Kombukombu la Tolati 2

1“Bhela, tukang'anambwiki na kutumbula mwanja wa kujenda kulipololu kwa kupetela indela ja bahali ja Shamu, ngati moakalaghalakile Bambo Chapanga. Kwa machobha ghamaheli tukabhi tujenda kuiyongolota itombi ya inchi ja Seili.

2“Bambo Chapanga akambwaghile: 3Njendiki kuchiyongolota chitombi achechi kwa machobha ghamaheli, sajenu mng'anambukaje upambala wa kungonde. 4Ubhapekya bhandu malaghalakilu aghagha: ‘Mbi pambipi kupeta pachilanda ja inchi ja bhalongu bhino, bhabhelakeka bhaka Esau, bhabhatama mu inchi ja Seili. Anabhunjoghupa mwehapa, nambu mlilingalyaje. 5Ngamubhatumbula kwa ngondo maghambu nganumpekehi mwehapa pandu pokapi pala pa inchi jabhu ng'o, hata pandu pa kujaghanila kukanyata lwaju lwa chigholu. Kwa kubha numpekihi Esau na bhabhelakeka bhaki inchi ja itombi ja Seili kubha jabhu. 6Anampala kuhemela chilebhi au machi impalika muhemalaje kwa madini gha feza.’

7“Bambo Chapanga, Chapanga winu ampengalili mwehapa kwa mahengu ghokapi ghamuhenga kwa mabhoku ghino. Amanyi ntundu monjendile mu lipololi aleli likolongwa. Na kwa hyaka alobaini ayeyi Bambo Chapanga, Chapanga winu, akabhi papamu na mwehapa, na ngachemwakepakiwi na chindu chokapi chela.

8“Bhela tukapetiki kwa bhalongu bhitu bhabhelakeka bhaka Esau bhabhatama ku inchi ja Seili. Tukang'anambwiki kuhuma ku indela ja Alaba, jejihumila ku Elati na Esioni Gebeli, na kujendalela na mwanja kujengalela indela ja lipololu laku Moabu. 9Bhela Bambo Chapanga akambwaghile, ‘Ngaubhang'aha bhandu bha Moabu, wala ngawikomana nabhu ngondo, maghambu nganakupekehi pandu pokapi pala pa inchi jabhu kutawala, maghambu inchi ja Ari nabhapekihi bhabhelakeka bhaka Lutu kubha labhu.’ ”

10Pamwandi hapa mu inchi heji ja Ali bhakabhili bhatama bhandu bhamaheli bhahakabhi na makili bhabhalohakikaje Bhaemi na bhakabhili bhalachu ngati Bhaanaki. 11Ngati mobhakabhelile Bhaanaki, bhanihabha nabhombi bhakabhi ngati Bhalefai, nambu Bhamoabu bhakabhalohiki Bhaemi. 12Pamwandi hapa Bhaholi bhakabhi bhatama mu inchi ja Seili, nambu bhabhelakeka bhaka Esau bhakabhatopwili na kubhayonanga, na kutama mu inchi heji pandu pabhu, Bhaizilaeli nabhombi bhakatendiki bhelabhela mu inchi jebhakapekiwi na Bambo Chapanga kubha jabhu bheni.

13Bambo Chapanga akatupwaghile, “Sajenu mbokanyaje, mkalombuka chikoka cha Zeledi.” Natatu tukachilombwiki chikoka cha Zeledi. 14Hyaka selasini na nane yakabhi ipetike kutumbu chikahi patwabhokiki kuhuma ku Kadeshi Balinea mbaka patwalombwiki chikoka cha Zeledi. Kwa chikahi chenihechi chibheleku chokapi cha akanalomi kutumbula bhabhaweza kujenda kungondo chakabhi chipotile, ngati Bambo Chapanga moakabhili abhapwaghile. 15Kwa kubha chiwoku chaka Bambo Chapanga chakabhi panani jabhu nahuli kubhayonanga ku likambi hoku, mbaka bhokapi pabhakajomwike.

16“Bhela, akanalomi bhokapi bhabhakabhi na makili gha kujenda kungondo pabhakajomwi kukomakeka bhokapi, 17Bambo Chapanga akambwaghile, 18‘Lalenu ndombukaje inchi ja Ari, kupetela malindakanilu gha Moabu. 19Chikahi pamwihika kwa Bhaamoli, ngamubhang'aha, wala kubhatumbula kwa ngondo, maghambu nganampekehi pandu pokapi pa inchi jeniheji ja Bhaamoli kubha pino. Kwa kubha nabhapekihi lubheleku lwaka Lutu kubha jabho.’ ”

