Kombukombu la Tolati 1

Ulongulelo

1Chitabu chenjenu chibhi na malobhi ambaghu Musa akabhapwaghili bhandu bhokapi bha Izilaeli chikahi pabhakabhi kulipololu upambala wa kolipita lyobha wa nkoka Yoludani. Bhakabhi ku libondi la Yoludani pambipi na Sufu, pachilanda ja muchi wa Palani upambala ghumu na muchi wa Tofeli, Labani, Hezeloti na Dizahabu, upambala ghonge. 2Nde lujendu lwa machobha komi na jimu kuhuma ku chitombi cha Holebu mbaka ku Kadeshi Balinea kwa indela ja chitombi cha Seili. 3Lichobha la kutumbula la mwehi wa komi na jimu, chaka cha alobaini, pabhakajomwi kubhoka ku Misili, Musa akabhapwaghi Bhaizilaeli mambu ghokapi Bambo Chapanga ghaakundaghalaki abhapwaghilaje. 4Akahengiki bhenibhela chikahi paakajomwi kumbweza Sihoni nkolongwa wa Bhaamoli, joakabhi atawala ku muchi wa Heshiboni, na bhelabhela akamuweziki nkolongwa Ogu joakabhi atawala muchi wa Ashitaloti na muchi wa Edilei. 5Musa akatumbwi kubhalandila bhandu Shelia jaka Chapanga chikahi pabhakabhi kwihi ja nkoka Yoludani upambala wa kolipiti lyobha.

Akabhapwaghile, 6“Bambo Chapanga, Chapanga witu, akalongi na tepani ku Holebu hoku, akapwaghaje, ‘Ntami pa chitombi chenjenu kwa chikahi chilacho. 7Mbombulaje likambi linu na njendalya kulongi kujenda ku inchi ja itombi ja Bhaamoli, na pandu pa inchi ja pambipi ja Alaba, ku itombi, upambala wa kolijibhi lyobha pahi ja itombi, ku Negebu na pandu pa mumaheku, ena, njendaje mbaka ku inchi ja Kanaani, na inchi ja Lebanoni, mbaka ku nkoka ukolongwa wa Eufulati. 8Ndingalyaje, numpeki mwehapa inchi jenjenu jokapi. Njingalaje mkatamaje mu inchi ambaju Bambo Chapanga akabhalapili akahokolu bhinu, Ibulahimu, Isaka na Yakobo, papamu na ibheleku yabhu pabhapetiki bhombe.’ ”

Musa abhahaghula bhatemula

Kubhoka 18:13-27

9Bhela Musa akabhapwaghi bhandu, “Chikahi patukabhi pachitombi Sinai, nepani nakumpwaghile, ‘Lihengu la kundongoha mwehapa nde likolongwa namaa kwangu nepani kanjika jango. 10Bambo Chapanga, Chapanga winu, akunjonjukili mwehapa kubha bhamaheli, nanamu ndingalyaje, lalenu mbi bhamaheli ngati ndondwa ya kunani. 11Bambo Chapanga, Chapanga wa akahokolu bhinu, na anjonjukya mwehapa kubha bhamaheli mala elufu kupeta mombelile, na kumpengalela ngati moakundaghalile! 12Nambu nepani ananhweza bhole kughatola mang'ahiku ghinu, na kulonda lukwale kwa kulochana kwinu kanjika jango? 13Muhaghulaje bhandu bhakumu bhabhabhi na mbulau, bhabhabhi na umanyi na bhabhatopela kuhuma mu makabila ghinu, na nepani ananabhabheka bhakubha ihongozi bhino.’ ” 14Nanamu mkanyetakili, na kumbwaghila, “Lijambu leulongile nde lamboni kulihenga.” 15Bhela nakabhatoliki ihongozi bhala bhabhabhi na mbulau, na bhabhatopela bhamubhahawili kuhuma mu makabila ghino, na kubhabheka kubha ihongozi bhino. Nakabhabhekiki bhangi kubha ihongozi bhakolongwa bha mabhongelu gha maelufu gha bhandu, mabhongelu gha bhandu mia mia, mabhongelu gha bhandu hamsini hamsini, na mabhongelu gha bhandu makomi makomi. Bhelabhela nakahawili kabheti ihongozi bhangi bha kujemalela kila likabila.

