Modern Central Saraiki Bible
اِستثنا 33
مُوسیٰ قبیلیاں کُوں برکت ڈیندے
مرݨ تُوں پہلے خُدا دے بندے مُوسیٰ بنی اِسرائیل کُوں برکت ڈے تے آکھیا،
”رب العالمین سِینا تُوں آیا
شعِیر1 تُوں اُوندا نُور اُنہاں اُتے چمکیا
اُوں فاران پہاڑی2 تُوں سوجھلا کیتا
او لکھاں فرشتیاں نال آیا
اُوندے سجے ہتھ ءچ بھاہ آلی شریعت ہئی3۔
یقیناً او قوماں نال محبت کریندے
سبھ مُقدّسین اُوندے ہتھ ءچ ہِن
جیہڑے اُوندے پیراں ءچ بہہ تے
اُوندے تُوں ہدایت گِھندے ہِن۔
مُوسیٰ ساکُوں شریعت ڈِتی ہے
جیہڑی یعقُوب دی جماعت دی میراث ہے۔
بنی اِسرائیل دے سارے راہنما
آپنڑے قبیلیاں دے نال کٹھے تھئے
تاں رب العالمین اِسرائیل 4دا بادشاہ بنڑ گِیا۔
[رُوبِن دے قبیلے دے حق ءچ مُوسیٰ آکھیا]
رُوبِن مر نہ ونجے بلکہ زندہ راہوے
بھانویں او گِنتری ءچ گھٹ ہووے۔
یہُوداہ دے قبیلے دے حق ءچ اُوں آکھیا:
یہُوداہ دی اواز سُنڑ، یا رب العالمین!
اُونکُوں ولا اُوندے لوکاں ءچ شامل کر5
آپنڑے ہتھیں اُوندے کیتے لڑ
دُشمنڑ سامنڑے آوݨ تاں اُوندی مدد کر۔
لاوی دے قبیلے دے حق ءچ اُوں آکھیا:
اُورِیم تے تُمیّم 6 [تیڈی مرضی دے قُرعے]
تیڈے وفادار خادم لاوی دے کولھ ہِن
جِینکُوں تَیں مسّہ دی جاہ ازمایا
تے جیندے نال مریبہ ءچ لڑیا۔
اُوں تیڈے کلام اُتے عمل کیتا
تیڈے عہد کُوں قائم رکھیا
اِتُھوں تئیں جو آپنڑے ماء پِیُو دا
کہیں صورت ءچ لحاظ نہ کیتا
تے آپنڑے سکے بِھرانواں کُوں
بلکہ بالاں کُوں وی تسلیم نہ کیتا7۔
او بنی یعقُوب کُوں تیڈے حُکم
ہا، اِسرائیل کُوں تیڈی شریعت سکھیندے
او تیڈے حضُور خوشبودار مصالحہ پیش کریندے
قُربان گاہ اُتے ساڑے ونجنڑ آلے نذرانے۔
یا رب! اُوندی ہر شے کُوں برکت ڈے
اُوندے ہتھاں دے کم قبول کر
اُوندے مخالفاں دی چیل کُوں تروڑ
تے دُشمنڑ کُوں اِینویں مار جو ولا نہ اُٹھنڑ۔
بِنیمِین دے قبیلے دے حق ءچ اُوں آکھیا:
بِنیمِین جیہڑا رب العالمین دا پیارا ہے
سلامتی نال اُوندے کولھ راہندے
ڈینہہ رات رب العالمین اُوندی حفاظت کریندے
او اُوندے مونڈھیاں دے وچال راہندے8۔
یُوسف دے قبیلے دے حق ءچ اُوں آکھیا:
رب العالمین اُوندی زمین کُوں برکت ڈیوے
اسمان تُوں وسنڑ آلی قیمتی تریل نال
زمین ءچوں چشمے دے پانڑی نال
سِجھ دی پکی ہوئی بہترین پیداوار نال
ہر مہینے دے مزیدار پھلاں نال
پُرانڑے پہاڑاں دیاں چنگیاں شیواں نال
ابدی پہاڑیاں دے پھلاں دی کثرت نال
زمین دیاں چنگیاں چیزاں دی فراوانی نال
تے بلدی جھاڑی ءچ ظاہر تھیوݨ آلے دی خوشی نال9۔
ایہ برکتاں یُوسف دے سر تے تاج ہووݨ
جیہڑا آپنڑے بِھرانواں ءچ شہزادہ ہے
ڈاند دے پلوٹھے آلی کار یُوسف عظیم ہے
جنگلی ڈاند جِیہے اُوندے سینگ ہِن
جِنہاں نال او دُنیا دے اخیر تئیں
سبھ قوماں کُوں وار کر تے مریسی۔
اِفرائِیم دے لکھاں بندے اِینویں ہَن
منسّی دے ہزاراں بندے اِینویں ہَن۔
زبُولُون [تے اِشکار] قبیلے دے حق ءچ اُوں آکھیا :
زبُولُون! باہر نِکلدے ہوئے خوشی منا
اِشکار! ڈیرے ءچ راہندے ہوئے خوش رہ۔
او قوماں کُوں آپنڑے پہاڑ اُتے سڈیسن
مناسب قُربانیاں اُتھاں پیش کریسن
او سمندر دیاں شیواں حاصل کریسن