20Inchi jeniheji najombi jakamanyakini kubha nde inchi ja Bhalefai, bhabhakabhi bhatama konihoko, nambu Bhaamoli bhakabhalohiki bhandu bhanihabha Bhazamzumi. 21Bhalefai habha bhakabhi bhandu bhamaheli, bhakolongwa, na bhalachu ngati Bhaanaki. Nambu Bambo Chapanga akabhayoningi kubhoka palongi ja Bhaamoli, ambabhu bhakabhatopwili na kutama pandu pabho. 22Ngati Bambo Chapanga moakahengile kwa bhabhelakeka bhaka Esau, bhabhakabhi bhatama ku Seili, chikahi paakabhayoningi Bhaholi bhabhokaje palongi jabho. Bhakabhatopwili palongi jabhu, nabhombi bhakatami pandu pabhu mbaka laleno. 23Nabhombi Bhaavi bhakabhi bhatama ku ijiji ya mumaheku ja bahali ja Meditelania mbaka ku muchi wa Gaza, nambu Bhakafitoli pabhakahikiki kuhuma ku chilu cha Kafitoli, yani Kilete, bhakabhayoningi na kutama pandu pabho.

24“Patukajomwi kulomboka ku Moabu, Bambo Chapanga akatupwaghile, ‘Sajenu mbokanyaje, ntumbula mwanja winu na kulomboka libondi la Alinoni, lingalyaje, nutendiki Sihoni wa likabila la Bhaamoli nkolongwa wa Heshiboni, na inchi jaki bhalepalyaje palongi jaku. Nkomana naku ngondo na kutumbu kujitawala inchi jake. 25Lichobha la lalenu anandumbula kubhajeghela choghohi bhandu bhokapi bha pundema bhunjoghupa mwehapa. Pabhijowanaje malobhi ghinu, anabhabhaghajaje na kujingiwa na choghoi kwa ndandi jino.’

Bhaizilaeli bhundapula nkolongwa Sihoni

Hesabu 21:21-30

26“Kuhuma ku lipololu la Kedemoti nakabhatumiki bhatenga bhabhakabhili na malobhi gha lukwale kwaka Sihoni nkolongwa wa ku Kedemoti, kupwagha, 27‘Utujetakalyaje tupetaje pa inchi jako. Anatupetaje mu indela ngolongwa, ngatwing'anambuki ku chiwoku cha kumalelelu wala chiwoku cha kumangeja. 28Utuhemalyaje chilebhi kwa madini gha feza nahuli tukulaje, na utuhemalyaje machi kwa madini gha feza nahuli tukunywaje. Utujetakalyaje pela tupetaje pa inchi jaku kwa mogholu, 29ngati mobhakatuhengile bhabhelakeka bhaka Esau bhabhatama ku Seili, na Bhamoabu bhabhatama ku Ari, mbaka tulombukaje nkoka Yoludani na kujingila mu inchi jetupekewa na Bambo Chapanga, Chapanga wito.’

30“Nambu Sihoni, nkolongwa wa Heshiboni akakaniki ngatwipeta pa inchi jake. Kwa kubha Bambo Chapanga, Chapanga waku akuntendiki kubha na roho ja kunonopa, na kunjeghela ing'omu mu mtima wake, nahuli anjeghalaje mu mabhoku ghinu ngati moahengi laleno.

31“Bhela, Bambo Chapanga akambwaghile, ‘Lingalyaje, ndumbwili kumboha nkolongwa Sihoni palongi jako. Sajenu ntumbulaje kukomana nabhu, na kujitola inchi jeniheji kubha jino.’ 32Panihapa nkolongwa Sihoni akatupitalili na bhandu bhaki bhokapi, nahuli kukomana na tepani ku muchi wa Yahasa hoku. 33Bambo Chapanga, Chapanga witu, akumbohiki palongi jitu, tukundapwili jombi na bhana bhaki, papamu na bhandu bhaki bhokapi. 34Chikahi chenihechi tukajitoliki kwa makili michi jaki jokapi, tukauyoningi kila muchi ghoukabhi na akanalomi, akambomba na bhana, panga kundeka mundu jokapi jola kubha mwome. 35Nambu tukaitoliki kwa makili hinyama ya kudimakika na mali kuhuma mu michi jenijela, kubha yitu tabhete. 36Kuhuma ku muchi wa Aloeli, muchi ghoubhile mu ukengu wa libondi la Alinoni, na muchi ghoubhile mkati ja libondi la Alinoni, mbaka kuhika ku Gileadi, ngachepabhili na muchi hata ghumu wa kuweza kutulapula. Bambo Chapanga, Chapanga witu, akatupekihi tepani michi jokapi. 37Nambu kubhokana na amuli jaka Bambo Chapanga, Chapanga witu, akatukanakili kujingila mu inchi jokapi jela ja Bhaamoli, wala pandu pokapi pala papabhili pambipi na nkoka Yaboki, wala michi jejibhili ku itombi.