Kombukombu la Tolati 7

Bhandu bhabhahaghuliki na Chapanga

Kubhoka 34:11-16

1“Bhela Bambo Chapanga, Chapanga winu, paampelakaje mu inchi jenjenda kujitola kwa makili na kubhatopola bhandu bha inchi yamaheli palongi jinu, inchi saba ikolongwa na yeibhi na makile: Bhahiti, Bhagiligashi, Bhaamoli, Bhakanaani, Bhapelizi, Bhahivi na Bhayebusi, 2kabhete chikahi Bambo Chapanga, Chapanga winu, paanjangatyaje kubhakamula na kubhaweza, panihapa impalika kubhayonanga nakanope. Ngamwihenga lulaghilu nabhu, wala ngamubhabhone chiha. 3Ngamwitoghulana nabhu, wala ngamwatoghukela akakamwali bhinu kwa bhana bhabhu bha chikambaku, au bhana bhinu bha chikambaku ngabhitoghola akakamwali bhabhu. 4Maghambu kwa kuhenga bhenibhela, anaantendaje mwana waku wa chikambaku ngayinyengalela nepani, nahuli apataje kuijojabhela ichapanga nayengi, na panihapa inyela jaka Bambo Chapanga anajibhelalaje panani jinu, najombi anaanjonangaje mwehapa manyata. 5Nambu wehapa ubhatendilaje anana: Utunyulanaje pandu pabhu pa kubhokeha nyambiku, na ubombulanaje nguzu ya maganga ghabhu ghaghabhekakiki palongi ja ichapanga yabhu, muhekatanaje nguzu yabhu ya Ashela, na kuijocha imong'umong'u yabhu kwa moto. 6Maghambu wehapa nde bhandu bha inchi jihuhu kwaka Bambo Chapanga, Chapanga winu. Bambo Chapanga, Chapanga waku, anhawili mwehapa kubha bhandu bhaki mweni, kupeta bhandu bha inchi yokapi bhabhabhili panani ja ndema.

7“Bambo Chapanga ngacheakumpaliki mwehapa na kunhaghula mwehapa kwa kubha mkabhili bhamaheli nakanope kupeta bhandu bhange, mwehapa mkabhili bhachokopi namaa kupeta bhandu bhokapi. 8Nambu nde kwa ndandi Bambo Chapanga akumpaliki mwehapa na kughoha kulapa kwaki koakabhalapile akahokolu bhitu kubha anaamboha mwehapa kwa chiwoku chaki chechibhili na makili, na kunkombola mwehapa kuhuma mu inchi jemukabhili bhatumwa, na mabhoku ghaka Falao, nkolongwa wa Misili. 9Bhela umanyaje kubha Bambo Chapanga, Chapanga waku, nde Chapanga, Chapanga ndongwana, joakamula lulaghilu lwaki lwa upalu kwa maelufu gha ibheleku ya bhala bhabhumpala na kuikamula amuli yaki. 10Nambu kwa bhala bhabhunhakalila, anaabhalepaje palongi ja mihu ghabhu kwa kubhayonanga. Ngayikabhakile kubhalepa palongi ja mihu ghabhu bhala bhabhunhakalila. 11Bhela, mkamulaje amuli yaki, shelia na malaghalakilu ghaki yenundaghalakila lalenu kuijengalela.

