیاں] اکھویندے۔

15مَیں جِلعاد دا شمالی حصہ بنی مکِیر1 کُوں ڈِتا 16پر جِلعاد دا جنُوبی حصہ رُوبِن تے جد دے قبیلیاں کُوں ڈِتا۔ اِیں حصے دی ہِک سرحد جنُوب ءچ اَرنون دی وادی دے وچال ہے، جڈاں جو ڈُوجھی سرحد یبوق دی وادی ہے جیندے پار عمونیاں دی حکُومت ہے۔ 17اُوندی مغربی سرحد یردن دریا ہے یعنی کِنّرت2 جھیل تُوں گِھن تے یردن دریا دی خشک وادی تے بحیرہ مُردار تئیں جیہڑا پِسگہ دے پہاڑی سلسلے دے وچال ہے۔

18اُوں ویلے مَیں رُوبِن، جد تے منسّی دے قبیلیاں کُوں آکھیا، ”رب العالمین تُہاڈے خُدا تُہاکُوں میراث ءچ ایہ مُلک ڈے ڈِتے۔ پر لازم ہے جو تُہاڈے جنگ لڑن دے قابل سارے جوان آپنڑے ہتھیار چا تے تُہاڈے اِسرائیلی بِھرانواں دے اگُوں اگُوں یردن دریا کُوں پار کرݨ۔ 19صرف تُہاڈیاں عورتاں تے بال پِچُھوں رہ تے اُنہاں شہراں ءچ اِنتظار کر سگدے ہِن جیہڑے مَیں تُہاڈے کیتے مقرر کیتے ہِن۔ تُساں آپنڑے ڈھورڈنگراں کُوں وی پِچُھوں چھوڑ سگدے ہیوے کیوں جو میکُوں پتہ ہے جو تُہاڈے کولھ بہُوں سارے ڈھورڈنگر ہِن۔ 20آپنڑے بِھرانواں دے نال ٹُردے ہوئے اُنہاں دی مدد کریندے راہو۔ جِیں ویلے رب العالمین تُہاڈا خُدا اُنہاں کُوں یردن دریا دے پار آلا مُلک ڈیسی تاں او تُہاڈے وانگُوں ارام تے سکون نال اُتھاں آباد تھی ویسن، وَل تُساں اِتھاں آپنڑے وراثتی علاقے ءچ واپس وَل سگدے ہیوے۔“

مُوسیٰ کُوں یردن پار کرݨ دی اِجازت نئیں مِلدی

21اُوں ویلے مَیں یشُوع کُوں آکھیا، ”تَیں آپنڑے اکھیں نال سارا کُجھ ڈیکھ گِھدا ہا جیہڑا رب العالمین تیڈے خُدا اُنہاں ڈوہائیں بادشاہاں سِیحون تے عوج نال کیتا ہا۔ رب العالمین اِیہو کُجھ ہر اُوں بادشاہ دے نال کریسی جیندے مُلک اُتے تُوں دریا کُوں پار کر تے حملہ کریسیں۔

22تُساں اُنہاں تُوں نہ ڈرو، رب العالمین تُہاڈا خُدا خود تُہاڈے ولُوں جنگ کریسی۔“

23اُوں ویلے مَیں رب العالمین کُوں مِنت کر تے آکھیا، 24”یا رب تعالیٰ، تُوں آپنڑے خادم کُوں آپنڑی عظمت تے قُدرت ڈِکھاوݨ شروع کیتی ہے۔ کیا اسمان یا زمین اُتے کوئی بِیا خُدا ہے جیہڑا تیڈے وانگُوں ایجھے عظیم کم کر سگدے؟ بالکل نئیں۔ 25مہربانی کر تے میکُوں وی یردن دریا کُوں پار کر تے اُوں چنگے مُلک کُوں تے اُوندے چنگے پہاڑی علاقے تے لُبنان کُوں ڈیکھنڑ دی اِجازت ڈے۔“

26پر تُہاڈے پارُوں رب العالمین میڈے نال ناراض ہا تے اُوں میڈی ہِک نہ سُنڑی بلکہ میکُوں آکھیا، ”بس کر! اگُوں تے کڈھائیں میڈے نال اِیندا ذِکر نہ کریں۔ 27پِسگہ دی چوٹی اُتے چڑھ تے چارے پاسُوں ڈیکھ۔ اُتھاں غور نال ڈیکھ، کیوں جو تُوں یردن دریا دے پار نہ ویسیں۔ 28آپنڑی جاہ تے یشُوع کُوں مقرر کر۔ اُوندا حوصلہ ودھا تے اُونکُوں تگڑا کر کیوں جو اُوہو اِیں قوم کُوں یردن دریا دے پار گِھن ویسی تے اُوں مُلک کُوں جِینکُوں تُوں پہاڑ تُوں ڈیکھسیں، اُنہاں دی میراث بنڑیسی۔“

29اِیں واسطے اساں بیت فغُور دے نیڑے وادی ءچ رُکے ریہے۔