16“Nanatu chikahi chela nakabhalaghalaki bhatemula bhinu, nakapwaghaje, ‘Njowanyaje malochanu pachilanda ja bhalongu bhino Bhaizilaeli. Mkatemulaje ngati moipalakila pachilanda jaka mundu na ndongu waki wa Kiizilaeli, au ngeni joatama papamu naku. 17Ngamwampendale mundu chikahi pantemula, mubhajowanyaje kwa kulengana, nchoku na nkolongwa. Ngamwanjoghopa mundu jokapi, maghambu utemulu ghokapi ghoubhoha uhuma kwaka Chapanga. Lighambu lokapi lelibhi likolongwa nakanope kwinu mwehapa, mnetila nepani, nanatu ananyowanyaje.’ 18Chikahi chenihechi, nakundalaghalaki mambu ghokapi ghaghumpalika mwehapa kughahenga.

Bhapelelezi bhatumakika kujenda kujipeleleza inchi

Hesabu 13:1-33

19“Bhela, ngati Bambo Chapanga, Chapanga witu moakatulaghalakile, tukahengiti kila chindu, tukabhokiki ku Holebu na kujenda ku inchi ja itombi ja Bhaamoli, na tukapetiki pachilanda ja lipololu likolongwa na la kujoghoha lela, lela lemukaliweni, na tukahikiki ku Kadeshi Balinea. 20Panihapa nakumpwaghile, ‘Tuhikiki mu inchi ja itombi ja Bhaamoli, jeatupekeha tepani Bambo Chapanga, Chapanga witu. 21Ndingalyaje, Bambo Chapanga, Chapanga winu ampekihi inchi jenjeno. Haya, njingalaje mkatama monihomu ngati Bambo Chapanga, Chapanga wa akahokolu bhinu, moakundaghalakile. Ngamwijoghopa wala ngamwihekateka mtima.’

22“Nambu mwehapa mkanhikili na kumbwaghila, ‘Tubhapelaka bhandu bhatulongulyaje kujipeleleza inchi kwa ndandi jito, na kutuletela malobhi kubhokana na indela jetupalika kupeta, na michi jetwihikilaje.’

23“Lijambu leniheli lakabhonakini kubha lamboni kwangu nepane, bhela nakahawili bhandu komi na bhabheli, mwanalomi jumu kuhuma mu kila likabila. 24Bhandu bhanihabha bhakabhokiki na kukwela ku inchi ja itombi, na kuhika ku Libondi la Eshikoli na kupeleleza pandu pokapi. 25Bhakatoliki mapambiku ghakumu gha inchi jenijela mumabhoku ghabhu, bhakatuletili na kutupwaghila: Inchi jenjenu jeatupekeha Bambo Chapanga, Chapanga witu nde jinyahi namaa.

26“Nambu mwehapa ngachemwajetakile kukwela konihoko, mkakaniki amuli jaka Bambo Chapanga, Chapanga wino. 27Mkang'ong'utiki mu mahema ghinu na kupwagha, ‘Bambo Chapanga atenda kutuhakalila, nde ndandi akatubhohiki ku inchi ja Misili, nahuli atupelakaje mu mabhoku gha Bhaamoli, na kutuyonanga. 28Bho, tukwela kujenda kwako? Bhalongu bhitu bhatutendiki tuhekatika mitima. Bhakatupwaghili: Bhandu bha konihoku bhabhi na makili namaa, na nde bhalachu namaa, na kubha michi jabhu nde mikolongwa na jibhi na lumatu loluhika kumahunde. Nakanopi ja ghanihagha konihoku tukabhaweni bhabhelakeka bha Bhaanaki!’

