Modern Central Saraiki Bible
اِستثنا 9
مُلک بنی اِسرائیل دی نیکی پارُوں نئیں مِلیا
اِسرائیلیو، سُنڑو! اَج تُساں یردن دریا کُوں پار کرݨ آلے ہیوے۔ ڈُوجھے پاسُوں تُساں ایجھیاں قوماں کُوں کڈھ ڈیسو جیہڑیاں تُہاڈے تُوں وڈیاں تے زورآور ہِن تے جِنہاں دے وڈے شہراں دیاں چار دیواریاں اسمان نال گالھیں کریندیاں ہِن۔ اُتھاں بنی عناق وسدے ہِن جیہڑے تگڑے تے اُچے قد آلے ہِن۔ تُساں اُنہاں دے بارے ءچ خود جانڑدے ہیوے تے ایہ وی سُنڑیا ہے جو، ”کوݨ بنی عناق دا سامنڑا کر سگدے؟“ پر اَج جاݨ گِھنو جو رب العالمین تُہاڈا خُدا تُہاڈے اگُوں اگُوں ٹُردے ہوئے اُنہاں کُوں کولا کر ڈیوݨ آلی بھاہ وانگُوں ہلاک کر ڈیسی۔ او تُہاڈے سامنڑے اُنہاں کُوں پست کر ڈیسی۔ تے تُساں اُنہاں کُوں کڈھ تے جلدی مِٹا ڈیسو، جِینویں رب العالمین وعدہ کیتے۔
جِیں ویلے رب العالمین تُہاڈا خُدا اُنہاں کُوں تُہاڈے سامنڑے تُوں کڈھ ڈیسی تاں تُساں آپنڑے آپنڑے دل ءچ ایہ نہ اکھائے، ”مَیں نیک ہاں تے اِیں کیتے رب العالمین میکُوں لائق سمجھ تے اِتھاں گِھن آئے تے ایہ مُلک میراث ءچ ڈے ڈِتے۔“
بالکل نئیں، بلکہ رب العالمین اُنہاں قوماں کُوں اُنہاں دی بدی پارُوں تُہاڈے سامنڑے تُوں کڈھیندا پئے۔ تُساں آپنڑی نیکی تے دیانت داری پارُوں اُوں مُلک اُتے قبضہ نہ کریسو بلکہ رب العالمین تُہاڈا خُدا اُنہاں قوماں کُوں اُنہاں دی بدی پارُوں تُہاڈے سامنڑے تُوں کڈھ ڈیسی۔ نال نال رب العالمین اُوں وعدے کُوں جیہڑا اُوں تُہاڈے پِیُو ڈاڈے ابرہام، اِضحاق تے یعقُوب نال قَسم کھا تے کیتا ہا، پُورا کریسی۔
اِیں کیتے جاݨ گِھنو جو رب العالمین تُہاڈا خُدا تُہاکُوں ایہ چنگا مُلک تُہاڈی نیکی پارُوں نئیں ڈیندا پِیا بلکہ حقیقت تاں ایہ ہے جو تُساں ہِک ضِدی قوم ہیوے۔
سونے دا ویہڑا
یاد رکھائے تے کڈھائیں نہ بُھلائے جو تُساں بیابان ءچ رب العالمین آپنڑے خُدا کُوں کِینویں ناراض کیتا ہا۔ مِصر تُوں نِکلنڑ ویلے تُوں گِھن تے اِتھاں پُجنڑ تئیں تُساں رب العالمین دے خلاف بغاوت کریندے ریہے ہیوے۔ خاص کر سِینا پہاڑ تلے تُساں رب العالمین کُوں اِتنی کاوڑ ڈیوائی جو او تُہاکُوں ہلاک کرݨ آلا ہا۔ اُوں ویلے مَیں پہاڑ اُتے چڑھ گِیا تاں جو پتھر دیاں تختیاں مِل ونجنڑ یعنی اُوں عہد دیاں تختیاں جیہڑا رب العالمین تُہاڈے نال بدھیا ہا۔ مَیں چالیہہ ڈینہہ تے چالیہہ رات بغیر کُجھ کھادے پیتے اُتھاں موجود ریہا۔
رب العالمین میکُوں او ڈوہائیں تختیاں ڈِتیاں جِنہاں اُتے اُوں او سارے گالھیں لِکھیاں جیہڑیاں اُوں پہاڑ اُتے بھاہ ءچوں آکھیاں ہَن جِیں ویلے تُساں پہاڑ تلے کٹھے ہَوے۔ چالیہہ ڈینہہ تے چالیہہ رات تُوں بعد رب العالمین میکُوں پتھر دیاں او ڈوہائیں تختیاں یعنی عہد دیاں تختیاں ڈِتیاں۔
وَل رب العالمین میکُوں آکھیا، ”اُٹھی، تے جلدی تلے لہہ وَنج کیوں جو تیڈے لوک جِنہاں کُوں تُوں مِصر ءچوں کڈھ آیا ہَویں، وِگڑ گئے ہِن۔ او کتنی جلدی اُوں راہ تُوں ہٹ گئے ہِن جیندے اُتے ٹُرݨ دا مَیں اُنہاں کُوں حُکم ڈِتا ہا۔ اُنہاں آپنڑے کیتے ہِک ڈھالی ہوئی مُورت بنڑا گِھدی ہے۔“
