Kombukombu la Tolati 5

Amuli Komi

Kubhoka 20:1-17

1Musa akabhalohiki Bhaiziaeli bhokapi, na kubhapwaghila, “Mwenga Bhaiziaeli, njowanyaje amuli na shelia yenuntangazila palongi jinu lalenu. Mulibholaje yeniheyi na kuikamula ngati moipalakila. 2Bambo Chapanga, Chapanga witu, akatendiki lulaghilu na tepani pa chitombi cha Holebu, yani chitombi cha Sinai. 3Bambo Chapanga ngacheakatendiki lulaghilu loni na akahokolu bhito, nambu na tepani, yani tepani tabhokapi tetubhi tukali tabhomi pambane. 4Bambo Chapanga akalongili na mwehapa pamihu kwa pamihu, kuhuma pachilanda ja moto panani ja chitombi. 5Chikahi chenihechi nepani nakajemiki pachilanda jaka Bambo Chapanga na mwehapa nahuli kuntangazila lilobhi laka Bambo Chapanga, maghambu mkajowipi moto ghola, nanamu ngachemwakweliki kuchitombi.

“Najombi Bambo Chapanga akapwaghike, 6‘Nepani nde Bambo Chapanga, Chapanga waku, nenukubhohiki mu inchi ja Misili, koukabhi untumwa.

7“ ‘Ngawikubha na ichapanga yengi nambu nepani pela.

8“ ‘Ngawalitendela imong'umong'u ya ichapanga ya kubacha yeilengana na chindu chokapi chechibhili kunani kumahundi, wala chechibhili pahi pundema, wala chechibhili mumachi pahi ja ndema. 9Ngawaichikamila wala kuijojabhela, kwa kubha nepani Bambo Chapanga, Chapanga waku, nde Chapanga nemili na wihu, nabhatemula bhana kwa mahoku gha akatati bhabhu mbaka chibheleku cha katatu na cha kachechi cha bhala bhabhanhakalila, 10nambu nabhalangiha upalu wangu hibheleku elufu ya bhala bhabhambala na kuikamula amuli yangu.

11“ ‘Ngawaliloghola waka lihina laka Bambo Chapanga, Chapanga waku, kwa kubha Bambo Chapanga ngayikotoki kumbalangila mahoku mundu jola joaliloghola lihina laki waka.

12“ ‘Ulikamulaje lichobha la Sabato, na uligholulaje, ngati Bambo Chapanga, Chapanga waku, moakulaghalakile. 13Machobha sita uhengaje mahengu ghaku, na uhengaje mambu ghaku ghokapi, 14nambu lichobha la saba nde lichobha la Sabato kwaka Bambo Chapanga, Chapanga waku. Lichobha leniheli ngawihenga lihengu lokapi lela, wehapa wala mwana waku wa chikambaku au kamwali waku, wala mtumwa waku, wala mtumika waku wa chikambaku au wa chimbomba, wala chinyama chaku, wala ngeni joabhi mkati ja nyumba jaku, nahuli bhatumika bhaku bha chikambaku na bha chimbomba bhapataje kupomulela bhelabhela ngati wehapa. 15Nkombukaje kubha mkabhili bhatumwa ku Misili hoku, na Bambo Chapanga, Chapanga winu, akumbohiki konihoku kwa chiwoku chechibhili na makili na kwa chiwoku chechihatambwike. Bhela Bambo Chapanga, Chapanga winu, andaghalakili mlikamulaje lichobha la Sabato.

16“ ‘Watopilaje tati waku na mabhu waku, ngati Bambo Chapanga, Chapanga waku, moakulaghalakile, nahuli machobha ghaku ghapata kubha ghamaheli, na kujonjukeka mu inchi jeupekewa na Bambo Chapanga, Chapanga waku.

17“ ‘Ngawikoma.

18“ ‘Ngawitenda ugone.

19“ ‘Ngawijibha.

20“ ‘Ngawandandila njaku upuhi.

21“ ‘Ngawantokulela nhwanu waka njaku. Ngawajitokulela nyumba jaka njaku, wala ngonda waki, wala mtumika waki wa chikambaku, wala mtumika waki wa chimbomba, wala ng'ombi yaki, wala maponda ghaki, wala chindu chokapi cheabhi nachu njaku.’

22“Ayeyi nde amuli ambayu Bambo Chapanga akalipwaghili lipogha linu lokapi kwa sauti ngolongwa kuhuma pa moto, na lihundi na lubhendu lukolongwa, wala ngacheakajonjukili chokapi chela nakanope. Bhela akailembiki panani ja hibau ibheli ya maganga, na kumbekeha nepani.

Bhandu bhajoghopa

Kubhoka 20:18-21

23“Bhela, pamwajowini sauti kuhuma mu lubhendu, chikahi chitombi pachakabhi chibhelela moto, panihapa ihongozi bha makabila ghinu ghokapi na bhazee bhinu bhakanhikili nepani, 24na kumbwaghila, ‘Lingalyaje! Bambo Chapanga, Chapanga witu, atulangihi ulumbalilu waki, na ukolongwa waki, na tepani tujowini sauti jaki kuhuma pachilanda ja moto. Lalenu tuweni kubha mundu aweza kubha mwome hata, ngati Chapanga anaalongi naku. 25Nambu henu, maghambu kike tupotilaje? Maghambu moto aghoghu ukolongwa anautuyonangaje, na ngati anatujendalili kujijowana sauti jaka Bambo Chapanga, Chapanga witu nakanope, anatupotilaje! 26Bho, mundu bholi joabhi na hyegha joalabhalili kujijowana sauti jaka Chapanga joabhi mwomi akalongilaje kuhuma mu moto, ngati tepani motujowanile, na kuhighalila kubha mwome? 27Ujendaje pambipi wehapa wa Musa, ukajowanyaje ghokapi ghaipwaghaje Bambo Chapanga, Chapanga witu, na bhela uhikaje utupwaghilaje ghokapi ghaakupwaghilaje Bambo Chapanga, Chapanga witu, na tepani anatughajowanyaje na kughatii.’

28“Bambo Chapanga akunjowini chikahi pamukabhi ndongela na nepani, na Bambo Chapanga akambwaghile, ‘Nyowini malobhi gha bhandu abhabha, na kila chindu chebhalongile nde chinyahi. 29Ngati bhakabhili na mtima ngati aghoghu mkati jabhu, wa kunyoghopa na kuikamula amuli yangu machobha ghokapi, mambu ghabhu ghakabya ghabhajendili wichu machobha ghokapi bhombi na bhana bhabhu mileli. 30Ujendaje ukabhapwaghilaje bhakelabhukaje mu mahema ghabhu. 31Nambu wehapa uhighalyaje pambani pambipi na nepani, nahuli nhwezaje kukupekeha malaghalakilu, amuli na shelia, ambayu anaubhabholaje, nahuli bhawezaje kuikamula mu inchi jenabhapekyaje kubha jabhu.’

32“Bhela mlilingalyaje, na mtendaje ngati mondaghalakiwi na Bambo Chapanga, Chapanga winu, ngamwikotoka kukamula amuli yangu yokapi ngati moipalakila. 33Njengalyaje mambu ghokapi Bambo Chapanga, Chapanga winu ghaandaghalakile, nahuli mambu ghinu ghunjendila wichu, na mpataje kutama matamu malachu mu inchi jeananumpekyaje kubha jinu.