Kombukombu la Tolati 4

Musa abhalaghalaki bhandu kuntii Chapanga

1Bhela Musa akajendali kupwagha, “Bhandu bha Izilaeli, sajenu njowanyaje amuli na shelia yeananumbolaje, nahuli mpata kuikamula, na mpata kujingila na kutama mu inchi jeampekeha Bambo Chapanga, Chapanga wa akahokolu bhino. 2Ngamwijonjukela wala kupunguza chokapi chela chenundaghalaki mwehapa, mpata kuikamula amuli yaka Bambo Chapanga, Chapanga winu, yenundaghalakila. 3Mwehapa mkaweni mabheti kwa mihu ghinu ghala ghaakahengiki Bambo Chapanga kwaka kichapanga Baali Peoli. Maghambu Bambo Chapanga, Chapanga winu, akabhayoningi kuhuma pachilanda jinu kila mundu joakunjengalile kichapanga Baali Peoli. 4Nambu mwehapa mwemkabhi bhalongwana kwaka Bambo Chapanga, Chapanga winu, mkali mabhomi kila jumu winu mbaka lalenu.

5“Ndingalyaje, numboliki amuli na shelia ngati Bambo Chapanga, Chapanga wangu, moakanaghalakile nepane, nahuli muijengalyaje mu inchi jenjingila kutama. 6Muikamulaje wichu, na kuijengalela, maghambu kwa kuhenga bhenibhela bhandu bha inchi nayengi pabhihika kuimanya shelia yeniheyi yokapi, anabhapwaghaje, ‘Chakaka inchi ajeji jikolongwa nde ja bhandu bhabhabhi na mbulau na malango!’

7“Kwa ndandi kubhi na bhandu bha inchi bholi jikolongwa, jejibhi na Chapanga joabhi pambipe nabhu, ngati Bambo Chapanga, Chapanga witu, moabhelile na tepani chikahi chokapi patundobha? 8Kabhete kubhi na bhandu bha inchi bholi jengi jejibhi jikolongwa anana, jejibhi na amuli na shelia inyahi na yeipalika ngati ayeyi, yenibheka palongi jinu laleno? 9Nambu mlilingalyaje mabhete, na kulilenda nakanopi nahuli ngamwihika kughajewa mambu ghamughaweni kwa mihu ghino, wala kughaleka ghabhokaje mumitima jinu mu machobha ghokapi gha matamu ghino. Nambu mwabholaje mambu ghanihagha bhana bhinu na bhachokolu bhino. 10Nkombukaje lichobha lemwajemiki palongi jaka Bambo Chapanga, Chapanga winu, ku chitombi cha Holebu kola, chikahi Bambo Chapanga paakambwaghile, ‘Wabhongana bhandu bhanihabha palongi jangu bhajowanyaje malobhi ghangu, nahuli bhalibhola kundopela nepane kwa chikahi chokapi chebhitamaje pundema, nabhombi bhakabhabholaje bhana bhabhu kuhenga bhenibhela.’

11“Mkaheghalili na kujema pahi ja chitombi chela, chitombi chakabhelili moto mbaka kunani kumahunde, papamu na mahundi mapili na lubhendu lukolongwa. 12Bhela Bambo Chapanga akalongili na mwehapa mu moto. Mkajowini sauti ja malobhi ghaki, nambu ngachemumbweni moabhelile, mkajowini sauti pela. 13Akuntangazili lulaghilu lwaki, ambalu nde Amuli Komi, yeakundaghalakile muikamulaje, na kuilemba panani ja mbau ibheli ya maganga. 14Chikahi chenihechi Bambo Chapanga akanaghalakili numbolaje mwehapa shelia na amuli yeimpalika kuijengalela mu inchi jendomboka kujenda kujitola kubha jinu.

