اِستثنا 34

مُوسیٰ دی موت

1وَل مُوسیٰ موآب دا میدانی علاقہ چھوڑ تے یرِیحُو دے سامنڑے نبُو پہاڑ اُتے پِسگہ دی چوٹی اُتے چڑھ گِیا۔ اُتھوں رب العالمین اُونکُوں پُورا مُلک ڈِکھایا یعنی جِلعاد دے علاقے تُوں گِھن تے دان دے علاقے تئیں، 2نفتالی دا پُورا علاقہ، اِفرائِیم تے منسّی دا علاقہ، یہُوداہ دا علاقہ بحیرہ روم تئیں، 3جنُوبی بیابان تے کھجوراں دے شہر یعنی یرِیحُو دی وادی تُوں گِھن تے ضُغر شہر تئیں۔ 4رب العالمین اُونکُوں آکھیا، ”ایہ او مُلک ہے جیندے ڈیوݨ دا وعدہ مَیں قَسم کھا تے ابرہام، اِضحاق تے یعقُوب نال کیتا ہا۔ مَیں اُنہاں کُوں آکھیا ہا جو مَیں اُنہاں دی اولاد کُوں ایہ مُلک ڈیساں۔ مَیں تیکُوں اِتھاں گِھن آیا ہاں جو تُوں اِینکُوں آپنڑے اکھیں نال ڈیکھ گِھنیں پر تُوں اِیندے ءچ داخل نہ تھیسیں۔“

5اِیندے بعد رب العالمین دا خادم مُوسیٰ اُتھائیں موآب ءچ فوت تھی گِیا، بالکل اُونویں ای جِینویں رب العالمین آکھیا ہا۔ 6خُدا اُونکُوں بیت فغُور دے نیڑے دی کہیں وادی ءچ دفن کیتا تے اَج تئیں کہیں کُوں نئیں پتہ جو اُوندی قبر کِتھاں ہے۔

7آپنڑی موت دے ویلے مُوسیٰ ہِک سو وِیہہ سال دا ہا پر آخری ویلے تئیں نہ اُوندے اکھیں کمزور تھیّاں تے نہ اُوندی طاقت گھٹ تھئی۔ 8بنی اِسرائیل موآب دے میدانی علاقے ءچ دستور دے مطابق ترِیح ڈینہہ تئیں اُوندے کیتے ماتم کیتا۔

9یشُوع بِن نُون حِکمت دی رُوح نال بھریا ہویا ہا کیوں جو مُوسیٰ [اِختیار ڈیوݨ کیتے] آپنڑے ہتھ اُوندے اُتے رکھے ہَن۔ اِیں واسطے بنی اِسرائیل اُوندی سُنڑدے ریہے تے اُوہو کُجھ کیتا جیہڑا رب العالمین اُنہاں کُوں مُوسیٰ دے ذریعے ڈسایا ہا۔

10بنی اِسرائیل ءچ مُوسیٰ جِیہا نبی اِیندے بعد نہ آیا جیندے نال رب العالمین رُوبرُو گالھیں کریندا ہا۔ 11کہیں بئے نبی ایجھے نشان تے معجزے نئیں ڈِکھائے جیہڑے مُوسیٰ فرعون، اُوندے افسراں تے پُورے مُلک کُوں ڈِکھائے جڈاں رب العالمین اُونکُوں مِصر بھیجیا ہا۔ 12کہیں بئے نبی اِیں طرحاں دا وڈا اِختیار نئیں ڈِکھایا تے نہ اِیہو جِیہے عظیم تے ہیبت ناک کم کیتے جِینویں مُوسیٰ بنی اِسرائیل دے سامنڑے کیتے۔