اِستثنا 29

موآب ءچ خُدا نال نواں عہد

1جِیں ویلے بنی اِسرائیل موآبیاں دے مُلک ءچ ہَن تاں رب العالمین مُوسیٰ کُوں اُنہاں دے نال ہِک نواں عہد بدھنڑ دا حُکم ڈِتا تے اُوندے گالھیں ایہ ہِن۔ ایہ اُوں عہد تُوں علاوہ ہا جیہڑا رب العالمین سِینا پہاڑ اُتے اُنہاں نال بدھیا ہا۔ 2اِیندے کیتے مُوسیٰ سبھ بنی اِسرائیل کُوں سڈ تے آکھیا، ”تُساں خود ڈِٹھے جو رب العالمین مِصر دے بادشاہ، اُوندے غُلاماں تے پُورے مُلک نال کیا کیتے۔ 3تُساں آپنڑے اکھیں نال او وڈیاں مُصیبتاں، نشان تے معجزے ڈِٹھے ہِن جِنہاں نال رب العالمین آپنڑی قُدرت دا اِظہار کیتے۔

4پر افسوس! اَج تئیں رب العالمین تُہاکُوں سمجھنڑ آلا دل، ڈیکھنڑ آلے اکھیں تے سُنڑݨ آلے کَن نئیں ڈِتے۔ 5بیابان ءچ رب العالمین چالیہہ سال تُہاڈی راہنمائی کیتی۔ اِیں دوران نہ تُہاڈے کپڑے پھٹے تے نہ تُہاڈیاں جُتیاں گِھسیاں۔ 6نہ تُہاڈے کولھ روٹی ہئی تے نہ انگُور دا رَس یا کوئی بئی پِیوݨ آلی شے۔ وَل وی رب العالمین تُہاڈیاں ضرورتاں پُوریاں کیتیاں تاں جو تُساں جاݨ گِھنو جو رب العالمین ای تُہاڈا خُدا ہے۔

7وَل جِیں ویلے اساں اِتھاں آئے تاں حسبون دا بادشاہ سِیحون تے بسن دا بادشاہ عوج ساڈے نال لڑن آئے پر اساں اُنہاں کُوں ہرایا 8تے اُنہاں دیاں زمیناں اُتے قبضہ کر تے رُوبِن دے قبیلے، جد دے قبیلے تے منسّی دے ادھے قبیلے کُوں میراث ءچ ڈے ڈِتیاں۔ 9احتیاط نال اِیں عہد دے گالھیں اُتے عمل کرو تاں جو تُساں ہر گالھ ءچ کامیاب تھیؤ۔

10اَج تُساں سبھ رب العالمین آپنڑے خُدا دے حضُور کھڑے ہیوے۔ تُہاڈے قبیلیاں دے سردار، تُہاڈے بزُرگ، تُہاڈے افسر، تُہاڈے بندے، 11تُہاڈیاں عورتاں، تُہاڈے بال تے تُہاڈے ءچ راہوݨ آلے پردیسی، لکڑ کپنڑ آلیاں کنُوں گِھن تے پانڑی بھرݨ آلیاں تئیں سارے اِتھاں حاضر ہِن، 12تاں جو رب العالمین آپنڑے خُدا دے اُوں عہد ءچ شامل تھی ونجو جیہڑا او اَج قَسم کھا تے تُہاڈے نال بدھیندا پئے۔ 13اِیں عہد نال او اَج اِیں گالھ دی تصدیق کریندا پئے جو تُساں اُوندے لوک تے او تُہاڈا خُدا ہے، جِیندا وعدہ اُوں تُہاڈے تے تُہاڈے پِیُو ڈاڈے ابرہام، اِضحاق تے یعقُوب نال قَسم کھا تے کیتا ہا۔‏ 14پر رب العالمین ایہ عہد قَسم کھا تے نہ صرف تُہاڈے نال بدھیندا پئے 15جیہڑے اَج اُوندے حضُور حاضر ہیوے بلکہ تُہاڈیاں آوݨ آلیاں نسلاں نال وی۔