29“Nambu nakumpwaghile, ‘Ngamwajoghopa bhandu bhanihabha. 30Bambo Chapanga, Chapanga winu, joandongulela, anaankomanyaje, ngati moakahengile kwa ndandi jinu ku Misili hoku, palongi ja mihu ghino, 31na kulipololu hoku, komukaweni ntundu Bambo Chapanga, Chapanga winu moakuntolile, ngati mundu moantolela mwana wake, mu indela jokapi jemwapetike, mbaka mkahikiki pandu pambane.’ 32Nambu papamu na kubhapwaghila mambu ghokapi, ngachemunhobhali Bambo Chapanga, Chapanga wino, 33joakundongulili mwindela, ikilu kwa moto, na kundangiha indela jempalika kupeta, na muhi kwa lihundi, nahuli kundondela pandu pa kujemeka mahema ghino.

Bambo Chapanga abhalapula Bhaizilaeli

Hesabu 14:20-45

34“Chikahi Bambo Chapanga paakajowini mang'ong'uteku ghanihagha, akayomiki na kulapa, akapwaghaje, 35‘Njeta mundu nga jumu wa chibheleku chenjenu chihakau joanaajibhona inchi jela jinyahi, jenakalaghile kubhapekeha akahokolu bhino. 36Nambu Kalebu mwana waka Yefune pela, jonihoju nde joanaajibhonaje. Nanatu ananumpekya jombi na bhana bhaki inchi jeniheji jeakapiti kujipelaleza, maghambu akabhi ndongwana kwangu nepani Bambo Chapanga kwa kila lilobhi.’ 37Bhela bhela Bambo Chapanga akaniyomili nepani kwa ndandi jino, akapwaghaje, ‘Hata wehapa, wa Musa, ngawijingi mu inchi jeniheje. 38Nambu njangatila waku, Yoshua mwana waka Nuni, anaajingala mu inchi jeniheje. Bhela, unjeghala mtima, kwa kubha jombi anaabhalonguha Bhaizilaeli kujitola inchi jeniheje.’

39“Bhela, Bambo Chapanga akatupwaghile, ‘Bhana bhinu bhamwapwaghiki kubha anabhakamulikikaje na anabhatolakika kwa makili, ambabhu ngachebhamanyi lamboni na lihakau, bhanihabha nde bhabhijingalaje mu inchi jeniheje. Ananabhapekya inchi jeniheje ikubha jabhu, nabhombi anabhatama monihomo. 40Nambu mwehapa mng'anambukaje, na kukelabhuka kulipololu kwa kujengalela indela ja Bahali ja Shamu.’

41“Panihapa mkayangiki, na kumbwaghila, ‘Tepani tuntendili Bambo Chapanga mahoku. Nambu sajenu anatukwelaje kujenda kukomana ngondu, ngati Bambo Chapanga witu, moatulaghalakile.’ Bhela kila mundu akalingongaje silaha yaki ya ngondo, koni mkaholalya kubha nde lijambu lelipepwike kukwela mu inchi ja itombi jela.

42“Nambu Bambo Chapanga akambwaghile, ‘Ubhakanakyaje, ngabhijenda kukomana ngondu nabho, maghambu nepani nganikubhi papamu na mwehapa, ngamwihika kulapulika palongi ja adui bhino.’ ” 43Bhela nakumpwaghile, nambu ngachemwapaliki kujowanela. Mkakaniki kutii amuli jaka Bambo Chapanga, na kwa ing'omu yinu mkapiti ku inchi heji ja itombi. 44Bhaamoli bhabhakabhi bhatama mu chitombi chenihechi, bhakapitalili ngati injuche na kubhalapula, bhakundapwili ku Seili mbaka ku Holima. 45Panihapa mkakelawiki na kulela palongi jaka Bambo Chapanga, nambu Bambo Chapanga ngacheanjowanili chilelu chinu, wala kundolakela.

Matamu gha Bhaizilaeli mulipololu

46“Bhela mkatami ku Kadeshi kwa machobha ghamaheli, kwa chikahi chela chokapi mkatami konihoko.