Mbengalelu kwa bhabhakamu shelia

Kombukombu la Tolati 28:1-14

12“Ngati ananjowanela shelia yenjenu kwa kuijengalela na kuitenda, bhela, Bambo Chapanga, Chapanga winu, anaalughohaje lulaghilu lwaki lwa upalu na mwehapa, ngati moakabhalapile akahokolu bhinu. 13Anaampala mwehapa na kumpengalela, nanamu ananjonjukikaje na kubha na bhabhelakeka bhamaheli, anaajipengalyaje mighonda jinu nahuli mpataje mahunu, divai na mahuta gha zeituni. Anaampengalyaje kwa kujonjukeka kwa mapogha gha ng'ombi hinu, na mapogha gha mambeleli ghinu mu inchi jela jeakalapike kubhapekeha akahokolu bhinu kubha anaampekya mwehapa. 14Anampengaliwaje kupeta bhandu bha inchi yengi yokapi. Njeta mwanalomi wala mbomba pachilanda jinu joanalepaje kubha na bhana, wala hinyama hinu ya kudimakika ngayikubhi ngulumba. 15Bambo Chapanga anaakulendaje na itamu yokapi. Chapanga ngayijegheli panani jaku itamu yokapi yela ya kujoghoa ngati yewimanyi ku Misili hoku, nambu anajeghalaje itamu panani ja bhokapi bhabhakuhakalila wehapa. 16Impalika kubhayonanga bhandu bhokapi ambabhu Bambo Chapanga, Chapanga winu, anaantendaje mubhawezaje. Ngamubhalingalila kwa kubhabhonela chiha, wala ngawaitumakila ichapanga yabhu, maghambu mambu ghanihagha anaghakubha chimbenda kwinu.

17“Ngati anampwaghiki mu mitima jinu, ‘Bhandu bha inchi ayeyi nde bhamaheli kupeta tepani. Bho, anatuweza bholi kubhatopola?’ 18Nambu ngamubhajoghopa, nkombukaje namaa ntundu Bambo Chapanga, Chapanga winu, moakahengile kwaka Falao na inchi jokapi ja Misili. 19Mkaghaweni kwa mihu ghinu mabheti malengakeku makolongwa, nginyulila na ngangachu ya kukangacha, na chiwoku chechibhili na makili, na chiwoku chechihatambwike, ambachu kwa chiwoku chenihechi Bambo Chapanga, Chapanga winu, akumbohiki ku Misili. Bambo Chapanga, Chapanga winu, anaabhatendilaje bhelabhela bhandu bhokapi bhamubhajoghopa sajenu. 20Nakanopi ja ghanihagha, Bambo Chapanga, Chapanga winu, anaatumaje manyiwa pachilanda jabhu, na kubhayonanga bhandu bhala ambabhu anabhatilaje nahuli kulihiya. 21Ngamwijingiwa na choghoi kwa ndandi jabhu, kwa kubha Bambo Chapanga, Chapanga winu, joabhili pachilanda jinu, nde Chapanga nkolongwa, na wa kujoghoha. 22Bambo Chapanga, Chapanga winu, anaabhatopulaje bhandu bha inchi yeniheyi pachoku pachoku. Ngamwiwezi kubhayonanga bhokapi kwa papamu, nangabhela, hinyama ya muchitengu inaijonjukikaje na kubha pambipi na mwehapa. 23Nambu Bambo Chapanga, Chapanga winu, anaantendaje mwehapa mubhawezaje bhandu bhanihabha, na kubhajeghela choghoi nakanopi mbaka bhayonangikaje nakanopi. 24Anaantendaje mubhakamulaje bhakolongwa bhabhu, nanamu anamughahungulaje mahina ghabhu ghabhokaje pani pundema. Njeta mundu joanawezaje kujema palongi jinu, mbaka pamwijomulaje kubhayonanga bhokapi. 25Mwijochaje kwa moto imong'umong'u ya kubacha ya ichapanga yabhu. Ngamwitokulela madini gha feza wala zahabu yabhu, wala ngamwitola na kuitenda kubha mali ghinu. Kuhenga bhenibhela anakukubhaje chimbenda kwinu, na nde lihakalilu kwaka Bambo Chapanga, Chapanga winu. 26Ngamwileta hindu ambayu nde lihakalilu mkati ja nyumba hinu, ngawihika wehapa kubha lihakalilu ngati chindu hechi, uchihakalyaje nakanope, na kuchikana nakanope, maghambu chenihechi nde chindu ambachu Bambo Chapanga achipekihi masolu.