بُت پرستی دی سزا

16تُساں خود جانڑدے ہیوے جو اساں مِصر ءچ کِینویں زندگی گُزریندے پئے ہسے تے ایہ وی جو اساں کِینویں مختلف مُلکاں ءچوں تھیندے ہوئے اِتھاں تئیں پُجے ہیں۔ 17تُساں اُنہاں دیاں مکرُوہ شیواں، لکڑ، پتھر، چاندی تے سونے دے بُتاں کُوں ڈِٹھا۔ 18خبردار راہو جو اَج تُہاڈے وچال کوئی مرد، عورت، آبائی خاندان یا قبیلہ آپنڑے رب العالمین تُوں ہٹ تے ڈُوجھے قبیلیاں دے بُتاں دی پُوجا نہ کرے۔ اِینویں نہ تھیوے جو تُہاڈے وچال کوئی جڑھ پُھٹ تے زہریلا تے کوڑا پھل بنڑ ونجے۔

19ایجھا بندہ عہد دیاں لعنتاں سُنڑ تے دل ءچ آپنڑے آپ کُوں تسلی ڈے تے ایہ نہ آکھے، ’بے شک مَیں ضد ءچ آپنڑی مرضی اُتے ٹُردا راہواں، وَل وی مَیں محفوظ راہساں۔‘ اِینویں کرݨ نال او نہ صرف آپنڑے اُتے بلکہ پُورے مُلک اُتے تباہی گِھن آسی1۔ 20رب العالمین کڈھائیں وی اُونکُوں معاف نہ کریسی، بلکہ اُونکُوں آپنڑے غضب تے غیرت دا نشان بنڑیسی۔ اِیں کتاب ءچ لِکھیاں ہوئیاں ساریاں لعنتاں اُوندے اُتے آسن تے رب العالمین اُوندا ناں نشان دُنیا تُوں مِٹا ڈیسی۔ 21رب العالمین اُونکُوں جماعت تُوں اَنج کر تے اُوندے اُتے عہد دیاں او ساریاں لعنتاں بھجیسی جیہڑیاں اِیں شریعت دی کتاب ءچ لِکھیاں ہِن۔

22آوݨ آلے زمانے ءچ تُہاڈی اولاد تے دُور دے مُلکاں تُوں آوݨ آلے پردیسی اُنہاں مُصیبتاں تے بیماریاں دے اثرات ڈیکھسن جِنہاں نال رب العالمین مُلک تباہ کیتا ہوسی۔ 23ہر پاسُوں زمین سڑی ہوئی تے گندھک تے نمک نال ڈھکی ہوئی نظر آسی۔ اِیندے ءچ بیج وی نہ رہایا وَنج سگسی۔ اُتھاں خودبخود جمنڑ آلے گھاہ تے بُوٹے وی نہ تھیسن۔ تُہاڈا مُلک سدُوم، عمُورہ، اَدمہ تے ضبوئِیم شہراں آلی کار ہوسی جِنہاں کُوں رب العالمین آپنڑے غضب نال برباد کیتا2۔ 24ساریاں قوماں سوال کریسن جو ’رب العالمین اِیں مُلک نال اِینویں کیوں کیتا؟ اِیں سخت غضب دی کیا وجہ ہئی؟‘ 25اُنہاں کُوں جواب مِلسی، ’وجہ ایہ ہئی جو اِیں مُلک دے وسنڑ آلیاں رب العالمین آپنڑے پِیُو ڈاڈے دے خُدا دا اوہ عہد تروڑ ڈِتا جیہڑا اُوں مِصر تُوں نِکلنڑ ویلے اُنہاں نال بدھیا ہا۔ 26اُنہاں مُڑ تے ڈُوجھے معبُوداں دی خدمت کیتی تے اُنہاں کُوں سجدہ کیتا۔ ایجھے معبُوداں کُوں جِنہاں تُوں او پہلے واقف نہ ہَن تے جِنہاں دی پُوجا کرݨ تُوں رب العالمین منع کیتا ہا۔ 27اِیں کیتے اُوندا غضب اِیں مُلک اُتے نازل تھیّا تے او اُنہاں اُتے ساریاں لعنتاں گِھن آیا جیہڑیاں اِیں کتاب ءچ لِکھیاں ہِن۔ 28رب العالمین کاوڑ نال ایجھا غضب ناک تھیّا جو اُوں اُنہاں کُوں مُنڈھوں پَٹ تے بئے مُلک ءچ سَٹ ڈِتا، جِتھاں ایہ اَج تئیں آباد ہِن۔‘

29غیب دا مالک رب العالمین ساڈا خُدا ای ہے پر اُوں ساڈے اُتے آپنڑی شریعت ظاہر کر ڈِتی ہے۔ ساڈے اُتے لازم ہے جو اساں تے ساڈی اولاد اُوندے فرمانبردار راہوں۔