Kombukombu la Tolati

Chitabu cha

Kombukombu la Tolati

Ulongulelo

Chitabu cha Kombukombu la Tolati nde makelabhukilu gha shelia yeilongaleka kubhohakeka mkati ja itabu yengi nhwanu ya Tolati (itabu nhwanu ya kutumbula mu Lulaghilu lwa Mwande). Lihina la Kiebulania la chitabu chenjenu libhi na ndandi jenjenu, “Malobhi.” Kwa kila ntundu ihobhaleka kubha Musa nde joakachilembiki chitabu chenjenu, pangakubha pandu pachokopi pela pa kujomulela chechilandila kupotela kwaki. Chitabu chenjenu chitumbula na malobhi ghaghapwagha, “Ghangani nde malobhi ambaghu Musa akabhapwaghili Izilaeli.” Liholalelu la kupwagha kubha Musa nde joakabhili mlemba wa chitabu chenu cha Kombukombu la Tolati libhonikana mu pandu patali patali mu Lulaghilu Lwahenu. Ulenganesu ghumu upatikana mu chitabu cha Matendu 3:22-23 mu pandu ambapu Petulu anukuu kuhuma mu Kombukombu la Tolati 18:15-18 na kuloghola kubha aghagha ghakabhili malobhi ghaka Musa. Iwezikana Musa akachilembiki chitabu cha Kombukombu la Tolati, papamu na itabu ya Utumbulilu, Kubhoka, Bhalawi, na Hesabu pachilanda ja hyaka ya 1400 au 1300 K. K. (Mangani ja kubhelakeka kwaka Yesu Kristo).

Chitabu cha Kombukombu la Tolati chakalembakiki ngati majetanganelu pachilanda jaka nkolongwa na ukolongwa ghongi ghoubhili pahi ja lujiniku lwaki, ngati mokwahengakike mu machobha gha mwande. Nde majetanganelu pachilanda jaka Chapanga na bhandu bha Izilaeli. Chapanga akajetakili kubhapengalela bhandu ngati pela bhandu bhanihabha anabhajengalela na kutii shelia yaki. Ngati Bhaizilaeli bhakabhili bhakaniki kuikamula amuli yaka Chapanga, bhela bhakabya bhalapulike. Haleli nde lijambu lelilongaleka mu pandu pakolongwa pa chitabu chenjenu; nambu nakanopi mu sula ja 27 na sula ja 28 ibhili na msisitizu wa uchakaka ghongone koni ikaloghulaje mbengalelu maalumu na masolu ambaghu ghakabya ghabhokini na kukamula amuli yaka Chapanga au kukana kukamula amuli yaka Chapanga kwa bhandu bha inchi ja Izilaeli. Makabila patali patali gha Izilaeli ghakajemiki pa itombi ibheli tofauti yeyakabhi ilingalanila na yeyakabhi na majetanganelu, na kupwaghanila mbengalelu yeniheyi na masolu ghanihagha ngati indela ja kulutenda lulaghilu loniholu kubha bhalujetakile.

Ghaghabhihomu

Musa abhakombosha ghaghapitalile mu mwanja wa Izilaeli kulomboka lipololu, mu sula ja 1 mbaka ja 3.

Mashaliti gha lulaghilu pachilanda jaka Chapanga na bhandu bhaki, mu sula ja 4 mbaka 26.

Bhandu bha Izilaeli bhaipwagha mbengalelu na masolu kwa sauti ngolongwa kulangiha kubha kutumbula chikahi chenihechi lulaghilu lukabhili lujemakike, mu sula ja 27 mbaka 30.

Kujomulela, Musa alongela malobhi gha kutokulesha kwaka Yoshua, na kwa kila likabila la Izilaeli mangani ja kupotela kwaki, mu sula ja 31 mbaka 34.