Lilakalilu la kujojabhela imong'umong'u

15“Mlilingalyaje mabhete, maghambu ngachemumbweni Chapanga moabhelile mu lichobha lela Bambo Chapanga paakalongili na mwehapa ku chitombi cha Holebu hoku kuhuma mu moto. 16Nahuli ngamwihenga mahoku kwa kulilenganakela mabhete imong'umong'u ya kubacha, ulenganesu wa sula jokapi jela, ulenganesu waka mwanalomi au mbomba, 17au kwa ulenganesu wa chinyama chokapi chela chechibhi pundema, au ulenganesu wa chijuni chokapi chela chechigholoka munani, 18au ngati chiumbi chokapi chela chechikwabha panani ja luhombi, au ulenganesu wa homba jokapi jela jejibhili mkati ja machi. 19Na paulingalila kunani na kulibhona lyobha, mwehi na ndondwa na hindu yokapi ya kunani kumahunde, ngawaijojabhela, wala kuitumakila, maghambu hindu yeniheyi Bambo Chapanga, Chapanga winu, abhaghabhili bhandu bhokapi bha pundema. 20Nambu kwinu mwehapa, Bambo Chapanga ambohiki kuhuma mu mang'ahiku makolongwa, ku Misili hoku, nahuli mpata kubha bhandu bha upwelelu waki, ngati mombelili lalenu. 21Bambo Chapanga akaniyomili kwa ndandi jinu mwehapa, na akalapiki kubha nepani nganilomboki nkoka Yoludani, na kujingila mu inchi jela jinyahi, jempekewa na Bambo Chapanga, Chapanga winu, kubha upwelelu winu. 22Nepani anambotilaje mu inchi jenjenu, nganilomboki nkoka Yoludani, nambu mwehapa mbili pambipi kulomboka, na kujitola inchi jela jinyahi. 23Mlilingalyaje ngamwijewa lulaghilu lwaka Bambo Chapanga, Chapanga winu, lola loatendiki na mwehapa. Ngamwalilenganakela chimong'umong'u cha kubacha chechilengana na chindu chokapi chela chemkanakiwi na Bambo Chapanga, Chapanga winu. 24Kwa kubha Bambo Chapanga, Chapanga winu, nde moto ghoukula, jombi nde Chapanga joabhi na wihu.

25“Pamwikubha mtami mu inchi jeniheji kwa chikahi chilachu, na kupata bhana na bhachokolu na kubha bhazee, ngati anamtumbwili kuhobha na kulilenganakela chimong'umong'u cha kichapanga cha ntundu wokapi ghola, na kuhenga mahakau palongi jaka Bambo Chapanga, Chapanga winu, na kuntenda akubha na inyela, 26bhela, nepani lalenu niiloha mbengu na ndema ikubha ngati bhalandilu pachilanda jino, kubha anamuyonangikaje mala punkamu mu inchi jendomboka nkoka Yoludani kujenda kujitola. Ngamwitami konihoku kwa chikahi chilachu, nambu kwa chakaka anamuyonangikaje. 27Bambo Chapanga anaantendaje mpechanganaje pachilanda ja inchi nayenge, na bhachokopi bhinu pela nde bhabhihighalyaje pachilanda ja inchi yeniheyi ambayu Bambo Chapanga anaantopulyaje. 28Konihoku anamuitumakyaje ichapanga yeilenganakiki kwa mikongu na maganga, yeilenganakiki na bhandu, yangakuweza kulola, wala kujowana, ngacheikula, wala ngacheinuha. 29Nambu konihoku, ngati anamundondiki Bambo Chapanga, Chapanga winu, anamumpataje, ngati anamundondiki kwa mtima winu wokapi, na kwa roho jinu jokapi. 30Chikahi pamwikubhaje mu mang'ahiku, na mambu ghanihagha ghokapi anaghumpatike, pakujomukela machobha ghanihagha, mwankelabhukya Bambo Chapanga, Chapanga winu, na kuntii. 31Maghambu Bambo Chapanga, Chapanga winu, nde Chapanga joabhi na chiha, ngaandeki wala kunjonanga, wala ngaalujewi lulaghilu loakatendiki na akahokolu bhinu, loakalutendiki kwa kubhalapila.

