اِستثنا 30

توبہ دے چنگے نتیجے

1[ اِسرائیلیو] آئندہ جِیں ویلے او ساریاں برکتاں تے لعنتاں جیہڑیاں مَیں اَج تُہاکُوں ڈسایاں ہِن، تُہاڈے اُتے آوݨ تے جڈاں رب العالمین تُہاڈا خُدا تُہاکُوں مختلف قوماں ءچ کِھنڈا ڈیوے تاں وَل تُساں اِنہاں گالھیں کُوں یاد کریسو۔ 2تے جیکر تُساں تے تُہاڈی اولاد رب العالمین آپنڑے خُدا دے کولھ واپس آ تے پُورے دل تے جان نال اُوندی سُنڑسو تے اِنہاں سارے حُکماں اُتے عمل کریسو جیہڑے اَج مَیں تُہاکُوں ڈیندا پِیا ہاں، 3تاں رب العالمین تُہاڈا خُدا تُہاکُوں بحال کریسی تے تُہاڈے اُتے رحم کر تے تُہاکُوں اُنہاں ساریاں قوماں ءچوں کڈھ تے کٹھا کریسی جِنہاں ءچ تُہاکُوں کِھنڈایا ہا۔ 4بھانویں تُساں دُنیا دے سبھ تُوں دُور دے مُلک ءچ ای کیوں نہ ہووو، رب العالمین تُہاڈا خُدا تُہاکُوں کٹھا کر تے واپس گِھن آسی۔ 5او تُہاکُوں تُہاڈے پِیُو ڈاڈے دے مُلک ءچ گِھن آسی تے تُساں اُوندے اُتے قبضہ کر گِھنسو۔ وَل او تُہاکُوں تُہاڈے پِیُو ڈاڈے تُوں ودھ تے کامیابی ڈیسی تے تُہاڈی گِنتری اُنہاں تُوں وی زیادہ ودھیسی۔

6رب العالمین تُہاڈا خُدا تُہاڈے تے تُہاڈی اولاد دے دِلاں کُوں فرمانبردار بنڑیسی1 تاں جو تُساں اُونکُوں پُورے دل تے جان نال پیار کرو تے زندہ راہو۔ 7وَل رب العالمین تُہاڈا خُدا ایہ ساریاں لعنتاں تُہاڈے دُشمنڑاں اُتے جیہڑے تُہاڈے نال نفرت رکھیندے تے تُہاکُوں ڈُکھ ڈیندے ہِن، نازل کریسی۔ 8تُساں رب العالمین دی ولا سُنڑسو تے اُوندے حُکماں اُتے عمل کریسو جیہڑے مَیں اَج تُہاکُوں ڈیندا پِیا ہاں۔ 9جیہڑا کُجھ وی تُساں کریسو رب العالمین تُہاکُوں کامیابی ڈیسی۔ تُہاکُوں اولاد، مویشی تے فصلاں کثرت نال مِلسن کیوں جو جِینویں رب العالمین تُہاڈے پِیُو ڈاڈے دی بھلائی کرݨ ءچ خوشی محسوس کریندا ہا، اُونویں ای او تُہاڈی وی بھلائی کر تے خوش تھیسی۔

10شرط ایہ ہے جو تُساں رب العالمین آپنڑے خُدا دی سُنڑو تے شریعت دی اِیں کتاب ءچ لِکھے ہوئے حُکماں تے قانُوناں اُتے عمل کرو تے پُورے دل و جان نال اُوندے دو رجُوع کرو۔

11جیہڑے حُکم مَیں اَج تُہاکُوں ڈیندا پِیا ہاں، او نہ تُہاڈے کیتے ڈھیر مُشکل ہِن تے نہ تُہاڈی پہنچ تُوں دُور ہِن۔ 12او اسمان اُتے نئیں جو تُساں آکھو، ’اسمان اُتے کوݨ چڑھسی تے ساڈے کیتے ایہ حُکم تلے گِھن آسی تاں جو اساں اُنہاں کُوں سُنڑ تے اُنہاں اُتے عمل کر سگوں؟‘ 13او سمندر دے پار وی نئیں جو تُساں آکھو، ’کوݨ سمندر کُوں پار کر تے ونجے تے ساڈے کیتے ایہ حُکم گِھن آوے تاں جو اساں اُنہاں کُو سُنڑ تے اُنہاں اُتے عمل کر سگوں؟‘ 14ایہ کلام تُہاڈے بہُوں نیڑے بلکہ تُہاڈے مُنہ تے دل ءچ ہے، اِیں واسطے اِیندے اُتے عمل کرو۔

زندگی یا موت دا اِنتخاب

15ڈیکھو! اَج مَیں تُہاکُوں ڈُو رستے ڈیکھیندا پِیا ہاں۔ ہِک زندگی تے بھلائی آلے پاسے ویندے تے ڈُوجھا موت تے ہلاکت آلے پاسے۔ 16اَج مَیں تُہاکُوں حُکم ڈیندا ہاں جو رب العالمین آپنڑے خُدا نال پیار کرو، اُوندی راہ اُتے ٹُرو تے اُوندے فرمان، حُکم تے قانُون دے تابع راہو۔ وَل تُساں زندہ رہ تے ترقی کریسو تے رب العالمین تُہاڈا خُدا تُہاکُوں اُوں مُلک ءچ برکت ڈیسی جیندے اُتے قبضہ کرݨ کیتے تُساں ویندے پئے ہیوے۔

17جے تُہاڈا دل اِیں رستے تُوں ہٹے تے تُساں نافرمانی کرو تے ڈُوجھیاں قوماں دے گالھیں سُنڑ تے بئے معبُوداں کُوں سجدہ کرو تے اُنہاں دی خدمت کرو 18تاں تُساں ضرور تباہ تھی ویسو۔ مَیں اَج تُہاکُوں چِتا ڈیندا ہاں جو تُساں زیادہ دیر اِیں مُلک ءچ آباد نہ راہسو جیندے اُتے قبضہ کرݨ کیتے تُساں یردن دریا کُوں پار کرݨ آلے ہیوے۔

19مَیں اَج اسمان تے زمین کُوں گواہ بنڑیندا ہاں جو مَیں زندگی تے موت، برکت تے لعنت کُوں تُہاڈے سامنڑے رکھیا ہے۔ ہُنڑ تُساں زندگی دا رستہ چُنڑو تاں جو تُساں تے تُہاڈی اولاد زندہ راہوے۔ 20رب العالمین آپنڑے خُدا کُوں پیار کرو، اُوندی سُنڑو تے اُوندے نال چِمبڑے راہو کیوں جو او تُہاڈی زندگی ہے تے اُوہو بخش ڈیسی جو تُساں اُوں مُلک ءچ زندہ راہو جیندے ڈیوݨ دا وعدہ اُوں قَسم کھا تے تُہاڈے پِیُو ڈاڈے ابرہام، اِضحاق تے یعقُوب نال کیتا ہا۔“