Kombukombu la Tolati 3

Bhaizilaeli bhundapula nkolongwa Ogu

Hesabu 21:31-35

1“Bhela, tukang'anambwiki, na kukwela kujengalela indela ja Bashani, na Ogu nkolongwa wa Bashani akatupitalili jombi na bhandu bhaki bhokapi, kuhika kukomana na tepani pambipi na muchi wa ku Edilei. 2Bambo Chapanga akambwaghile, ‘Ngawanjoghopa maghambu jomwi kuntenda lepalyaje palongi jaku, jombi na bhandu bhaki bhokapi na inchi jaki jokapi. Nanau untendila ngati mountendile Sihoni, nkolongwa wa Bhaamoli, joakabhi atama ku Heshiboni.’ ”

3Bhela, Bambo Chapanga, Chapanga witu, akuntendiki Ogu nkolongwa wa Bashani na bhandu bhaki bhokapi bhalepalyaje palongi jitu. Tukabhayoningi bhokapi, panga kunhighakila mundu hata jumu.

4Chikahi chenihechi tukajitoliki kwa makili michi jaki jokapi. Njeta muchi hata ghumu pachilanda ja michi jaki sitini wangakuutola kwa makili. Michi jeniheji jokapi jakabhi mu Aligobu, pandu papatawaliwi na nkolongwa Ogu ghoubhi mu Bashani. 5Michi jeniheji jokapi jakabhi na lumatu ilachu, na milyangu mikolongwa na makabali makolongwa, bhelabhela kukabhili na ijiji yamaheli namaa yangakuchengakeka lumatu. 6Tukabhayoningi bhokapi, ngati motukunhengile Sihoni, nkolongwa wa Heshiboni. Tukauyoningi kila muchi ghoukabhi na akanalomi, akambomba na bhana. 7Nambu tukaitoliki hinyama ya kudimakika na mali kuhuma mu michi jenijela, kubha yitu tabhete.

8“Bhela kwa chikahi chenihechi tukajitoliki inchi heji kuhuma kwa bhakolongwa bhabheli bha Bhaamoli bhabhakabhi bhatama kwihi ja nkoka Yoludani, kutumbula ku libondi la Alinoni mbaka ku chitombi cha Helimoni. 9Bhasidoni bhachiloha chitombi hechi cha Helimoni, Silioni, nabhombi Bhaamoli bhachiloha Senili. 10Tukajitoliki kwa makili michi jokapi ja ku uwanda wa kundonda, na bhelabhela pandu pokapi pa Gileadi, na Bashani jokapi, mbaka kuhika ku Seleka na Edeli, michi ja utawala waka nkolongwa Ogu ku Bashani hoku.”

11Nkolongwa Ogu wa Bashani nde joakahighalile kanjika jaki pachilanda ja mahighalilu gha Bhalefai. Chitanda chaki chakabhi cha choma chechabhili na ulachu wa futi komi na ibheli na upana wa futi sita, kwa ipemu ya kawaida. Chitanda hechi chikali chibhile mbaka sajeno ku muchi wa Bhaamoli ghoubhi ku Raba.

Makabila ghaghatami ku upambala wa kolipita lybha wa Yoludani

Hesabu 32:1-42

12“Patukajitoliki inchi jeniheji kubha jitu, nakabhapekihi likabila laka Leubeni na Gadi pandu pokapi papabhili upambala wa kungonde ja muchi wa Aloeli pambipi na libondi la Alinoni, na nusu ja pandu pa itombi ya Gileadi, papamu na michi jake. 13Bhela nusu ja likabila laka Manase nakabhapekihi pandu pa Gileadi papahighalile papamu na Bashani jokapi, jejakabhili jitawaliwa na nkolongwa Ogu.”

Pandu pokapi pa Aligobu mu Bashani pakamanyakini ngati inchi ja Bhalefai. 14Yaili, mbelakeka waka Manase, akatoliki pandu pokapi pa inchi ja Aligobu, mbaka malindakanilu gha Bhageshuli na Bhamaaka, akailohiki inchi yeniheyi Hawoti Yaili, yani lihina laki mwene, bhela mbaka lalenu Bashani jilowakeka Hawoti Yaili, yani ijiji yaka Yaili.

