Kombukombu la Tolati 6

Amuli ngolongwa

1“Yenjenu nde amuli, shelia na malaghalakilu ambaghu Bambo Chapanga, Chapanga winu, akanaghalakili numbolaje mwehapa, nahuli mpataje kuikamula mu inchi jela jendomboka kujenda kujitola, 2nahuli mwehapa, bhana bhinu na bhana bhabhu baada jabhu bhunjojabyaje Bambo Chapanga, Chapanga winu, machobha ghokapi gha matamu ghinu kwa kukamula amuli yaki, na shelia yaki yokapi yenumpekeha, nahuli mpataje kutama matamu malachu. 3Njowanyaje, mwenga Bhaizilaeli, impalika kutii, nahuli mambu ghinu ghapataje kubha wichu, na kujonjukeka nakanope, ngati Bambo Chapanga, Chapanga wa akahokolu bhinu, moandaghalile, mu inchi jejibhile na mahibha na buse.

4“Ujuwanyaje, wenga Izilaeli, Bambo Chapanga, Chapanga waku, nde jumu pela. 5Umpalaje Bambo Chapanga waku kwa mtima waku wokapi, na kwa roho jaku jokapi, na kwa makili ghaku ghokapi. 6Na amuli yenjenu yenukupekeha lalenu ubhekaje muntima waku. 7Ubhabholaje bhana bhaku kwa kukangamala, na kuilongela pautama panyumba jaku, paujenda mu indela, paughonela na paujumuka. 8Ukongaje ngati alama panani ja chiwoku chaku, na ukongaje ngati ukombukelu pa chibhongi ja pamihu jako. 9Bhelabhela ulembaje mu ngelakete ya nyumba jaku, na munani ja milyangu jinu mikolongwa.

Malakalilu kwa bhandu bhangakupala kutii

10“Bhela chikahi Bambo Chapanga, Chapanga waku, anaajomwili kukuleta mu inchi jeakabhalapili kubhapekeha akahokolu bhaku, Ibulahimu, Isaka na Yakobo, kubha anaakupekyaje wehapa, inchi jejibhili na michi minyahi mikolongwa jangakujichenga wehapa, 11nyumba yeitwelili hindu hinyahi ya kila ntundu yangakuitwelakela wehapa, na hilibha yeikembakiki yangakuikemba wehapa, na mighonda ja mizabibu na mizeituni jangakupanda wehapa, bhela pawikulaje na kutupila, 12ulilingalyaje ngawihika kundeka Bambo Chapanga joakubhohiki ku inchi ja Misili, komukabhi bhatumwa. 13Untopilaje Bambo Chapanga, Chapanga waku, na untumakyaje jombi kanjika jaki, na kulapa kwa lihina lake. 14Ngamwijengalela ichapanga yengi, ichapanga ya bhandu bhabhunyongalota mwehapa. 15Maghambu Bambo Chapanga, Chapanga waku, joabhili pachilanda jaku nde Chapanga joabhi na wihu, ngajihika kubhelela panani jako inyela jaka Bambo Chapanga, Chapanga waku, na kukuyonanga kuhuma panani ja ndema.

16“Ngamwandenga Bambo Chapanga, Chapanga winu, ngati momwahengile ku Masa hoku. 17Nkamulaje kwa ukangamalu shelia yaka Bambo Chapanga, Chapanga winu, na malaghalakilu ghaki, na amuli yaki yeandaghalakile. 18Uhengaje lijambu lelipalika, na lambone, palongi jaka Bambo Chapanga, nahuli mambu ghaku ghakubhaje wichu, na upataje kujingila na kujitamila inchi jinyahi ambaju Bambo Chapanga akabhalapili kubhapekeha akahokolu bhaku, 19kubha anaabhatopulaje kwa makili adui bhaku bhokapi palongi jaku, ngati Bambo Chapanga moakapwaghile.

20“Mu machobha ghaghahika, anaakulalukili mwana waku, na kukupwaghila, ‘Malaghalakilu aghagha ndandi jaki kike, na amuli na shelia ayeyi yealaghalakile Bambo Chapanga, Chapanga witu?’ 21Panihapa wampwaghila mwana wako, ‘Tepani tukabhili bhatumwa bhaka Falao ku Misili hoku, nambu Bambo Chapanga akatubhohiki tepani kuhuma ku Misili kwa chiwoku chaki chechibhili na makili. 22Palongi ja mihu ghitu Bambo Chapanga akahengiki nginyulila na ngangachu ikolongwa, na ya kujoghoha, kwa bhandu bha inchi ja Misili, na panani jaka Falao, papamu na bhandu bhokapi bha munyumba jaki. 23Nambu Chapanga akatubhohiki konihoku, na kutupekeha inchi jenjenu, ngati moakalapile kubha anaabhapekyaje akahokolu bhitu. 24Bhela Bambo Chapanga akatulaghalakili kutii amuli yaki ayeyi yokapi, na tuntopilaje jombi Bambo Chapanga, Chapanga witu, nahuli tupataje kuneng'anela machobha ghokapi na kujendalela kutughoha kubha tabhomi ngati motubheli lalenu. 25Ngati anatujendalili kubha na ukangamalu kuikamula amuli ayeyi yokapi palongi jaka Bambo Chapanga, Chapanga witu, ngati moakatulaghalaki tepani, panihapa anatukubhaje tujetakalewa na Chapanga.’