32“Sajenu ulalukyaje kubhokana na machobha gha mwande, ghaghakabhili mangane jaku wehapa, kutumbula lichobha lela Chapanga paakumbombiki mundu panani ja ndema, ulalukyaje kutumbula kunani kumahunde mbaka pundema pokapi. Bho, kulabhalili lelu kupitalila lijambu lengi lelibhi likolongwa ngati lendeno, au kubhi na lijambu lengi lelilabhali kujowaneka ngati alale? 33Bho, kubhi le na bhandu mu chikahi chokapi chela bhabhajowini sauti jaka Chapanga jakalongilaje kuhuma pachilanda ja moto, ngati mwehapa momwajowanile, na bhombi bhakajendali kubha bhome? 34Bho, kubhi le na Chapanga jongi jokapi jola joalabhalile mweni kujenda kubhatola bhandu bha inchi jaki kuhuma mu inchi jenge, kwa malengakeku, na kwa nginyulila na ngangachu, na kwa ngondo, na kwa chiwoku chechibhili na makili na chechihatambwike au kwa matendu makolongwa gha kujoghoha, ngati ghala ambaghu Bambo Chapanga, Chapanga winu, ghaakahengiki kwa ndandi jinu ku Misili hoku palongi ja mihu ghino? 35Mwehapa mkaghaweni mambu ghanihagha nahuli mpata kumanya kubha Bambo Chapanga nde Chapanga, njeta jongi nambu jombe. 36Kuhuma kunani kumahunde Chapanga akabhatendiki bhajowanaje sauti jake, nahuli kubhabhola kuntii jombi. Na pani pundema akabhalangihi moto waki ukolongwa, nanamu mkaghajowini malobhi ghaki kuhuma mu moto ghola. 37Maghambu akabhapaliki akahokolu bhinu na akabhahawili bhabhelakeka bhabhu baada jabhu, akabhabhohiki kuhuma mu inchi ja Misili kwa kubha akabhili papamu nabhu, kwa uwezu waki ukolongwa. 38Akabhatopwili palongi jinu bhandu bha inchi ikolongwa, na bhabhabhi na makili kupeta mwehapa, na kundeta mwehapa mu inchi jabhu na kumpekeha mwehapa kubha upwelelu winu, ngati mokubheli mbaka lalenu. 39Njetakyaje na mbekaje mu mitima jinu lalenu kubha Bambo Chapanga nde Chapanga kunani kumahundi, na pani pundema pahi, njeta jonge. 40Bhela, mkamulaje amuli na malaghalakilu ghaki ghanumpeke mwehapa lalenu, nahuli mpataje kuneng'anela mwehapa na bhana bhinu baada jinu mwehapa, na mpataje kutama matamu malachu mu inchi jempekewa na Bambo Chapanga, Chapanga winu, machobha ghokapi.”

Michi ja kutilila upambala wa kolipita lyobha wa nkoka Yoludani

41Bhela Musa akajighabhiki michi jitatu kwihi ja nkoka Yoludani, upambala wa kolipita lyobha, 42nahuli mundu jokapi joankomiki njaki panga kumanya, wala ngacheakunhakalile mangani ja panihapa, nahuli apata kutama mu muchi ghumu pachilanda ja michi jeniheje. 43Michi jeniheji nde Beseli mu uwanda wa lipololu kwa ndandi ja bhandu bha likabila laka Leubeni, muchi wa Lamoti mu inchi ja Gileadi kwa ndandi ja bhandu bha likabila laka Gadi, na muchi wa Golani mu inchi ja Bashani kwa ndandi ja bhandu bha likabila laka Manase.

Musa abhapwaghi Bhaizilaeli shelia kwa mala ja kabheli

44Jenjenu nde Shelia jaka Chapanga jeakabhekiki Musa palongi ja Bhaizilaeli. 45Ghangani nde malaghalakilu, amuli na shelia ambayu Musa akabhapwaghili Bhaizilaeli pabhakabhili ku inchi ja Misili, 46bhakabhili kwihi ja nkoka Yoludani, ku libondi lelijaghanile ku Beti Peoli, ku inchi jaka Sihoni, nkolongwa wa Bhaamoli, joakabhi atawala ku Heshiboni, ambaju akalapuliki na Musa na Bhaizilaeli pabhakahikiki kuhuma ku inchi ja Misili. 47Bhakajitoliki inchi jaki, na inchi jaka Ogu nkolongwa wa Bashani, bhanihabha nde bhakolongwa bhabheli bha Bhaamoli, bhabhakabhili kwihi ja nkoka Yoludani upambala wa kolipita lyobha. 48Inchi jenjenu jakajaghanili kutumbula ku Aloeli ukengu wa libondi la Alinoni mbaka ku chitombi cha Sioni, yani chitombi cha Helimoni, 49papamu na uwanda wokapi wa kolipita lyobha wa nkoka Yoludani, na kujaghanila mbaka ku Bahali ja Araba, ku mihelelu ja Pisiga.