15Bhandu bha lukolu lwaka Makili bha likabila laka Manase, nakabhapekihi inchi ja Gileadi. 16Nambu bhandu bha makabila ghaka Leubeni na Gadi nakabhapekihi kutumbula ku Gileadi mbaka ku libondi la nkoka Alinoni, pachilanda ja libondi heli pakabhi nde malindakanilu, mbaka ku nkoka Yaboki, ambau nde malindakanilu gha inchi ja Bhaamoni. 17Kwa upambala wa kolijibhi lyobha malindakanilu ghabhu ghakabhi nkoka Yoludani, kutumbula nhwanga Galilaya mbaka Bahali ja Alaba, yani Bahali ja Mwinyo, ku mihelelu ja Pisiga upambala wa kolipita lyobha.

18“Chikahi chenihechi nakundaghalakile, ‘Bambo Chapanga, Chapanga winu, ampekihi mwehapa inchi jenjenu ja upambala wa kolipita lyobha jikubha jino. Nambu ipalika akanalomi bhokapi bhabhabhi na makili, bhakabya bhabhi na silaha yabhu kwa ngondo, bhalombukaje kwihi ja kabhele palongi ja bhalongu bhinu Bhaizilaeli. 19Nambu bhahanu bhinu na bhana bhinu, na hinyama hinu ya kudimakika, manyi mbili na hinyama yamaheli ya kudimakika, bhahighalyaje mu michi jinu jenumpekihe. 20Mbaka chikahi Bambo Chapanga paabhajangatyaje bhalongu bhinu kupomulela ngati mwehapa, nabhombi bhelabhela bhapwelilaje inchi jela jebhapekewa na Bambo Chapanga, kwihi ja nkoka Yoludani. Paghipeta ghanihagha, mwikelabhukaje mu inchi jenjenu jenumpekihe kubha jinu.’ ”

21“Chikahi chenihechi nakundaghalaki Yoshua, ‘Wehapa ulibhonili kwa mihu ghaku wamwete mambu ghokapi ambaghu Bambo Chapanga, Chapanga winu, akabhahengili bhakolongwa bhabheli, Sihoni na Ogu. Bambo Chapanga anaabhahengila bhelabhela bhakolongwa bha inchi yokapi konjenda hoku. 22Ngamubhajoghopa, kwa kubha Bambo Chapanga, Chapanga winu, anaakomanaje kwa ndandi jino.’ ”

Musa alolakela inchi ja Kanaani kuhuila ku Pisiga

23“Chikahi chenihechi nakalihelihi palongi jaka Bambo Chapanga, na kumpwaghila, 24‘Wenga wa Bambo Chapanga, Chapanga Weubhi na Makile, utumbwili kundangiha mtumika waku ukolongwa waku, na uwezu waku. Ndandi kubhi na kichapanga bhole kunani kumahundi na pundema joaweza kuhenga lihengu na matendu makolongwa ngati ghauhenga wehapa? 25Nanatu nukulobha uneka nombukaje nakajibhona inchi jinyahi jejibhi upambala wa kolijibhi lyobha kwihi ja nkoka Yoludani, na inchi jela jinyahi ja itombi ya Lebanoni.’

26“Nambu kwa ndandi jinu Bambo Chapanga akaniyomile, na kukana kunyowanela. Bambo Chapanga akambwaghile, ‘Ijaghanila! Ngawijendalela kulongela lijambu aleli na nepani nakanope. 27Ukwelaje mbaka kunani ja chitombi cha Pisiga, na ukalingaje ku upambala wa kolijibhi lyobha, kungonde, kunkache na kolipita lyobha. Ukajilingaje inchi jeniheji kwa mihu ghako, maghambu ngaulomboki nkoka aghoghu wa Yoludani ng'o. 28Nambu undaghalakya Yoshua, akangamalaje na akubha na makili, kwa kubha jonihoju nde joanalombukaje palongi ja bhandu abhabha, na inchi jeanaujibhonaje anaabhapekya jombi kujipwelela.’

29“Bhela tukatami ku libondi la nkoka Yoludani pambipi na muchi wa Beti Peoli.”