تے رب العالمین میکُوں ایہ وی آکھیا، ”مَیں ڈیکھ گِھدے جو ایہ لوک کتنے ضِدی ہِن۔ ہُنڑ میکُوں چھوڑ ڈے تاں جو مَیں اُنہاں کُوں تباہ کر تے اُنہاں دا ناں نشان دُنیا تُوں مِٹا ڈیواں۔ اُنہاں دی جاہ تے مَیں تیڈے تُوں ہِک قوم بنڑیساں جیہڑی اُنہاں کولُھوں وڈی تے زورآور ہوسی۔“
مَیں مُڑ تے پہاڑ تُوں لتھا جیہڑا ہُنڑ تئیں بھڑکدا پِیا ہا۔ عہد دیاں ڈوہائیں تختیاں میڈے ہتھاں ءچ ہَن۔ تُہاکُوں ڈیدھے ای میکُوں پتہ لگ گِیا ہا جو تُساں رب العالمین آپنڑے خُدا دا گُناہ کیتے۔ تُساں آپنڑے کیتے ویہڑے دی شکل ءچ ہِک بُت ڈھال تے اُونکُوں سجدہ کیتے۔ تُساں کتنی جلدی اُوں راہ تُوں ہٹ گئے ہَوے جیندے اُتے ٹُرݨ دا حُکم رب العالمین ڈِتا ہا۔
اُوں ویلے مَیں تُہاڈے اکھیں دے سامنڑے ڈوہائیں تختیاں کُوں زمین اُتے سَٹ تے ٹُکڑے ٹُکڑے کر ڈِتا ہا۔ وَل مَیں پہلے آلی کار رب العالمین دے سامنڑے مُنہ دے بھار ڈھے پِیا۔ مَیں نہ کُجھ کھادا نہ کُجھ پِیتا تے چالیہہ ڈینہہ تے چالیہہ رات تُہاڈے سارے گُناہاں پارُوں اِیں حالت ءچ ریہا کیوں جو تُساں رب العالمین دی نظر ءچ بدی کر تے اُونکُوں غضب ناک کر ڈِتا ہا۔ او تُہاڈے نال اِتنا ناراض ہا جو مَیں بہُوں ڈر گِیا ہم۔ اِینویں لگدا پِیا ہا جو او تُہاکُوں ہلاک کر ڈیسی پر اِیں پھیری وی رب العالمین میڈی سُنڑ گِھدی۔ مَیں ہارُون کیتے وی دُعا کیتی، کیوں جو رب العالمین اُوندے نال وی اِتنا ناراض ہا جو اُونکُوں ہلاک کرݨ چاہندا ہا۔
جیہڑا ویہڑا تُساں گُناہ کر تے بنڑایا ہا، اُونکُوں مَیں ساڑ ڈِتا تے باریک پِیہہ تے ذرہ ذرہ کر ڈِتا تے اُونکُوں اُوں ندی ءچ سَٹ ڈِتا جیہڑی پہاڑ تُوں واہندی ہئی۔
تُساں رب العالمین کُوں تبعیرہ، مسّہ تے قِبروت ہَتّاوہ ءچ وی کاوڑ ڈیوائی1۔ تے جِیں ویلے رب العالمین تُہاکُوں قادِس بَرنِیعَ تُوں ایہ آکھ تے بھیجیا جو ”ونجو، اُوں مُلک اُتے قبضہ کرو جیہڑا مَیں تُہاکُوں ڈِتے۔“ تاں تُساں رب العالمین آپنڑے خُدا دے حُکم دی خلاف ورزی کر تے نہ اُوندے اُتے بھروسا کیتا تے نہ ای اُوندی سُنڑی۔ جڈاں تُوں مَیں تُہاکُوں جانڑدا ہاں، تُساں رب العالمین دے نال باغی ای ریہے ہیوے۔
اِیں واسطے مَیں چالیہہ ڈینہہ تے چالیہہ رات رب العالمین دے سامنڑے زمین اُتے مُنہ دے بھار ڈھٹھا ریہا، کیوں جو رب العالمین آکھیا ہا جو او تُہاکُوں ہلاک کر ڈیسی۔ مَیں مِنت کر تے اُونکُوں آکھیا، ”یا رب تعالیٰ، آپنڑے لوکاں کُوں تباہ نہ کر، او تاں تیڈی ای ملکیت ہِن جِنہاں کُوں تُوں آپنڑی عظیم قُدرت نال چُھڑایا تے وڈے زور نال مِصر ءچوں کڈھیا۔ آپنڑے خادم ابرہام، اِضحاق تے یعقُوب کُوں یاد کر تے اِنہاں لوکاں دی ضد، بدی تے گُناہ دو دھیان نہ ڈے۔ نہ تاں مِصری اکھیسن، ’رب العالمین اُنہاں کُوں اُوں مُلک ءچ پُچاوݨ دے قابل نہ ہا جیندے ڈیوݨ دا وعدہ اُوں کیتا ہا بلکہ او اُنہاں دے نال نفرت کریندا ہا تے اِیں واسطے او اُنہاں کُوں ہلاک کرݨ کیتے بیابان ءچ گِھن آیا ہا۔‘
یا رب العالمین! او تاں تیڈے لوک تے تیڈی ملکیت ہِن جِنہاں کُوں تُوں آپنڑی عظیم قُدرت تے طاقت دے نال مِصر ءچوں کڈھ آیا ہیں۔“
Source notes (1)
- Footnote ڈیکھو گِنتری 11 : 1-3 تے خرُوج 17 : 7 تے گِنتری 11 : 34۔
Modern Central Saraiki Bible. Copyright © Strategic Resource Group. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.