ریت ءچ لُکے ہوئے خزانے کڈھ گِھنسن۔
جد دے قبیلے دے حق ءچ اُوں آکھیا:
جد دے علاقے کُوں ودھاوݨ آلا مُبارک ہووے
جد ببرشیر آلی کار تاڑ ءچ راہندے
بازو تے سر پھاڑن کیتے تیار راہندے۔
اُوں سبھ تُوں چنگی زمین چُنڑ گِھدی ہے
سربراہ دا حصہ اُوندے کیتے رکھیا ہویا ہے
جڈاں قوم دے سردار کٹھے تھی گئے
تاں اُوں رب العالمین دی مرضی پُوری کیتی
اِسرائیل دے حق ءچ جیہڑے حُکم ہِن
اُوں اُنہاں ساریاں اُتے عمل کیتا۔
دان دے قبیلے دے حق ءچ اُوں آکھیا:
دان ببرشیر دے بچّے جِیہا ہے
او بسن تُوں ٹپے مار تے آندے۔
نفتالی دے قبیلے دے حق ءچ اُوں آکھیا:
رب دی رضامندی نفتالی دے نال ہے
اُوندی پُوری برکت اُونکُوں حاصل ہے
مغرب10 تے جنُوبی علاقے اُتے او قبضہ کریسی۔
آشر دے قبیلے دے حق ءچ اُوں آکھیا:
پوتراں ءچوں آشر سبھ تُوں مُبارک ہووے
او آپنڑے بِھرانواں دا پسندیدہ ہووے
او آپنڑے پیر زیتون دے تیل ءچ بوڈے۔
تیڈے پھاٹکاں دے کُنڈے
لُوہے تے پِتّل دے ہووݨ
تیڈی عُمر جِتنی لمبی ہووے
اُتنی تیڈی طاقت ہووے۔
اِسرائیل11 دے خُدا جِیہا کوئی نئیں
او اسماناں اُتے سوار تیڈی مدد کیتے آندے
آپنڑے جلال ءچ بدّل تے بہہ تے آندے۔
ابدی خُدا تیڈی پناہ دی جاہ ہے
اُوندے دائمی بازو تیڈے تلے وِچھے ہوئے ہِن۔
او دُشمنڑ کُوں تیڈے سامنڑے تُوں بھجا ڈیسی
ایہ اکھیندے ہوئے جو اُونکُوں ہلاک کر ڈیؤ۔
اِینویں بنی اِسرائیل سلامتی نال راہسی
ہا، یعقُوب دی ساری اولاد محفوظ راہسی
اناج تے رَس دی کثرت آلے مُلک ءچ
جِتھاں اسمان تُوں زمین تے تریل پوسی۔
بنی اِسرائیل! تُوں کتنا مُبارک ہیں
تیڈے جِیہا کوݨ ہے جِینکُوں رب العالمین بچائے۔
او تیڈی حفاظت دی ڈھال ہے
تے تیڈی سرفرازی دی تلوار۔
تیڈے دُشمنڑ تیڈے ڈر کنُوں جُھکسن
تُوں اُنہاں کُوں پیراں تلے رگڑیسیں۔“
Source notes (11)
- Footnote ادُوم مُلک ءچ ہِک پہاڑی علاقہ جِتھاں بنی عیسو راہندے ہَن۔
- Footnote بنی اِسرائیل مِصر تُوں نِکلنڑ دے بعد فاران بیابان تُوں تھی تے آئے ہَن۔
- Footnote اِنہاں عبرانی لفظاں دا مطلب جانڑن مُشکل ہے۔
- Footnote متن ءچ اِسرائیل دی جاہ تے یسُورُون لِکھیا ہے جِیندا مطلب بالکل سِدھا ہے یعنی صادق۔
- Footnote ایہ شاید یہُوداہ دے بارے ءچ پیشن گوئی ہے کیوں جو سُلیمان بادشاہ دے بعد اِسرائیل دے باقی قبیلے یہُوداہ تُوں اَنج تھی گئے ہَن۔
- Footnote دیکھو خرُوج 28 : 30 تے گِنتی 27 : 21۔
- Cross-reference خرُوج 32:26-29۔
- Footnote ایہ ہِک تصویر ہے جِینویں آجڑی آپنڑی بھیڈ کُوں مونڈھیاں اُتے چیندے، اِینویں ای خُدا آپنڑے پیاریاں کُوں محفوظ رکھیندے۔ پر کُجھ لوک سوچیندن جو خُدا بِنیمِین دے پہاڑاں دے وچال سکونت کریندے۔ عبرانی دے ڈوہائیں مطلب تھی سگدے ہِن۔
- Cross-reference خرُوج 3:1-5۔
- Footnote عبرانی لفظ دا مطلب جھیل وی ہے تے مغرب وی۔
- Footnote متن ءچ یسُورُون لِکھیا ہے جِیندا مطلب ہے بالکل سِدھا یعنی صادق۔
Modern Central Saraiki Bible. Copyright © Strategic Resource Group. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.