Modern Central Saraiki Bible
اِستثنا 8
خُدا کُوں نہ بُھلائے
احتیاط نال اُنہاں سارے حُکماں اُتے عمل کرو جیہڑے مَیں اَج تُہاکُوں ڈیندا پِیا ہاں۔ کیوں جو اِینویں کرݨ نال تُساں زندہ راہسو، گِنتری ءچ ودھسو تے وَنج تے اُوں مُلک اُتے قبضہ کر گِھنسو جیندے ڈیوݨ دا وعدہ رب العالمین تُہاڈے پِیُو ڈاڈے نال قَسم کھا تے کیتا ہا۔
یاد رکھو جو رب العالمین تُہاڈا خُدا بیابان ءچ چالیہہ سال تئیں تُہاڈی راہنمائی کِینویں کریندا ریہا تاں جو تُہاکُوں عاجز کر تے ازماوے تے پتہ کرے جو تُہاڈے دلءچ کیا ہے تے کیا تُساں اُوندے حُکماں اُتے ٹُرسو یا نئیں۔ اُوں تُہاکُوں عاجز کر تے بُکھا تھیوݨ ڈِتا، وَل تُہاکُوں مَن کھوایا جیندے تُوں نہ تُساں تے نہ تُہاڈے پِیُو ڈاڈا واقف ہَن، کیوں جو او تُہاکُوں سکھاونڑا چاہندا ہا جو اِنسان صرف روٹی نال ای زندہ نئیں راہندا، بلکہ ہر گالھ تُوں جیہڑی رب العالمین دے مُنہ ءچوں نِکلدی ہے۔
اِنہاں چالیہہ سالاں دے دوران نہ تُہاڈے کپڑے گِھسے تے نہ تُہاڈے پیر سُجے۔ اِیں کیتے دل ءچ جاݨ گِھنو جو جِینویں بندہ آپنڑے پوتر دی تربیت کریندے اُونویں ای رب العالمین تُہاڈا خُدا تُہاڈی تربیت کریندے۔
رب العالمین آپنڑے خُدا دے حُکماں اُتے عمل کرو تے اُوندے رستے اُتے ٹُرو، تے اُوندا خوف منّو۔ کیوں جو رب العالمین تُہاڈا خُدا تُہاکُوں ہِک چنگے مُلک ءچ گِھدی ویندے جیندے ءچ ندیاں تے ایجھے چشمے ہِن جیہڑے پہاڑاں تے وادیاں دی زمین تُوں نِکلدے ہِن۔ اُوندی پیداوار گندم، جَوں، انگُور، ہنجیر، انار، زیتون دا تیل تے ماکھی ہے۔ اُوں مُلک ءچ روٹی دی تھوڑ نہ ہوسی، تے تُہاکُوں کہیں وی شے دی کمی نہ ہوسی۔ اُوندے پتھراں ءچ لُوہا موجود ہے تے اُوندیاں پہاڑیاں کُوں کھٹ تے تُساں اُنہاں تُوں تانبا گِھن سگسو۔
جِیں ویلے تُساں کثرت دا کھانڑا کھا تے رَج ونجو تاں وَل رب العالمین آپنڑے خُدا دی تعریف کرائے جئیں تُہاکُوں ایہ چنگا مُلک ڈِتے۔ خبردار! رب العالمین آپنڑے خُدا کُوں نہ بُھلائے تے اُوندے اُنہاں فرماناں، حُکماں تے قانُوناں اُتے عمل کرݨ تُوں پِچُھوں نہ ہٹائے جیہڑے مَیں اَج تُہاکُوں ڈیندا پِیا ہاں۔ اِینویں نہ تھیوے جو جِیں ویلے تُساں کثرت نال کھانڑا کھا تے رَج ونجو تے شاندار گھر بنڑا تے اُنہاں ءچ راہو، تے تُہاڈے گائیں ڈاند، بھیڈ بکریاں، سونا چاندی تے باقی سارے مال ءچ ودھارا تھی ونجے تاں تُساں مغرُور تھی تے رب العالمین آپنڑے خُدا کُوں بُھل ونجو، جیہڑا تُہاکُوں مِصر دی غُلامی تُوں کڈھ آیا ہا۔ جِیں ویلے تُساں اُوں وڈے تے ہولناک بیابان ءچ سفر کریندے پئے ہَوے، جیندے ءچ زہریلے نانگ تے وِٹھوویں ہَن تاں اُوہو تُہاڈی راہنمائی کریندا ریہا۔ ہا، اُوں سُکی جاہ ءچ جِتھاں پانڑی نہ ہا، اُوہو سخت پتھر ءچوں پانڑی کڈھ آیا۔ بیابان ءچ اُوہو تُہاکُوں مَن کھویندا ریہا، جیندے بارے ءچ تُہاڈے پِیُو ڈاڈے کُوں کوئی پتہ نہ ہا۔ اُنہاں مُصیبتاں تُوں او تُہاکُوں عاجز کر تے ازمیندا ریہا تاں جو آخر کار تُہاڈا بھلا تھیوے۔
خبردار! ایہ نہ اکھائے جو اساں آپنڑی ای طاقت تے زور نال ایہ سبھ کُجھ گِھدا ہے۔ بلکہ رب العالمین آپنڑے خُدا کُوں یاد کرائے جئیں تُہاکُوں دولت حاصل کرݨ دی قابلیت ڈِتی ہے۔ کیوں جو او اَج وی اُوں عہد اُتے قائم ہے جیہڑا اُوں تُہاڈے پِیُو ڈاڈے نال کیتا ہا۔
رب العالمین آپنڑے خُدا کُوں نہ بُھلائے، تے نہ بئے معبُوداں دے پِچُھوں وَنج تے اُنہاں کُوں سجدہ تے اُنہاں دی خدمت کرائے۔ نہ تاں مَیں خود گواہ ہاں جو تُساں یقیناً ہلاک تھی ویسو۔ جیکر تُساں رب العالمین آپنڑے خُدا دی اطاعت نہ کریسو تاں وَل او تُہاکُوں اُنہاں قوماں آلی کار تباہ کر ڈیسی جیہڑیاں تُہاڈے تُوں پہلے اِیں مُلک ءچ راہندیاں ہَن۔
Modern Central Saraiki Bible. Copyright © Strategic Resource Group. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.